1 Saaŋ 4 - Yegɗohiŋ Muci

Findi Fuuɗsiŋ Kooh na inhisohse

¹ Ɓaah ciŋ ngo ŋ keeñkoh, kinaat kos ɓooɓi jen, ɓi na woye ne a Fuuɗsi Hoolohngaani na woyɗukohee ɓa ; markisaat ɓa baahiɗ po ɗu inah andi fuuɗsi na woyɗukohee ɓa puloh ŋ Kooh wala ; laam adinaani woti-woti, ɓo' laayiɗ na tume haf ɓa woosuuɗ te ɓa nikɗaa.

² Ɗu na hee inhisohe Fuuɗsiŋ Kooh an : Ɓo' nu woo jahran ne Yeesu Kiristaa hayiɗ na faan ɗah, ini woyɗukoh ɗe puloh ŋ Kooh ;

³ te waa nu teyɗukɗi Yeesu yeem ɗah, wa pulohɗi ŋ Kooh, waaye wa liiɓiŋ sangiɗiŋ Kiristaani ; ɗu kerheen ne wa ɗii hay te ɗiski wa nik, wa ɗii ŋ Adina.

⁴ Ɗu ɓi kuɓuuciŋ ngo, ɗu ɓaah ŋ Kooh, te ɓooɓi tum haf ɓa woosuuɗ ɓeem, e ɗu saah ɓa, laam Yi nik nga ɗu a yi uup yak yi nik ŋ Adina.

⁵ Ɓeɗ, ɓa ɓaah ŋ Adina ; weɗ tah woo kiŋ ɓa woo Adina te ɓi Adina ɓa ɗii sikɗuk ɓa.

⁶ Ɓoo nak, ɓoo ɓaah ŋ Kooh ; ɓo' nu inah Kooh ɗah na sikɗuke ɓoo sikɗuk ; yi ɓaahɗi ŋ Kooh, na sikɗukeeɗi ɓoo. Ɓoo na inhisohe Fuuɗsiŋ keeh ki na wi na muuƴɗohe ɗaa.

Waaɗohiŋ Kooh

⁷ Ɓaah ciŋ ngo ŋ keeñkoh, ɓoo waaɗtiɗohaat ŋ harmban ɓoo ; laam waaɗoh puloh ŋ Kooh, te ɓo' nu waaɗ morom ce ɗah, a rimkoh ŋ Kooh te a inhiɗ Kooh.

⁸ Ɓo' nu waaɗɗi morom ce ɗah, a moosɗi inhoh Kooh, laam Kooh, a waaɗoh.

⁹ Kooh teeɓohiɗ waaɗi a waaɗ ɓoo ŋ inii : Woosi a woos Kuɓkiŋ ɗe yino-kongi ŋ Adina ne ɓoo pes taamboh nga ɗe.

¹⁰ Te waaɗoheem nikɗi haa ne e ɓoo waaɗ Kooh, waaye a yi waaɗ ɓoo te a woossa Kuɓkiŋ ɗe ne a nik seeƴkaahi nihsan bakaaɗ ciŋ ɓoo.

¹¹ Ɓaah ciŋ ngo ŋ keeñkoh, Kooh waaɗiɗ ɓoo waaɗeem jen, mbaa, ɓoo joyiɗ nam waaɗtiɗoh ŋ harmban ɓoo.

¹² Ali ɓo' hotohɗi Kooh. Waaye ɓoo waaɗtiɗoh ŋ harmban ɓoo ɗah, a genan nga ɓoo, te waaɗohiŋ ɗe hey mite nga ɓoo.

¹³ Inii weɗ na inhiɗe ɓoo ne ɓoo gen ŋ Kooh, te a gen nga ɓoo : eɗi a eɗ ɓoo Fuuɗsiŋ ɗe.

¹⁴ Ɓoo hotiɗ ne Baabi a yi woos Kuɓki ne a nik Mucɗohiŋ Adina te ɓoo ɓii seede wa.

¹⁵ Ɓo' nu woo jahran ne Yeesu a yi Kuɓkiŋ Kooh ɗah, Kooh gen nga ɗe, te a gen ŋ Kooh.

¹⁶ Te ɓoo inhiɗ waaɗi Kooh waaɗ ɓoo, te ɓoo kosiɗa. Kooh, a waaɗoh, te ɓo' nu gen ŋ waaɗoh ɗah, a gen ŋ Kooh, Kooh gen nga ɗe.

¹⁷ Waaɗohi mitiɗ ŋ ɗooƴ ɓoo ŋ raaki ɓoo raak hel daliɗ ŋ mbehaŋ atteena, laam findi a mand, ɓoo mand ɗaa ŋ adinaanii.

¹⁸ Waaɗoh hunɗi na neƴƴoh, waaɗoh keeh-keeh na aañe aañ neƴƴoh, laam neƴƴoh na seke mbugal, kon ɓoyi neƴƴoh, waaɗoh mitɗi nga ɗe.

¹⁹ Ini kaɗ nga ɓoo nak, a yi koc waaɗ ɓoo, weɗ tah ɓoo waaɗiɗ ɗe.

²⁰ Ɓo' woo ne a waaɗiɗ Kooh, te a sang morom ce ɗah, a leyoh ; ɓo' nu waaɗɗi morom ce yi a na hote ɗah, a minɗi waaɗ Kooh yi a hotɗi.

²¹ Te ɓoo rahsoh nakohii nga ɗe an : « Yaa nu waaɗ Kooh ɗah, a namaat waaɗ ɓaah ce. »