2 Korenta 2 - Yegɗohiŋ Muci

¹ Ineem weɗ tah ŋ ambiɗ ŋ haf fo ne ŋ heyɗi dokke ŋ ɗiskiŋ ɗu feeh in ci neɓaaɗiici reehɗi ɗah.

² Ŋ ɓek ɗu neɓaaɗi ɗah, a ya ɓa sumɗan ndo ? Ɗu ɓi ŋ ɓek neɓaaɗi e ?

³ Ineem weɗ tah ŋ fiissa ɗu kaɓɗohi mirndoh, ŋ sangee hay nga ɗu po ɗu kee so ɓeka neɓaaɗi, ɗu ɓi joyee so sumiɗ. Ɗu jen, wa wooriɗ to ne, ŋ sum ɗah ɗu sum.

⁴ Wi maa fiisee ɗu wa, ŋ fiisa ŋ tiis miskiɗ na keeñ reehiɗ, na muhun laayiɗ ; ŋ fiisɗaa ne ŋ ɓek ɗu neɓaaɗi, waaye ne ɗu inah waaɗi ŋ waaɗ ɗu, findi wa yakoh.

Pool ɗaasiɗ ɓoyi ɓekoh neɓaaɗi

⁵ Ɓoyi ɓekoh neɓaaɗi, a ɓek ko wa haa ; ŋ sang uupiɗ, waaye ŋ miniɗ woo ne, a ɓek ɗu wa jen.

⁶ Ini ɓi uup nga ɗu deg ɓoyeem, doyiɗ.

⁷ Tahha po ini ngisoh kotii, weɗ ne ɗu ɗaas ɗe te ɗu daliɗ heliŋ ɗe, ne a raakuu neɓaaɗiini a antalanɗi.

⁸ Mi yii kiim ɗu, teeɓaat ɗe ne ɗu waaɗiɗ ɗe.

⁹ Ŋ waaɗee ɗu nam markisuk, weɗ tah ŋ fiissa ɗu, ne ŋ inah andi ɗu hey yo kerhiɗe ŋ in nu nik.

¹⁰ Ɗu ɗaas ɓo' ɗah, ŋ ɗaas ɗe ; nik ne raakiɗ ini ŋ joyee ɗaasoh ɗah, ŋ ɗaasohiɗa saguuɗu ŋ fiki Kiristaani.

¹¹ Ŋ tum ineem ne ŋ onuu Seytaani waas nga ɓoo, laam ɓoo inhiɗ baahiɗ ini a waaɗ tum.

Pool ŋ Torowaas

¹² Wa ŋ kaɗ Torowaas ne ŋ woo Yegɗohiŋ Muci, wi kaɗ ŋ Kiristaani, ŋ hotiɗ ne Heɗi rangsiɗiɗ to bunta nga ne ŋ panguk.

¹³ Waaye heliŋ ngo daleeɗi, ŋ raakɗi ɓaah ɓoo Tit nga, weɗ tah ŋ askohha na ɓa, ŋ hayya Maseduwaan.

Ndami Kiristaani on ɓoo

¹⁴ Waaye, ɓoo corkiɗaat Kooh. A na gene ɓoo maaƴɗukoh ŋ mbehiŋ yakɗiŋ ndamiŋ ɗe ŋ niki ɓoo nik ŋ Kiristaani, te a taambohee nga ɓoo ne Kiristaani inhu ŋ ɗisik nu nik findi eeñ laackoloñ.

¹⁵ Ngaŋ Kooh, e ɓoo eeñɗiŋ Kiristaani, wa neɓiɗ findi laackoloñ. Ɓoo ɓii eeñ ɓi nik ŋ waasiŋ muci, na ɓi nik ŋ waasiŋ muuƴi.

¹⁶ Ŋ ɓum, ɓoo na ote kakaan, oti na ɓayee kaan ; ŋ ɓinooɓi, ɓoo na eeñe kipes, eeñi na ɓaye pes. A yi nde ɓo' min ineem ?

¹⁷ Ɓoo nak, ɓoo mandɗi na ɓi laayiɗ, ɓi tum woo kiŋ Kooh toontuk. Ŋ niki ɓoo nik ŋ Kiristaani, ɓoo na yegɗohe Woo ki na keeñ hooliɗ ŋ fiki Kooh, yi woos ɓoo.