3 Saaŋ 1 - Yegɗohiŋ Muci

Kañɗohi

¹ Mi yii kañiɗ ɗa, Gayus, mi yi yakkiŋ Janguuni, mi yii fiis kaytii wuu fu nawleeso, fu yi ŋ keeñkoh keeh-keeh.

² Nawleeso, mi na kiime Kooh ne fu raak jam ŋ in ci jen. Findi kipes kiŋ ɗa na Kooh wiroh, Kooh onaat ɗa wir faan mand ɗaa.

³ Ɓaah ciŋ ɓoo kosiɗ ci hayya ndii ɗah, ɓa na seede'e seede keeh ki nik nga ɗa na findi fu na pesohe ŋ keeh ki ; ineem, ŋ neɓuuɗ nga lool.

⁴ Ŋ kerahha ne komaakciŋ ngo ŋ Kiristaani na pese ŋ keeh ki ɗah, sumi mi na sume ŋ ineem, ŋ minɗi raak sum ki uupa.

Findi Gayus na tumohe na ɓaaɓoh ci

⁵ Nawleeso, in ci fu na tumɗe ɓaah ciŋ ɓoo kosiɗ ci na ɓaaɓe, po ɓi fu inahɗi sah, fu na tumee wa tum wooriɗ.

⁶ Ɓa seede'iɗ waaɗi fu waaɗ ɓooɓi, ŋ fiki ɓi Janguunii. Te wa heen baahe lool ne fu ɓaatɗohee ɓaah ciŋ ɓoo ɓeem ŋ ɓaaɓiŋ ɓa findi ɓo'-Kooh na tumohe.

⁷ Laam e tiikiŋ Kiristaani tah ɓa kuruk te ɓa heelkuu ali in ŋ ɓooɓi kosaaɗiici.

⁸ Kon ɓoo, kosiɗ ci, e ɓoo joy ɓaatɗoh ɓaaɓoh ceem ne ɓoo hun na ɓa, ɓoo pangkiɗ keeh ki.

Joteref na Demetiriyus

⁹ Ŋ fiisiɗ kayit, ŋ kaɓɗohhaa ɓi Janguuniŋ ɗu, waaye Joteref taambkohɗi woo kiŋ ɓoo te a waaɗ ne a yi adgohan ɓooɓi jen.

¹⁰ Weɗ tah ŋ hay ɗah, ŋ hey woye in ci a na tume, in ci moɗaaɗiici naandohaaci a na woyɗe ɓoo. Ineem doyɗi ɗe, a yi ŋ haf ce, a na taambɗukeeɗi ɓaah ciŋ ɓoo kosiɗ ci na haye ndeem te ɓaat nga ɓi na waaɗe wa tum a yi na hondohee ɓa tuma, ɓa sanga ɗah a aañ ɓa ŋ Janguuni.

¹¹ Nawleeso, kina altiɗkoh in baahaaɗi, waaye altiɗkoha in baahiɗ ; ɓoyi na tume in baahiɗ, a ɓaah ŋ Kooh ; ɓoyi na tume in baahaaɗi, a moosɗi inah findi Kooh mand.

¹² Demetiriyus nak, ɓooɓi jen na woye in baahiɗ nga ɗe te ɓo' miniɗ hot ne wa keeh. Ɓoo namiɗ ɗe seede'iɗ te fu inhiɗ ne in nu ɓoo seede ɗah, wa keeh.

Askohi

¹³ Raakiɗ in laayiɗ ci ŋ joy ɗa woo, waaye ŋ waaɗɗi ca fiis ŋ kayit findi an.

¹⁴ Ŋ oolkiɗ ne ŋ hey ɗa hote maañaaɗi te ɓoo hey woye ɓo' na ɓo'.

¹⁵ Jam nikaat na ɗa ! Nawleeci ɓa ɗii kañiɗ ɗa ! Kañɗa nawleeciŋ ɓoo, yaa nu nga ŋ tiikiŋ ɗe.