Mə'əllim 10 - Yiqsum

K'orane ək'elikan uvhiybı

¹ Sa qivk'uyne xı'nit'iyn yugne ətirıkın ha'an. Həməxdıd k'ınne bəç'əriyvalin k'orane ək'elikıniy hı'rmatıkın ha'an.

² K'orane ək'elynane insanne yik'en qorkune suralqa ts'ıts'a'a, bəç'ər insanneme yik'en quç'orkune.

³ Mang'una bəç'əriyvalla yəq' əlyhəəng'əb vaats'a vooxhena. Gırgıng'uk'le mana nimee bəç'ər ıxhay g'ecen.

⁴ Xərıng'una valqa qəl avqee, himexva. Cusse vuc aqqas əxəng'une geebne bınahbışike ılyheebaç'enbı.

⁵ Xəək avub zak'le sa mebna verıb g'avcuna: qotkuda hidi'iyn kar cuke paççahıke vodun.

⁶ Ək'el deşinbı ç'ak'ıne işbışilqa giviyxhe, karnanbışeme avudun cigabı aqqaqqa.

⁷ Zak'le nukarar balkanıl oo, ç'ak'ınbıb nukarar xhinne iviykar əlyhəə g'avcu.

⁸ Xandak' ilyviyk'arna xandak'eeqa k'eyxhas əxə. Çabır qoytalang'ukub xoçe üvxəs vəəxə.

⁹ G'aye gyabaxanar g'ayeysse qoxa'as əxə. Os qaxanar osasse qoxa'as əxə.

¹⁰ Yak'v ek'da deşxhee, man ek'a'asıd hidevuxheene, mançis geeb guc əlyhəəs. K'orane ək'elisseme man kar qa'as əxə.

¹¹ Xoçe avqas vəəxəna ayresse xoçe üvxee, mana nişiscarne qoyt'al.

¹² K'orane ək'elynane insanne ghalençe yugun cuvabxhe qığeç'en. Ək'el deşing'une mizenmee mang'ukun ha'anxhe.

¹³ Mang'un yuşan hı'iyid ək'el deşvalika giyğal. Yuşan hı'iyid xənne bəç'əriyvalika ç'əvexhe.

¹⁴ Ək'el deşda insan geerxhe yuşan ha'ana. Şavuk'lecadıd vuk'lelqa qalesın ats'a deş. Şavusse cule qiyğa hucoo ixhesınçina eyhes əxəyee?

¹⁵ Ək'el deşinbışe ts'ıts'av'uyne əq'übayn, cocab oozar haa'a. Manbışik'le şaharılqa əlyhəəna yəqı'b vaats'a deş.

¹⁶ Yiğna paççah nukaraaşine nasılınaxheene, ç'ak'ınbıb miç'eeb çakba, otxhan-ulyoğa giviyğalxhee, ölka, vay vak ixhesın!

¹⁷ Yiğna paççah qıvaats'ıyne nasılınaxheene, ç'ak'ınbışed çine gahıl, ulyoğasva deş, guc saa'asva otxhanxhee, ölka, vaqa yugun yiğbı ixhes!

¹⁸ İnsan tambalraxhee, mang'una daxaxhe giviy'arna. Nenacab iş g'idevceene, xaane daxayle xhyan k'yak'anas.

¹⁹ Otxhun-ulyodğuy yik'es ıkkanva ha'a, çaxıren ı'mı'res rang hele. Pılınmee vas ıkkanan gırgın ha'an.

²⁰ Paççahıqa yik'eeyid humoka, karnane insanne hək'ee ğu g'ılexhane cigeeyid pisın immeyhe. Xəə ileedaxvane şit'yaaşe xabar vukkees, mançisse ğu uvhuyn cuvab hixhar ha'as əxə.