2 Tessalonik 3 - Yegɗohiŋ Muci

Kooh cariɗ oolku

¹ Ɓaah ciŋ ngo, ini tas weɗ ne ɗu kiimiɗ ɓoo Kooh ne woo kiŋ Heɗi min pasarkoh baahiɗ te wa yakɗu ŋ ɗisik laayiɗ findi wa yakɗohu ŋ ɗiskiŋ ɗu.

² Kiimaat Kooh ne ɓoo muc ŋ yaah ciŋ ɓo' ci añaandiɗ ci, baahaaɗiici ; e ɓooɓi jen raak kos haa.

³ Waaye Heɗi cariɗ oolku : A hey ɗu ndengɗe, a niiɗ ɗu ŋ baahaaɗiini.

⁴ Wa hooliɗ ɓoo ŋ niki ɓoo nik nga ɗe ne ɗu na tume ini ɓoo nak ɗu te ɗu heya gene tum.

⁵ Heɗi yurhiɗaat keeñ ciŋ ɗu ŋ waaɗi Kooh waaɗ ɗu na muñi nik ŋ Kiristaani.

Njirñiŋ panguk

⁶ Ɓaah ci, ɓoo na nakee ɗu ŋ tiikiŋ Heɗi Yeesu Kiristaa, ne ɗu us ɓaah nu na pese pes palañsukohiɗ ɗah. Laam, ɓaah mand ɗaa pesohɗi jangɗohi a rahsoh nga ɓoo.

⁷ Ɗu inhiɗ ŋ haf ɗu findi ɗu joy ɓoo altiɗkohoh, laam wi ɓoo nik na ɗu ɓoo peseeɗi pes palañsukohiɗ.

⁸ Ɓoo ñamɗi ali kañam ɓo' wi ɓoo wirindɗi. Ɓoo pangkee panguk, ɓoo raakeeɗa miskiɗ wek na noh ne ɓoo gaƴkuu ŋ ali ɓo' nga ɗu.

⁹ Wa nikɗi haa ne waas oneeɗi ɓoo ne ɓoo meeksoh in, waaye e ɓoo waaɗee ɗu teeɓ findi ɗu altiɗkohan ɓoo.

¹⁰ Wa ɓoo nik na ɗu, ɓoo eɗee ɗu nakohii : Ɓo' sang panguk ɗah, a kinaat ñam !

¹¹ Ɓoo kerhiɗ ne raakiɗ ɓi ɓo' nga ɗu ɓi na pese pes palañsukohiɗ, ɓa na pangkeeɗi, ɓa na gene aas ŋ in ci ɓa rahsohɗi.

¹² Ɓoo ɓii woo ɓooɓeem te ɓoo ɓii ñaah ɓa ŋ tiikiŋ Heɗi Yeesu Kiristaa ne ɓa pangkaat moɗoɗ, ɓa ñam kañam ki ɓa raakoot.

¹³ Ɓaah ciŋ ɓoo, ini kaɗ nga ɗu nak, kinaat moos yaaɓoh ŋ tum baahiɗ.

¹⁴ Ɓo' sang taambiɗ ini ɓoo woo ŋ fiisi ɓoo na kaɓɗohee ɗu wii ɗah, inhisaat ɗe baahiɗ te kinaat ɗe ɓaahndohis ŋ ali in, ne a kaci.

¹⁵ Kinaat ɗe amb findi sangiɗiŋ ɗu, waaye woytohaat ɗe findi ɓaah ɗu.

Askohi

¹⁶ Heɗi ŋ haf ce, yi Heɗ jam, onaat ɗu jam ŋ in nu nik, na findi wa min mand ɗah. A nikaat na ɗu jen !

¹⁷ Mi Pool, ñam fiisoot kañɗohii na yaahiŋ ngo. Weɗ mandargaaniŋ ngo ŋ fiis ci mi na kaɓɗohe jen ; fiisohaaɗiŋ ngo weɗi weem.

¹⁸ Heɗ ɓoo Yeesu Kiristaa baahohaat ɗu jen !