Zabur 2 - Yiqsum

Allahee gixhxhına paççah

¹ Nişil-allane milletbı g'elil qeedaxhe? Nişil-allane manbışe cosse dəxəsde karbışda haa'a?

² Ç'iyene aq'valin paççahar, vuk'lek vukkekkanbı, Rəbbilqayiy Mang'vee g'əyxı'ng'ulqa, paççahılqa, g'elil qeebaxhe.

³ Manbışe eyhen: «Qudoora, Manbışda xamut qakkyaahas, şalin Manbışin zincirbı qoda'as!»

⁴ Xəybışee taxtıl Gyu'uriyng'vee əqəna ha'as, Xudaavandee manbı matsxara haa'as.

⁵ Qiyğa Mang'vee qəlın eyhesın. Manbıb Mang'une it'umne qəlıle qəvəəq'ənasınbı.

⁶ Mang'vee eyhen: «Zı Yizda paççah muq'addasne suval Sionul gi'ı».

⁷ [Paççahee eyhen:] Rəbbee uvhuyn zı şolqa hixhar ha'asın. Rəbbee zak'le uvhuyn: «Ğu Yizda dix vor, Zake g'iyna Vas dek ıxha.

⁸ Zake heqqe, Zı vas gırgıne gahbışis milletbıyiy ç'iyeyn aq'va ç'əvxhesmeen gırgın cigabı Vas heles.

⁹ Ğu manbışikın yivayne əsaaka ha'as, G'ı'bı'ne nyuq'vneke hı'iyn g'ab xhinnee xüvə-xüvəna qaa'as».

¹⁰ Həşdiyle, paççahar, ək'elika vuxhe! Ç'iyene aq'valin haakimar, dars aleet'e!

¹¹ Rəbbile qəpq'ı'n Mang'us g'ullux hee'e! Qəvəq'neb, şadeepxheb.

¹² Allahne dixes, paççahıs, qəl mooxhecenva hı'rmat givxhe. Deşxheene, mang'una qəl zarabacab ts'ayılqa sapk'ıl, şokunud şu avquyne yəqqə ixhesın. Mang'ulqa yı'q' qizzıriynbı nimee baxtivarbayiy!