2 Tessalonik 1 - Yegɗohiŋ Muci

Kañɗohi

¹ Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabiŋ ɓoo, ɗu nikka ŋ Yeesu Kiristaa Heɗi.

² Kooh Baabi na Yeesu Kiristaa Heɗi baahohaat ɗu, on ɗu jam.

Pool corkiɗiɗ ɓi Tessalonik

³ Ɓaah ci, ɓoo joyiɗ gen corkiɗee Kooh ŋ ini kaɗ nga ɗu, te wa waas ne ɓoo tuma. Kosiŋ ɗu wii ɓaatuk keeh-keeh, te ɗu jen, yaa nu nga ɗah, waaɗi a waaɗ morom ce na uupe uup ɓaatuk.

⁴ Ineem weɗ tah ɓoo na woye ɓi Janguuciŋ Kooh ne ɓoo neɓuuɗ nga ɗu, sagu muñi ɗu na muñe na kosi ɗu raak ŋ ɗooƴ tolfiɗ ci na miskiɗ ciŋ ɗu jen.

⁵ Miskiɗ ceem na teeɓohe ne findi Kooh na atte'ohe, wa ɗaa ; ca na onee ɗu ne ɗu yeyyoo Nguuriŋ ɗe, Nguuri tah ɗu muñee miskiɗ.

⁶ Wa in yurhiɗ ŋ has ciŋ ɗe ne a deg miskiɗ ɓi na degee ɗu miskiɗ,

⁷ te a iɗsiɗ ɗu, na ɓoo jen, ŋ miskiɗ ceem. Ineem raakan ŋ mbehi Yeesu Heɗi teeɓohkan, a pulohan Eel ci, a hun na malaakaaciŋ ɗe, ca raakiɗ hatil keeh-keeh.

⁸ A hey haye ŋ ɗooƴ jaal yongkaah, a mbugal ɓi inahɗi Kooh te ɓa sannga taambiɗ Yegɗohiŋ Muci kaɗ ŋ Heɗ ɓoo Yeesu.

⁹ Mbugaliŋ ɓa nikan ne ɓa ɗumbu po faw, ɓa us Heɗi na yaki hatiliŋ ɗe yak.

¹⁰ A hey haye ŋ mbeheem ne hooliɗ ciŋ ɗe yakiɗ ɗe, te ɓi kos ɗe jen hey feyse ŋ yaki a yak. Te ɗu, ɗu hey ɓaahe nga, laam ɗu kosiɗ ini ɓoo seede ŋ fikiiɗu.

¹¹ Ineem weɗ tah ɓoo na genee ɗu kiimiɗ Koohiŋ ɓoo, ne a on ɗu ɗu yeyyoo ɓeeɗki a ɓeeɗuk ɗu. Te na hatiliŋ ɗe, a on ɗu, ɗu mitiɗ in baahiɗ nu ɗu waaɗ tum ɗah, ɗu mitiɗ pangki ɗu na tume sagu kosi ɗu kos.

¹² Ŋ ineem, ɗu hey teeɓohe findi tiikiŋ Heɗ ɓoo Yeesu yakoh, a nam ɗu yakiɗ ŋ niki ɗu nik nga ɗe ; wa nik baahohiŋ Yeesu Kiristaa, yi Koohiŋ ɓoo na Heɗ ɓoo.