Ɓi Rom 1 - Yegɗohiŋ Muci

Kañɗohi

¹ Mi yii kañiɗ ɗu, ɗu ɓi nik ŋ Rom, mi yi Pool, ñaamiŋ Kiristaani Yeesu. Ŋ ɓeeɗkuuɗ ne ŋ nik Apootar te ŋ kooɗuuɗ ne ŋ woo Yegɗohiŋ Kooh ŋ ini kaɗ ŋ muci.

² Yegɗoheem, a gapohee wa taamboh ŋ woosuuɗ ci ŋ Fiis ci Hooliɗ ci.

^3-4 Wa na woye ŋ Kuɓkiŋ ɗe Yeesu Kiristaa, Heɗ ɓoo ; a puloh ŋ Dawuuda ŋ ini kaɗ ŋ Adina. Ŋ ini kaɗ ŋ Fuuɗsi Hoolohngaani, a eɗuuɗ hatiliŋ Kuɓkiŋ Kooh wa a hultiɗu.

⁵ Taamboh nga ɗe, ŋ baahohuuɗ po ŋ nikka Apootar ne ɓooɓiŋ cuuɓ ci jen min ɗe kerhiɗ taamboh ŋ kos ; ŋ ineem, tiikiŋ ɗe yak.

⁶ Ɗu, ɗu nam ɓaah ŋ ɓooɓeem, ɗu ɓi Yeesu Kiristaa ɓeeɗuk ŋ haf ce.

⁷ Mi yii fiisiɗ ɗu kaytii, ɗu ɓi nik ŋ Rom jen, ɗu ɓi Kooh keeñkoh te a ɓeeɗukka ɗu ne ɗu hool wuu ce. Kooh Baabiŋ ɓoo baahohaat ɗu, a on ɗu jam ! Yeesu Kiristaa Heɗi baahohaat ɗu, a on ɗu jam !

Pool maɗiɗ kaɗ marka kosiɗ caŋ Rom

⁸ Mi yii camboh corkiɗ Koohiŋ ngo taamboh ŋ Yeesu Kiristaa, sagu kosi ɗu kos, laam weɗi laamtohseeɗa ŋ adinaani jen.

⁹ Kooh seede'iɗ to, Kooh yi mi na pangkiɗe ŋ keeñiŋ ngo ŋ Yegɗohiŋ Muci ŋ ini kaɗ ŋ Kuɓkiŋ ɗe. A seede'iɗ ne ŋ gen ɗu gen ɓaahndoh ŋ kiim ci mi na kiimee ɗe.

¹⁰ Ŋ gen ɗe kiim ne a on ndo mbeh po ŋ min ɗu hay marke, ne a waaɗa ɗah.

¹¹ Ŋ waaɗiɗ ɗu hot lool, ne ŋ eɗ ɗu, ɗu min ɓaah na so onoh ci Fuuɗsi Hoolohngaani baahoh ho, ne ca ndengiɗ ɗu.

¹² Ŋ waaɗ woo ne, ŋ hay ndeem ɗah, ɓoo ñaahtiɗoh ŋ kosi ɓoo ɓaah, wiŋ ɗu na wiŋ ngo.

¹³ Ɓaah ciŋ ngo kosiɗ ci, ŋ waaɗiɗ ne ɗu inah ne waas laayiɗ ŋ tufkiɗ ne ŋ hay ɗu marke ne nikiŋ ngo na ɗu min rim in findi ŋ tumoha na cuuɓ ci cinooci ; waaye poyi ŋ minɗi wa tum.

¹⁴ Ŋ yegiɗ ŋ haf fo ne jangiɗ na jangaaɗi etohiɗ pangkiŋ ngo, te ñaañiɗ na ñaañaaɗi etohiɗa.

¹⁵ Weɗ tah ɗu ɓi Rom, ŋ waaɗta ɗu woo lool Yegɗohiŋ Muci, findi ŋ woyoha ɓinooɓi.

Yegɗohiŋ Muci weɗ Hatiliŋ Kooh

¹⁶ Laam ŋ supukɗi woo Yegɗohiŋ Muci ; Yegɗohiŋ Muci, weɗ hatiliŋ Kooh, weɗ a na mucɗohe yaa nu kos ɗah, wa camboh ŋ Yawuut ci, ɓi nikɗi Yawuut taammba nga.

¹⁷ Wa na teeɓohe wa ye weɗ kiyurhi puloh ŋ Kooh, te wa jen, wa camboh ŋ kos, wa mirndohha ŋ kos, findi wa fiisohu an : « Yaa nu yurah ɗah, pesohan kosi a kos. »

Ayrukiŋ Kooh keen ŋ yurhaaɗiici

¹⁸ Laam ayrukiŋ Kooh puloh nga ɗe na teeɓohke teeɓohuk, wa keen ŋ ɗafuk ɓooɓi eɗɗi ɗe cir, ɓi yurhaaɗiici, ɓi hondoh keeh ki pul sagu yurhaaɗiikiŋ ɓa.

¹⁹ Laam, ini min inhu ngaŋ Kooh wa hooliɗ nga ɓa ; a Kooh teeɓoha.

²⁰ Ina Adina ferohu poyi, ini minɗi hotu nga ɗe, maanaam hatiliŋ ɗe po faw na kikooh kiŋ ɗe, ɓo' miniɗa inah ŋ in ci Kooh haɓiɗ, ne ɓoyeem liiɓ nga ɗah. Kon, ɓooɓeem raakɗi ali naafkoha,

²¹ laam ali nik ne ɓa inhiɗ Kooh, ɓa yakiɗɗi ɗe findi Kooh, ɓa corkiɗɗi ɗe ; waaye ɓa muuƴiɗ ŋ liiɓsiɗoh ciŋ ɓa, te liiɓ ciŋ ɓa ñaañaaɗiici na ɓekee ɓa ŋ ñuus tuɗ.

²² Ɓa na toone ñaañ, waaye ɓa topiɗ naand.

²³ Joy ne ɓa ñaamuk Kooh, yi Heɗ kiyak, te a minɗi kaan, ɓa ñaamkee nataal ɓo' kaanoh na nataal sel na ɗoopaat heɗ kot nikiis na faskoh.

²⁴ Weɗ tah Kooh faɗ ɓa ŋ hoolaaɗiiki keeñ ciŋ ɓa waaɗ, po ŋ harmban ɓa, ɓa riiɓɗee faan ciŋ ɓa na riiɓ kaci'ɗohiɗ.

²⁵ Ɓa na faɗe keeh kiŋ Kooh, ɓa ambee ŋ lee te ɓa ñaamkee, ɓa pangkiɗee feruuɗ ci, ɓa sang ñaamuk na pangkiɗ Ferohi, Kooh, yi yakɗaah po faw ! Amiin !

²⁶ Tumohaaɗ ceem ceɗ tah, Kooh faɗta ɓa ŋ waaɗ-waaɗ kaci'ɗohiɗ. Ŋ ineem, ɓitiɓ ciŋ ɓa faɗiɗ faankohi moɗoɗi, ɓa faankohee ɓitiɓ na ɓitiɓ.

²⁷ Wa nam mand ɗaa ŋ ƴaar ci, ɓa faɗiɗ faankohi moɗoɗi na ɓitiɓ, ɓa maɗtiɗohee keeh-keeh ŋ harmban ɓa. Ɓa na tume in kaci'ɗohiɗ ŋ harmban ɓa, faankoh ƴaar na ƴaar. Ŋ ineem, ɓa rahsee ŋ haf ɓa wirndi ɓa joy rahas ŋ muuƴi ɓa muuƴ.

²⁸ Ɓa amb ne inah Kooh raakɗi njiriñ, weɗ tah a faɗ ɓa ŋ liiɓohaaɗ raakaaɗi njiriñ, po ɓa tumee in ci nikɗi waas.

²⁹ Ɓa riiffa na in yurhaaɗi nu nik na añaand na waaɗ kopor na tum baahaaɗi. Ɓa riifiɗ na siis na apoh na lahtoh na njuucnjaac na tum moɗaaɗi. Ɓa na ɗooɓohe ɗooɓoh,

³⁰ ɓa yahee tiik, ɓa sangiɗ Kooh, ɓa ɓasohoh, ɓa hotsiɗkoh, ɓa tipkoh, ɓa ñaañiɗ ŋ tumoh miskiɗ, ɓa kerhiɗɗi ɓi rim ɓa.

³¹ Ɓa raakɗi hel, ɓa na tumeeɗi ini ɓa woo, ɓa suussiɗ keeñ, ɓa na miskasseeɗi.

³² Ɓa inhiɗ findi Kooh atte'oh in ceem : Ɓi na tume in ceem yeyyoo kaan. Waaye ɓa na tumee ca, ɓaatta nga, ɓa neɓsee ŋ ɓi na namee ca tum.