Mə'əllim 2 - Yiqsum

Yik'eençe ıkkanan karıd q'əran vuççud deşin kar vodun

¹ Zı zak'lecad uvhuyn: «Qoralan, zas yik'eençe ıkkanan karbı hı'ı, gırgınçike kef qığahas». Manıd q'əran vuççud deşin kar vodun.

² Əqənayne hək'ee zı uvhuyn: «Bəç'əriyvalla!» Yik'eençe ıkkanne karbışded hək'ee zı uvhuyn: «Mançike hucoona hiyxhar?»

³ Zas ıkkiykınin yizda ək'el zalynang'a çaxır ulyodğu, bəç'əriyvallabı ats'axhxhes. Məxüd zas ats'axhxhesniy ıkkan, xəək avub sık'ınne gahıs huvuyne ı'mree, nişiniy insanaaşin yik'bı aaqa.

⁴ Zı ç'ak'ın işbı g'acu: zas xaybı ali'ı, t'ımıllığbı ezu,

⁵ bağbı, park'bı atçu, caa'ad gırgın meyvabı ezu.

⁶ Park'bışeene yivaaşis xhyan heles ixhecenva xhinen golerıd hı'ı.

⁷ Həmbal adameriy həmbal zəiyfabı alivşu, zaqa, manbışileb ğayrı, yizde xaa yedike vuxhayn həmbalarıb vuxhaynbı. Çavra-vəq'əd zaqa zale ögee İyerusalimee vuxhayne gırgıng'ule geedniy vod.

⁸ Zasın k'ınəəğəyiy nuk'ra paççahaaşineyiy vilayatbışde xazinaabışeençe sı'ı. Zas mə'niybı qətqəsın adameriy zəiyfabı ablyav'u. Adameeşis vukkiykanan nekke micagın zəiyfabıb geeb qav'u.

⁹ Zı məxür zale ögiyl İyerusalim vuxhaynbışiler karnana, qıvaats'ına ıxha. Mane gahılib yizda k'orana ək'el zalycab vuxha.

¹⁰ Yizde ules ıkkiykınin zı zale qiykkın deş. Yizde yik'es ıkkanan zı gırgın hı'iyn. Man ha'an gırgın yizde yik'eençe ıxha. Mana zı qorxuna hək' vuxha.

¹¹ Zı qorxunne, yizde xılen g'acuyne işbışiqa sak'ı ilyakkımee, man gırgın q'əran vuççud deşin kar vodva zak'le ats'axhxhayn. Man mıtsıqa qihna g'adarxhuniyk akar. Xəək avud nişikecad vuççud hiyxhar deş.

«K'orana ək'elynanar bəç'ər xhinnecar qek'anacar»

¹² Qiyğa zı k'orane ək'eline, bəç'əriyvaline, beynyavaline hək'ee fıkır opxhun. Menne qalesde paççahısse nen medın ine paççahee hidi'iyn işbı g'aces əxəyee?

¹³ Zalqa hitxhıriyn, nəxüdiy işix miç'axiyvalile yugda, məxbıb k'orana ək'el beynavavalile yugba vob.

¹⁴ K'orana ək'elynang'uk'le vuc nyaqa ark'ıniy yugda g'ece, bəç'ərme miç'axiyvalee iliyk'ar axva. Zak'leme q'öng'ünesanad vuk'lelqa sa kar qales ıxhay ats'an.

¹⁵ Zı zak'lecad uvhuyn: «Yizded vuk'lelqa bəç'ərne vuk'lelqa qöön qales. Manke zas nişistannane yizda k'orana ək'el?» Mançil-allad, zı zaled-alqa uvhuyn: «Manıd q'əran vuççud deşin kar vodun».

¹⁶ K'orana ək'elynanar, bəç'ər xhinne geer gahna yik'el aqqas deş. Manbışda q'öyursana zarabacab yik'el hivxanasınbı. K'orana ək'elynanar bəç'ər xhinnecar qek'anacar!

İnsanee ha'an gırgın q'əran vuççud deşin kar vod

¹⁷ I'mırıb zas g'umooce quvxha. Xəək avud ha'an gırgın kar zas qəla qıxha. Man gırgın q'əran vuççud deşin kar vodun. Man mıtsıqa qihna g'adarxhuniyk akar.

¹⁸ Zı verığık avud qorxu hı'iyn gırgın kar zas g'ımece qıxha. Zı hı'iyn gırgın kar zale qiyğa qalesıng'us axvas.

¹⁹ Şavuk'lene ats'a, mana ək'elikaname, bəç'ərme ixhes? Zı verığık avud k'orane ək'elikayiy qorxuyka hı'iyn karbı mang'une xılyaqa ılğeeç'es. Manıd q'əran vuççud deşin kar vodun.

²⁰ Mançil-allad verığık avud qorxuyka ha'ane gırgıne karbışike zı mık'a qıxha.

²¹ Sang'vee k'orane ək'elika, ats'alika, yik'eençe hı'iyn kar, nekke qiyğa t'ubcab ı'ğviykar hidyav'une insanıs g'aleççes gexha. Manıd q'əran vuççud deşin kariy xəbna ver vobna!

²² İnsanıs verığık avur qorxuyke, yik' gyotxhuniyke hucoona hiyxhar?

²³ Gırgıne gahbışil mang'vee aq'va qa'a, derd ts'ıts'aa'a. Xəmder fıkren mana arğançe orxhan eyxhe. Manıd q'əran vuççud deşin kar vodun.

Şadvalla Allahıke vob

²⁴ İnsannemee inekke yugun otxhun-ulyodğuyiy sayid cune qorxuyke kef qığavhiy vodun. Zak'le g'acuyn man gırgın helenar Allah vorna.

²⁵ Mana dena şavusse oxhanas, yik' cigeeqa qalya'as əxəyee?

²⁶ Allahee Cune ulen aqqıyng'us k'orana ək'el, ats'al, şadvalla hoole. Bınahbınang'usme kar sa'asda əq'üba hoole, qiyğale xhinne Cune ulen aqqıyng'us helesva. Manıd q'əran vuççud deşin kar vodun, mıtsıqab qihna g'adapxhıniyk akar.