2 Korenta 1 - Yegɗohiŋ Muci

Kañɗohi

¹ Mi yii kañɗis ɗu, ɗu ɓi Janguuniŋ Kooh nik ŋ Korenta na ɓooɓiŋ Kooh ŋ Akaay jen. Mi yi Pool, Apootariŋ Kiristaani Yeesu ŋ waaɗ-waaɗiŋ Kooh, ñam na fiisee ɗu kaytii, mi na ɓaah ɓoo Timoote.

² Kooh Baabiŋ ɓoo baahohaat ɗu, a on ɗu jam ; Yeesu Kiristaa Heɗi baahohaat ɗu, a on ɗu jam !

Giifɗiŋ miskiɗ ci

³ Kooh, yi nik Koohiŋ Heɗ ɓoo Yeesu Kiristaa, a nammba nik Baabiŋ ɗe, a yakɗaah, a yi Baabi, yi ɓooɓi jen na miske, Kooh yi na giifɗohe ŋ in nu nik.

⁴ A yi na giifɗe ɓoo ngaŋ miskiɗ ciŋ ɓoo jen ne ɓoo min giifiɗ ɓi nik ngaŋ miskiɗ nu nik ! Ŋ ineem ɓoo giifiɗ ɓa na giifɗi a giifɗoh ɓoo.

⁵ Findi miskiɗ ci ɓoo ɓaah na Kiristaani laayoh, giifɗi Kooh na giifɗe ɓoo taamboh ŋ Kiristaani laayoh ɗaa.

⁶ Ɓoo nik ŋ miskiɗ ɗah, ɓoo nik nga ne ɗu giifɗu, ɗu nam muc ; ɓoo giifɗu ɗah, wa giifɗohaa ɗu ne ɗu ndengɗuk, ɗu min muñ miskiɗ ciŋ ɗu mand na ciŋ ɓoo.

⁷ Te yaakaari ɓoo raak nga ɗu ndengiɗ, ɓoo inhiɗ ne findi ɗu na ɓaahohe ŋ miskiɗ ci, ɗu na ɓaahohe ɗaa ŋ giifɗi.

⁸ Kon ɓaah ciŋ ɓoo, ɓoo waaɗiɗ ne ɗu inah miskiɗ ci rahas ɓoo ŋ kur caŋ Asi : Ɓoo degseen miskiɗ keeh-keeh po ɓoo antalisseeɗi ca, ɓoo liiɓeeɗi sah ne ɓoo hey rise pes.

⁹ Ɓoo ambee ne sah ɓoo joy joy kaan ; ineem raakiɗ ne ɓoo oolkohuu haf ɓoo, ɓoo oolkoh Kooh yi na hultiɗe kaaniɗ ci.

¹⁰ A yi muciɗ ɓoo ŋ kakaan ki miskiɗeem, te a hey ɓoo mucɗisse. Ɓoo oolkiɗ ne a genan ɓoo muciɗ.

¹¹ Kiimi ɗu kiimɗee ɓoo Kooh nam ɓaah nga ; ŋ ineem, ɓo' laayiɗ kiimɗiɗ ɓoo, tahha po ɓo' laayiɗ hey corkiɗe Kooh ŋ baahohi a baahoh ɓoo.

Pool oorɗiɗ ɓaaɓiŋ ɗe Korenta

¹² Inii weɗ ɓoo na ndamkohe te liiɓ ciŋ ɓoo seede'iɗa, weɗ ne : Keeh na hool puloh ŋ Kooh, ceɗ ɓoo na pesohe na ɓi Adina, ɓoo na uupe ca pesoh na ɗu. Nikɗi haa ne wa ñaañi puloh ŋ ɓo' on ɓoo ineem, waaye wa baahohiŋ Kooh.

^13-14 Ɓoo na fiiseeɗi ɗu in wiiriis ɗal ini ɗu min jang te ɗu inaha. Raakiɗ ini ɗu camb inah, te ŋ liiɓiɗ ne ɗu heya inhe jen, weɗ ne ŋ mbehi Heɗ ɓoo Yeesu dokkohan, ɗu hey neɓse nga ɓoo, te ɓoo neɓu nga ɗu.

¹⁵ Ineem wooreen ndo, weɗ tah po ŋ ammba ne ŋ kockohan nga ɗu ne ɗu sum ŋ kot ci kanak ci ŋ raakan ndeem.

¹⁶ Weɗ ne ŋ waaɗeen taamboh nga ɗu ne ŋ hayee Maseduwaan ndii ɗah ; te ŋ namee wiiruk ɗah, ŋ taambis nga ɗu ne ɗu ɓaatɗoh ho ŋ ɓaaɓiŋ ngo ŋ waas Yudee.

¹⁷ Ɗu liiɓ ne wi ŋ woyee ŋ ɗooƴ co ne ineem weɗ maa hee tume, ŋ liiɓɗi liiɓɗi nga e ? Wala ɗu liiɓ ne ŋ raak liiɓohaaɗ ɓo' dong, po "ee"-iŋ ngo miniɗ nik "a'aa" ne ŋ tufuk ne ŋ tum in ɗah ?

¹⁸ Wa wooriɗ Kooh ne, woo ki ɓoo na woyee ɗu wa "ee" na "a'aa" haa.

¹⁹ Laam Kuɓkiŋ Kooh, Yeesu Kiristaa yi ɓoo woyee ɗu, mi na Silweng na Timoote, a "ee" na "a'aa" haa ; a moos nik "ee" dong.

²⁰ Te in ci Kooh gapoh, ini ca laay jen, ca "ee" ŋ Yeesu Kiristaa. Ineem weɗ nam tah po wa taamboh nga ɗe, ɓoo woyee "amiin" weɗ "ee", ne ɓoo yakiɗ Kooh.

²¹ A Kooh ambsoh ɓoo na ɗu, a ndengiɗta ɓoo ŋ Kiristaani, a degiɗ ɓoo ne ɓoo pangkiɗ ɗe.

²² A ñaassa ɓoo, a tummba Fuuɗsiŋ ɗe ŋ keeñ ciŋ ɓoo, ineem nikka firnde ne in ci a gap ɓoo jen, ɓoo hey ca rahse.

²³ Kon Kooh miniɗ to seede, ŋ lee ɗah, ŋ kaanaat : Ŋ sang ɗu ɓek miskiɗ weɗ tah ŋ hayisɗi Korenta poyi.

²⁴ Nikɗi haa ne ɓoo waaɗ ɗu deg yaah ŋ ini kaɗ ŋ kosiŋ ɗu laam ɗu ndengiɗ nga. Ɓoo kay, ɓoo na ɓaatɗohee ɗu ŋ sumiŋ ɗu.