Camba 3 - Yegɗohiŋ Muci

Bakaaɗi koc na findi Kooh tumoh naa

¹ Waam, e iiñ uupee ñaañ ŋ ɗoopaat ciŋ nduufi Nikiɗi Kooh fere ; iiña woosa ɓitɓa ne : « Andi wa keeh ne, e Kooh woo ne, ɗu joyɗi ñam ali rim kidig, ŋ kidig ci ŋ ɗooƴ nguuki ? »

² Ɓitɓa loffa ɗe ne : « Ɓoo miniɗ ñam rim ciŋ kidig ci ŋ nguuki.

³ Waaye ini kaɗ ŋ rim ciŋ kidgi ŋ leerniŋ nguuki, Kooh woo ne ɓoo kanaat ca ñam, ɓoo kanaat ca sah reɓ wala ɓoo hey kaane fut. »

⁴ Iiña loffa ɗe ne : « Muk, ɗu heyɗi kaane.

⁵ Kooh inah inah ne, ɗu ñama ɗah, liiɓohaaciŋ ɗu hey rangsuke, ɗu hey inhisohe baahiɗ na baahaaɗi findiice. »

⁶ Ɓitɓa marakka rim caŋ kidga, a hotta ne ca moɗiɗ ŋ has, ca mandiɗ na ini neɓ, te ca maɗaah ñamu ne ca rangis liiɓoha. A ɓeennda nga, a ñammba, a nammba eɗ ƴaar ce raak ɗe nga, yeem ñammba.

⁷ Ŋ ɗiska ɗiska liiɓohaacaŋ ɓa rangsukka, weɗ ɓa inhiskoh kotii ne ɓa tas ɓarang ; ɓa ɓayya ɓi saaf mbaɗet, ɓa tokɗohha ca, ɓa kenukka ca.

⁸ Wa noha soos po puuɗsa ef-efɗeeɗa, ɓoya na ɓitiice kerahha Nikiɗi Kooh wileeɗa ŋ nguuka, ɓa ɗembeeɗa ɗe ŋ kidig ca.

⁹ Nikiɗi Kooh ɓeeɗukka ɓo', a woosa ɗe ne : « Fu ŋ nde ? »

¹⁰ A loffa ɗe ne : « Ŋ kerah ɗa kerah ŋ ɗooƴ nguuki, ŋ tiitta, weɗi ŋ ɗasɗukoh ɗa laam ŋ tas ɓarang. »

¹¹ Nikiɗi Kooh woosa ɗe ne : « Moo, ya ɓa woo ɗa ne fu tas ɓarang ? Fu ñam ŋ kidgi ŋ sangohee ɗa e ? »

¹² Ɓoya woosa ɗe ne : « E ɓitɓi fu ambsoh ho na ɗe, a yi eɗ to ŋ rim ciŋ kidgi, ŋ ñammba. »

¹³ Nikiɗi Kooh woosa ɓitɓa ne : « Wee ɓek ɗa ŋ ineem ? » Ɓitɓa woosa ɗe ne : « E iiñi ñaañoh ho po ŋ ñammbaa. »

¹⁴ Nikiɗi Kooh woosa iiña ne : « Ŋ ini fu tum weem, ŋ alkiɗ ɗa ngaŋ ɗoopaat ciŋ kahan ci na ciŋ bilaf fi jen, fu na hee hey faske te fu genan melemsuk ŋ muniŋ merhey mi ngaŋ kipes kiŋ ɗa jen.

¹⁵ Ŋ hey ɓeke sangtiɗoh ŋ harmban fu na ɓitɓi na harmban ɓi na hee rimkohe nga ɗa na ɓiŋ ɗe. Ɓi rimkohan nga ɗe hey pooke hafiŋ ɗa te fu ɗoɓan ɓa ŋ patang kot. »

¹⁶ A nammba woo ɓitɓa ne : « Ŋ hey tume po, fu nik rook ɗah, fu laay miskiɗ, te fu ɓaslan ngaŋ miskiɗ. Fu hey ɗiiɗke ŋ ƴaar fu, waaye a yi yilfan ɗa. »

¹⁷ A hannda woo ƴaara ne : « Fu kerhiɗ woo kiŋ ɓitiifu po fu ñamiɗ ŋ kidgi ŋ sangohee ɗa, fu tahiɗ po merhey mi alkuuɗ, ŋ kipes kiŋ ɗa jen fu hey yaaɓe ne fu han raak pesoha ŋ kehƴi.

¹⁸ Wa hey paare ñapir na paangi raakiɗ rup te fu na hee hey guure kotii ne fu ñam.

¹⁹ Fu pesohan opiŋ ɗa po mbaɗna fu dokkan ŋ kehƴi fu puloh. Laam fu haɓɗohu merhey te fu dokkan ŋ merhey mi. »

²⁰ Ŋ ineem ƴaara teekka ɓitiice Aawa (pesohi). Laam a yi yaayiŋ ɓooɓi na pese jen.

²¹ Nikiɗi Kooh haɓɗiɗta Aadama na ɓitiice kulɓa und, a ɓekiɗta ɓa ca.

²² A woosa ne : « Ŋ ɗiski wa nik ndii, ɓo' inhisohiɗ baahiɗ na baahaaɗi findi ɓoo ; a joyɗi ɓeen kotii ŋ rim ciŋ kidgi na onohe kipes, a joyɗi ca ñam po kipes kiŋ ɗe kee nika po faw. »

²³ Nikiɗi Kooh puliɗta ɗe ŋ nguuka ŋ Eden ne a guur merhey mi a mahohu.

²⁴ Wa a aañ ɓo', a ɗaakka ŋ pulohaaɗ-nohaŋ nguuka, niiɗoh ci na woyse seruben na ndang yongkaah wi na mbiliirke ɓak nu ɓak ne ɓa sangoh waasa kaɗ ŋ kidga na onohe kipes.