Ɓi Efes 1 - Yegɗohiŋ Muci

Kañɗohi

¹ Mi yii kañiɗ ɗu, ɗu ɓi ɓo'-Kooh ci nik [ŋ Efes]. Mi yi Pool, Apootariŋ Kiristaani Yeesu ŋ ini Kooh waaɗ, mi yii fiis ɗu, ɗu ɓi hool wuu Kooh te ɗu carra oolku ŋ niki ɗu nik ŋ Yeesu Kiristaa.

² Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !

Barke mitiɗ ŋ Kiristaani

³ Eey Kooh, yi nik Koohiŋ Heɗ ɓoo Yeesu Kiristaa, a nammba nik Baabiŋ ɗe, a yakɗaah ; ŋ niki ɓoo nik ŋ Kiristaani, a barke'ɗiɗ ɓoo ŋ Fuuɗsi Hoolohngaani, barke nu nik ŋ ɗafki.

⁴ Ŋ Kiristaani, Kooh taniɗ ɓoo bala Adina camban, ne ɓoo hool wuu ce te ɓoo raakuu sikka ŋ fikiice. Ŋ waaɗohiŋ ɗe,

⁵ a ambeen ne a hey ɓoo tume kuɓuuciŋ ɗe taamboh ŋ Yeesu Kiristaa. Ineem weɗ a waaɗ ŋ baah kiŋ ɗe,

⁶ ne ɓoo ƴeek yaki baahohi a baahoh ɓoo yak, wi a on ɓoo ŋ niki ɓoo nik ŋ Kiristaani, yi a waaɗ.

⁷ Ŋ aami a aam ñif miŋ ɗe, a pulɗohiɗ ɓoo ŋ baahaaɗi, ɓoo ɗaasuuɗ bakaaɗ ci. Weɗ yakkiŋ baahohiŋ Kooh,

⁸ a eɗta ɓoo nga laayiɗ, wa hunnda na liiɓohaaɗ moɗiɗ nu nik na kiñaañ nu nik.

⁹ A inhiɗiɗ ɓoo ini ɗasɗukiɗiŋ ini a waaɗee tum. A tufkiɗeen ŋ baah kiŋ ɗe ne, a heya tume taamboh ŋ Kiristaani.

¹⁰ Ineem, a hey wa tume ŋ jamanoonaŋ wa, weɗ ne a ambsoh in ci nik ŋ Eel ci na kehƴi jen, a deg Kiristaani ŋ hafiŋ ca.

¹¹ Ɓaatta nga, ŋ niki ɓoo nik nga ɗe, ɓoo rahsiɗ ɓakiŋ ɓoo ŋ gapohi, laam, Kooh taniɗ ɓoo maañ, wa nikee ini a tufkiɗee tum sagu ne a waaɗee wa waaɗ. Te in nu Kooh tufuk tum ɗah, a tuma findi a waaɗoha.

¹² Ɓoo ƴeekaat yaki a yak, ɓoo, ɓi koc ooluk Kiristaani.

¹³ Ɗu, wa ɗu kerah woo kiŋ keeh ki, Yegɗohiŋ Muciŋ ɗu, ɗu nameen ɗe kos, te ŋ niki ɗu nik nga ɗe, Kooh eɗiɗ ɗu Fuuɗsi Hoolohngaani gapohse ne a nik ñaasi teeɓoh ne ɗu wuu ce.

¹⁴ Fuuɗsi Hoolohngaani a yi firnde ne in ci Kooh gap cuuɓiŋ ɗe, ɓoo hey ca rahse. Ɓoo hey ca rahse mbeha ɓoo pulɗassan ŋ miskiɗ. Kon, ɓoo ƴeekaat yaki a yak.

Pool kiimɗiɗ ɓi Efes Kooh

¹⁵ Ineem weɗ tah po, wa ŋ kerah poyi kosi ɗu kos Yeesu Heɗi na waaɗi ɗu waaɗ ɓo'-Kooh ci jen,

¹⁶ ŋ gen corkiɗ Kooh ŋ ini kaɗ nga ɗu. Ŋ ɓaahndohee ɗu ŋ kiim ci mi na kiimee ɗe.

¹⁷ Ini mi na kiimɗee ɗu, weɗ ne Koohiŋ Heɗ ɓoo Yeesu Kiristaa, Baabi raak kiyak ki, on ɗu Fuuɗsi Hoolohngaani yi onan ɗu liiɓohaaɗ moɗiɗ te a teeɓ ɗu ya ɓa Kooh po ɗu inah ɗe keeh-keeh.

¹⁸ A ñiinɗaat has ciŋ ɗu na keeñ ciŋ ɗu, ne ɗu inah yaakaari a on ɗu wa a ɓeeɗuk ɗu, ɗu nam inah findi gapohiŋ ɗe yakoh ŋ ɓo'-Kooh ci

¹⁹ na findi hatiliŋ ɗe yakoh ŋ ɗooƴ ɓa, maanaam ŋ ɗooƴ ɓoo ɓi kos. Weɗ hatili yakohngaani

²⁰ Kooh hultiɗoh Kiristaani, weɗ hatili a nam ɗe ɓoofɗoh ŋ yaah ñaahmiŋ ɗe, ŋ ɗafka.

²¹ Kiristaani ɓoofɗuuɗ ŋ ɗafuk ki'adug nu nik, ŋ ɗafuk kikilifa nu nik, ŋ min-min nu nik, ŋ hatil nu nik na in nu raak tiik ɗah, ngaŋ adinaanii dong haa, waaye na adinaani na haye.

²² Kooh on Kiristaani ne a adgoh in ci jen, a degga ɗe ŋ ɗafuk in ci jen, a onnda Janguuni ɗe, ne a nik hafiŋ Janguuni.

²³ Janguuni weɗ faaniŋ Kiristaani ; ŋ ɗooƴ Janguuni, a yii nga keeh-keeh, te a yi mitiɗ in ci jen.