Mə'əllim 11 - Yiqsum

İnsanaaşik'le vuk'lelqa qalesın ats'a deş

¹ Yiğın gıney xhinel ooqa g'aykke, xılece gah ılğevç'uyle qiyğa, vak'le man meed aveykesın.

² Yighneyee, molyneyee insanıs vaqa vodunçike pay hevle. Vak'le ölkayne vuk'lelqa ablesda verıb vaats'a deş.

³ Buludbı xhineka gyatsts'ı ixhee, mançin ç'iyene aq'valqa gyoğiy gikkas. Yiv canubulqayee, şimalılqayee hı'ğəpkıree, mane qukk'yopk'ulne cigeeyib aaxvasda.

⁴ Mıtsıqa ilyakkang'vee toxum üvxüyxəna deş. Buludbışiqa ilyakkang'ussed ezuyn qiyşalas əxəs deş.

⁵ Vak'le mıtsın yəqbı ats'a deş, vuxhnene zəiyfayne vuxhne nəxüdiy bark'vbıd ç'ak'ı qeetxhay şavuk'lecad ats'a deş. Məxı'dıd vas gırgın itxhınne Allahne işbışike xabar deş.

⁶ Toxum miç'eeb üvxe, exhalilqameeyid xıleppı iş dena g'ılyma'a. Vak'le ats'a deş inme, şenme şagav yugda ixhes, deşxheene, q'öyudsaname yugda ixhes.

Ğu İrxhınna yik'el hixan hıma'a

⁷ Hək'edad işix micagda vod, verığ g'avciy uleppışisqa yugba qöö.

⁸ İnsanee xıliyna ı'mı'r haa'axhee, hasre şadba hee'ecen. Pisın yiğbı ıxhayid yik'el hixan hıma'acen, pisın yiğbı geedbı ixhes. Vuk'lelqa qalesın gırgın kar q'əran vuççud deşin kar vod.

⁹ Şadxhe mek'vna, nimeeletteyiy mek'vra. Mek'vranang'a yiğın yik' şade'e. Yik'es ıkkanne, uleppışik'le g'ecene cigeeqa hoora. Vak'le manıd ats'axhxhe, mane gırgınçil-alla Allahee ğu məhkameeqa ts'ıts'a'as.

¹⁰ Mançil-allad aq'va qıma'a, ık'arbı vake əq'əna hee'e. Mek'vallab, mek'valeena gucub ıxha-ayk'anne booğak akar.