2 Piyeer 1 - Yegɗohiŋ Muci

Kañɗohi

¹ Mi yii kañiɗ ɗu, mi yi Simong Piyeer, ñaamiŋ Yeesu Kiristaa, yi ɓaah ŋ Apootar ciŋ ɗe, mi yii fiis ɗu kaytii, ɗu ɓi rahas kosi car waaɗu findi wiŋ ɓoo. Ɗu rahasa taamboh ŋ yurhi Kiristaani yurah, a yi Koohiŋ ɓoo na Mucɗohiŋ ɓoo.

² Baahohsaat, ɗu onu jam te in ceem gen ɓaatke, ŋ inhi ɗu inah Kooh na Heɗ ɓoo Yeesu !

In ci ɓoo etoh ne ɓoo raak kipes ŋoɗiɗ ŋ Kooh

³ Ŋ hatiliŋ ɗe, Heɗi eɗiɗ ɓoo in ci ɓoo etoh jen ne ɓoo raak kipes ŋoɗiɗ nga ɗe. A eɗiɗ ɓoo ca taamboh ŋ inhi ɓoo inah Kooh yi ɓeeɗuk ɓoo. A ɓeeɗuk ɓoo taamboh ŋ yaki a yak ŋ haf ce na baah kiŋ ɗe.

⁴ Ŋ ineem, a gapeen ɓoo gapoh baahiɗ ci ɓo' inahɗi findi ca hend te ɓoo rahsiɗ ca. A tumiɗ ineem ne ɗu fus ŋ maɗaah ci baahaaɗiici na yahrohe ɓi adinaanii, ɗu raak ɓak ŋ kipes kiŋ ɗe.

⁵ Ineem, weɗ tah, ndengɗukaat keeh-keeh, te ŋ kosiŋ ɗu, ɗu ɓaat nga tumohaaɗ baahiɗ, ŋ tumohaaɗi baahɗeem, ɗu ɓaat nga inah Kooh,

⁶ ŋ inhiŋ Kooh weem, ɗu ɓaat nga min amb haf ɗu, ŋ min kiŋ ɗu amb haf ɗu weem, ɗu ɓaat nga muñ miskiɗ, ŋ muñiŋ miskiɗeem, ɗu ɓaat nga ŋoɗ ŋ Kooh,

⁷ ŋ ŋoɗiŋ ɗu ŋ Kooh weem, ɗu ɓaat nga waaɗtiɗoh ŋ ɗooƴ ɗu, te ŋ waaɗtiɗohiŋ ɗu weem, ɗu ɓaat nga waaɗ ɓooɓi keeh-keeh.

⁸ Laam in ceem jen nik nga ɗu te ca gen ɓaatuk ɗah, inhi ɗu inah Heɗ ɓoo Yeesu Kiristaa hey tume po ɗu nikanɗi yoondɗukaaɗi wala raakaaɗi njiriñ.

⁹ Waaye ɓo' nu in ceem nikɗi nga ɗe ɗah, a mand na fuuliɗ, has ciŋ ɗe na hoteeɗi usiɗ. A alkohiɗ ne a hoolɗuuɗ ŋ bakaaɗ ciŋ ɗe ɗeɓgaan.

¹⁰ Ineem weɗ tah, ɓaah ciŋ ngo, ndengɗukaat po ɓeeɗki Kooh ɓeeɗuk ɗu na kooɗi a kooɗ ɗu nik in wooriɗ nga ɗu ; ɗu tuma ɗah, ɗu keenanɗi muk.

¹¹ Te ŋ ineem, ɗu hey rangsiɗasse baahiɗ buntaaciŋ Nguuri genan po faw, Nguuriŋ Heɗ ɓoo Yeesu Kiristaa, Mucɗohiŋ ɓoo.

Woo ciŋ Apootar ci na woosuuɗ ci oolkaah

¹² Ineem weɗ tah, ŋ genan ɗu naandis in ceem, ali nik ne ɗu inhiɗ ca po ƴutiɗ sah te ɗu tufkiɗ po ɗu ndengiɗ ngaŋ keeh ki ɗu teeɓu.

¹³ Ŋ amb ne wa ini ŋ joy tum feeh mi yii pes ɗah ne ŋ yunee ɗu ŋ naandsoh ceem.

¹⁴ Laam, ŋ inhiɗ ne ŋ hey saɓsukohe na faanii maañaaɗi, findi Heɗ ɓoo Yeesu Kiristaa ŋ haf ce teeɓoh ho wa.

¹⁵ Waaye, ŋ hey ndengɗuke po, ŋ finho cootiŋ ngo, ɗu genee naandsuk in ceem.

¹⁶ Wi ɓoo yegɗee ɗu hayiŋ Heɗ ɓoo Yeesu Kiristaa ŋ hatiliŋ ɗe, ɓoo gaƴkeeɗi ŋ andiini feru ŋ hereñ ɓo', ɓoo hotoot hotoot yaki a yak.

¹⁷ Laam Kooh Baabi a yi eɗ ɗe cir, yakiɗta ɗe, wa nikee wa hoosooraŋ Kooh yi Heɗ kiyak hay nga ɗe, woosa ne : « Yii a yi Kuɓkiŋ ngo ŋ waaɗ keeh-keeh, yi neɓ po ŋ keeñ. »

¹⁸ Ɓoo kerhootiɗ hoosooreem puloh Asamaan, wa ɓoo nik na Yeesu ŋ tangooraŋ Kooh.

¹⁹ Wa ɓaatta ɓoo woor ne woo ciŋ woosuuɗ ci tufkiɗ, te wa baahiɗ ne ɗu faɗoh ca nof. Ca mand na laampaani na siñaarɗe ŋ ɗisik ñuusiɗ, po ŋ wiisaaɗi, jaar mbeedi pul, hori na ɓaaɓ. Wa siñaariɗ ŋ keeñ ciŋ ɗu.

²⁰ Bala ali in, inhaat ne, ŋ woo-woosuuɗ ci nik ŋ Fiis ci, ali woosuuɗ moosɗi woyoh woo ciŋ ɗe haf ce.

²¹ Laam ali woosuuɗ moosɗi woyoh ŋ ini a waaɗ ŋ haf ce. A Fuuɗsi Hoolohngaani hiiree ɓa, ɓa yegɗoheeɗa woo kiŋ Kooh.