Ɓi Rom 10 - Yegɗohiŋ Muci

¹ Ɓaah ciŋ ngo kosiɗ ci, ini ŋ waaɗiɗ cuuɓiŋ Israayel ŋ keeñiŋ ngo na ini mi na kiimɗee ɓa Kooh, weɗ ne ɓa muc.

² Mi yii seede'iɗ ɓa ne ɓa sawriɗ lool ŋ pangkiɗ Kooh, waaye wa hunɗi na ki'inah.

³ Ñak inah kiyurhi puloh ŋ Kooh, na waaɗ tufkiɗoot kiyurhiŋ ɓa haf ɓa, weɗ tah po ɓa teyɗukɗi kiyurhi puloh ŋ Kooh.

⁴ Waasiŋ Musaa mitoh ŋ Kiristaani. Ineem weɗ tah yaa nu kos ɗah raak kiyurah.

Yaa nu kos ɗah hey mucɗasse

⁵ Musaa fiisiɗ ŋ ini kaɗ ŋ kiyurhi puloh ŋ nakoh ci ne : « Yaa nu taambiɗ in cii ɗah, ceɗ a pesohan. »

⁶ Waaye ɓooɓi onu kiyurah taamboh ŋ kosi ɓa kos woo in wiiriis, an : « Kina woo ŋ ɗooƴ fu ne : Ya ɓa rapan ŋ Asamaan ? » Woo keem waaɗ woo ne : Ya ɓa rapan ne a ruhsiɗ Kiristaani.

⁷ Ɓa nam woo ne : « Kina woo ŋ ɗooƴ fu ne : Ya ɓa ruhsan ŋ nunga topaaɗiina ? » Woo keem waaɗ woo ne : Ya ɓa ruhsan ne a puliɗ Kiristaani ŋ kaaniɗ ca.

⁸ Kon ɓooɓeem woo inii : « Woo ki weɗi ŋ seroofu, weɗi ŋ nguɓiŋ ɗa, weɗi ŋ ɗooƴ keeñiŋ ɗa. » - Woo keem weɗ woo ki ŋ ini kaɗ ŋ kosi, wi ɓoo na yegɗohe.

⁹ Laam fu woo na nguɓiŋ ɗa ŋ fiki ɓooɓi ne Yeesu a yi Heɗi, te fu kos ŋ keeñiŋ ɗa ne Kooh hultiɗiɗ ɗe ɗah, fu hey mucɗasse.

¹⁰ Keeñ weɗ na kose, wa tum ɗa ɓo' yurhiɗ, te nguɓ weɗ na woye, wa ɓay ɗa ŋ muc.

¹¹ Fiis ci ceɗ woo ne : « Yaa nu taɓah kosiŋ ɗa nga ɗe ɗah, fu kaci'anɗi. »

Wa ye hondoh Yawuut ci kos Kiristaani ?

¹² Ɓooɓi jen ɓeɗ hend ŋ fiki Kooh, wa Yawuut haa, wa nikaaɗi Yawuut haa, ɓa jen ɓeɗ ɓaah Heɗ, te Heɗ ɓa, yaa nu ɓeeɗuk ɗe ne a naaf ɗa ɗah, a baahoh ɗa ŋ raak-raakiŋ ɗe.

¹³ Laam wa fiisuuɗ ne : « Yaa nu ɓeeɗuk Heɗi ɗah, a hey mucɗasse. »

¹⁴ Waaye ɓa ɓeeɗkohee ɗah, raakee ɓa kosiɗ haa e ? Te ɓa kos ɗah, raakee ɓa kerhiɗ yegɗohiŋ Yi ɓa kos. Te ɓa kerah yegɗoh ɗah, raakee a ɓo' woo ɓa wa.

¹⁵ Te ɓo' woo ɓa wa ɗah, raakee ɗe woosu woosu. Findi Fiis ci woyoha an : « Cey, kot ci ɓa tiind moɗiɗ, ɓi hay na yegɗoh neɓiɗ ! »

¹⁶ Waaye ɓi kerah yegɗoheem, e ɓeɗ jen na tume ini wa woo haa, findi woosuuɗi Esayi woyohee wa ne : « Heɗi, yaa kos yegɗohiŋ ɓoo ? »

¹⁷ Kon, kos na pulohe ŋ ini kerhu, te ini kerhu na pulohe ŋ yegɗohi kaɗ ŋ Kiristaani.

¹⁸ Waaye mi na meeksohe : Ɓi Israayel kerahɗi kerahɗi e ? Aha'kay ! Fiis ci woyiɗ ne : « Hoosoociŋ ɓa kerhuuɗ ŋ kehƴi jen, woo ciŋ ɓa kaɗiɗ po ŋ ɗisik ca uup us ŋ Adina ! »

¹⁹ Waaye mi na meeksohe : Ɓa inahɗi inahɗi ini woyu e ? Aha'kay ! Ŋ ineem, Musaa, a yi koc woo ne Kooh woo an : « Ŋ hey ɗu tahe siis ɓi nikɗi cuuɓ ; ŋ tah ɗu ayruk cuuɓ ñaañaaɗi. »

²⁰ Woosuuɗi Esayi kaannja po a woosa ini Kooh woo, an : « Ɓi waakeeɗi so, mirndohiɗ to hot, ɓi meeksohɗi so, mirndohha so inah. »

²¹ Waaye ini kaɗ ŋ Israayel, a woo ne : « Ŋ hooɓuk raɗis yaah ne ŋ morgiɗuk ɓi kerhiɗɗi so, ɓi na taasee so. »