1 Tessalonik 1 - Yegɗohiŋ Muci

Kañɗohi

¹ Mi yii kañiɗ ɗu, ɗu ɓi Janguuniŋ Tessalonik. Mi, Pool, na Silweng na Timoote, ɓoo ɓii kañiɗ ɗu, ɗu ɓi nik ŋ Kooh Baabi na Yeesu Kiristaa Heɗi. Baahohsaat, ɗu onu jam !

Kipes ki na kosiŋ ɓi Tessalonik

² Ɓoo na gene corkiɗ Kooh ŋ ini kaɗ nga ɗu jen ne ɓoo ɓaahndohha ɗu ŋ kiim ciŋ ɓoo ɗah.

³ Ŋ ineem, ɓoo na gene naandsuk ŋ fiki Kooh Baabi tumohaaɗ ciŋ ɗu sagu kosi ɗu kos Heɗ ɓoo Yeesu Kiristaa, na pangkiŋ ɗu miskiɗi sagu waaɗi ɗu waaɗ ɗe na mini ɗu min muñ sagu oolki ɗu ooluk in ci a gapoh.

⁴ Ɓaah ciŋ ɓoo, Kooh waaɗiɗ ɗu te ɓoo inhiɗ ne, a taniɗ ɗu, a tummba ɗu wuu ce.

⁵ Ɓoo inhiɗa, laam, wa ɓoo kom ɗu Yegɗohiŋ Muci, wa nikeeɗi woo dong, waaye wa namee hun na ɓaatɗohi na hatiliŋ Fuuɗsi Hoolohngaani, te ineem wooreen ɓoo keeh-keeh. Te ɗu inhiɗ findi ɓoo mandee ŋ harmban ɗu, wa nikee ini baah nga ɗu.

⁶ Ini kaɗ nga ɗu, ɗu taambɗiɗ kot ciŋ ɓoo na ciŋ Heɗi, ŋ teyɗuki ɗu teyɗuk woo kiŋ Kooh ŋ ɗooƴ miskiɗ laayiɗ ; Fuuɗsi Hoolohngaani sumɗukohha ɗu.

⁷ Ini ɗu tum weem, kosiɗ ciŋ Maseduwaan na Akaay jen miniɗ marak nga ɗu, ɓa taambiɗ ɗu.

⁸ Laam woo kiŋ Heɗi puloh nga ɗu kaɗta kur caŋ Maseduwaan na caŋ Akaay jen, waaye wa topɗi ndeem, kosiŋ ɗu Kooh reyiɗ ɗisik nu ɗisik. Wa kaɗiɗ po wa etohɗi sah ɓoo woyee ŋ ini kaɗ nga,

⁹ laam ɓooɓi jen ɓa ɗii laamtoh findi ɗu taambɗukoh ɓoo wi ɓoo hay nga ɗu, na findi ɗu faɗoh kooh ci nikaaɗiici, ɗu hayya ŋ Kooh, ne ɗu ñaamuk ɗe. A yi Koohi na pese, yi keeh-keehi.

¹⁰ Ɓa ɗi nam woo findi ɗu na sekohe Kuɓkiŋ ɗe pulohan Eel ci, yi a hultiɗ, Yeesu yi na mucɗe ɓoo ŋ ayruki na haye.