1 Timoote 2 - Yegɗohiŋ Muci

Nakoh ci kaɗ ŋ findi ɓooɓi kiimohan Kooh

¹ Mbaa ini uup raak njiriñ, weɗ mi na hee woye paaɗ : Mi na ñaahohe ne ɓi Janguuni nik ŋ kiim Kooh, ɓa kiimee keeh-keeh wuu ɓooɓi jen, wa hun na corkiɗ Kooh.

² Ɓa kiimɗee buur ci na kilifaaciŋ kur ci jen ne ɓoo min raak kipes yeeɓkiɗ huniɗ na jam, ɓoo haɓɗee in yurhiɗ ŋ fiki Kooh, na mandohaaɗ baahiɗ keeh-keeh.

³ Ineem weɗ moɗ te weɗ neɓ Kooh Mucɗohiŋ ɓoo,

⁴ Kooh yi waaɗ ne ɓo' ci jen muc te ɓa kaɗ po ɓa min inah keeh ki.

⁵ Laam : A Kooh yino dong raak, te harmbanɗoh yino nam raak ŋ harmban Kooh na ɓo' ci. A Kiristaani Yeesu, te a ɓo',

⁶ yi eɗoh kiñin kiŋ ɗe haf ce ne a romkoh ɓo' ci jen. Ineem weɗ Kooh teeɓoh wi jamanooni a gapohee wa ree.

⁷ Ŋ pangkiŋ Kooh weem, a tummba so yegɗohoh na Apootar ne ŋ jangɗee ɓi nikɗi Yawuut kosi na keeh ki. Mi na woye keeh, ŋ leyɗi.

⁸ Mbaa ŋ waaɗ ne, ŋ ɗisik nu ɗu coh ɗah, ƴaar ci kiimee Kooh, ɓa raɗsee Kooh yaah hooliɗ, wa hunuu na ayruk na taastiɗoh.

Ini kaɗ ŋ ɓitiɓ ci

⁹ Ŋ namiɗ waaɗ ne ɓitiɓ ci liiɓ baahiɗ ŋ kulɓaaci ɓa na ɓekke, ɓa haɓɗukee na kulɓa yiwiɗ, eɗuuɗ cir. Ɓa haɓɗukuu haɓɗuk uupiɗ ŋ haf ciŋ ɓa, na urus ci wala per ci ɓa na tokke, na kulɓaaci na care kopor laayiɗ.

¹⁰ Waaye haɓɗukiŋ ɓa nikaat tum in baahiɗ findi ɓitɓi woo ne a nikiɗ Kooh.

¹¹ Ɓitiɓ joy joy kerhiɗ jangɗohoh ci, a jangee na yeeɓuk.

¹² Ŋ teyɗohɗi ɓitiɓ ne a jangɗohee wala a adgiɗ ƴaar ; a joy joy ɗek.

¹³ Laam, a Aadama ɗeɓ mahu, Aawa taammba nga.

¹⁴ Te a Aadama ñaañohu haa, a ɓitɓa a yi ñaañohu, a kerhiɗeeɗi Kooh, a keennda ŋ bakaaɗ.

¹⁵ Waaye raakiŋ ɓitiɓ ci kuɓu hondohɗi ɓa mucɗu ne ɓa ris kosiɗ Kooh, ɓa waaɗ ɗe, ɓa pesee pes hooliɗ wuu ce te peseem hun na amb haf ɓa ɗah.