2 Timoote 1 - Yegɗohiŋ Muci

Kañɗohi

^1-2 Mi yii kañiɗ ɗa, Timoote, mi yi Pool, Apootariŋ Kiristaani Yeesu. Ŋ tumuuɗ Apootar ŋ waaɗ-waaɗiŋ Kooh ne ŋ yegɗoh gapohiŋ kipes ki nik ŋ Kiristaani Yeesu. Mi yii fiis kaytii ne ŋ woo na ɗa Timoote, kuɓkiŋ ngo ŋ keeñkoh. Kooh yi Baabi baahohaat ɗa, a yirmaat ɗa, a on ɗa jam ; Kiristaani Yeesu Heɗ ɓoo baahohaat ɗa, a yirmaat ɗa, a on ɗa jam.

Pool corkiɗiɗ Kooh sagu Timoote

³ Kooh, yi mi na ñaamke na hel daliɗ findi ɓooɓi rim mbo na caacuuciŋ ngo, mi na genee ɗe corkiɗ nga ɗa ; ŋ ɓekee tiikiŋ ɗa ŋ kiim ciŋ ngo wek na noh.

⁴ Mi yii naandsuk muhun caŋ ɗa, ŋ mariɗ ɗa hot lool, ne ŋ riif na sum.

⁵ Mi yii naandsuk kosi keeh-keehi nik nga ɗa. Koseem kockoh ŋ caac fu ɓitiɓ Loyiis na yaay ɗu Onis, te wa wooriɗ to ne weɗi nammba nik nga ɗa.

Pool ñaahiɗ Timoote

⁶ Ineem weɗ tah mi yii naandis ɗa ne fu humbis ini Kooh tum nga ɗa findi jaal yongkaah, ini fu rahas wa ŋ deg ɗa yaah ciŋ ngo.

⁷ Kooh eɗɗi ɓoo fuuɗsi tuman ɓoo neek, waaye a eɗ ɓoo Fuuɗsi riifɗan ɓoo na hatil na waaɗoh na amb haf ɓoo.

⁸ Kon nak kina supuk seede ŋ ini kaɗ ŋ Heɗ ɓoo, te kinaa so supuk mi yi ambu saguuce. Waaye, ngaŋ hatiliŋ Kooh, ɓaaha na so miskiɗi sagu Yegɗohiŋ Muci.

⁹ Wa cariɗa keeh-keeh, laam Kooh mucɗiɗ ɓoo te a ɓeeɗkiɗ ɓoo ne ɓoo nik ɓo' hooliɗ wuu ce. A tumɗi ineem sagu in ci ɓoo tum, waaye a tuma ŋ ini neɓ ɗe ne a baahoh ɓoo ; a baahohiɗ ɓoo ŋ niki ɓoo nik ŋ Kiristaani Yeesu, bala Adina nikan.

¹⁰ Baahoheem hotkiɗ kotii, wi Kiristaani Yeesu, Mucɗohi hay. A yi fol hatiliŋ kakaan, a taamboh ŋ Yegɗohiŋ Muci a eɗ ɓoo, a teeɓohha kipes ki kakaan miniɗɗi in.

¹¹ Ne ŋ teeɓoh muceem, weɗ tah po Kooh tummba so yegɗohoh na Apootar na jangɗohoh.

¹² Ineem weɗ tah po ŋ raakee miskiɗ woti. Waaye ŋ supukɗi nga, laam ŋ inhiɗ Yi ŋ kos te wa wooriɗ to ne a raakiɗ hatili a niiɗohan ini a dengkoh ho po ŋ mbehaŋ atteena.

¹³ Marka ŋ woo ci keeh ci fu kerhoh nga so. Fu tiindɗoh ca kosi na waaɗohiŋ ɓi nik ŋ Kiristaani Yeesu.

¹⁴ Taambkoha in ci baahiɗ ci Kooh dengkoh ɗa, taamboh ŋ Fuuɗsi Hoolohngaani nik nga ɓoo.

¹⁵ Fu inhiɗ ne ɓiŋ kur caŋ Asi jen faɗiɗ to, te Fijel na Hermojen ɓaah ŋ ɓooɓeem.

¹⁶ Onesifoor nak, Heɗi yirmaat ɓi kahan ce, a meeɗ to meeɗ ɓaatɗoh, te a supkeeɗi ceen ciŋ ngo.

¹⁷ Waaye kay, wa a ree Rom rek, a waakeeɗa so ɗisik nu ɗisik po a hotta so.

¹⁸ A miskaat Heɗi ŋ mbehaŋ atteena ! A fu uup inah pangki a panguk ŋ Efes jen.