ZEPHANIA 1 - AMÜSÜH HÜM CL Bible (BSI)

¹ Judarü Amon tsührü kiulongthsüpuh Josia nimungbo ching, Hezekia tsührü Amaria tsührü Gedalia tsührü Kushi tsührü Zephania kilim arükhi Atungpuh yu.

Atungpuh Mahkhap Nimung

² Inü alomi chingnü lüpdükhi shahde phüta bahbah, Atungpuhnü thachoh.

³ Inü mihtsürübo tüsho shiwühbo phüta bahbah; inü thüning wuhnubo tüsho keto ngühbo phüta bahbah. Inü mihbukmuyuk jing mükheshihbah. Inü mihtsürübo alomi chingnü akheamshihbah, Atungpuhnü thachoh.

⁴ Inü Juda tüsho Jirusalem ching larü alala azhihde I khah chungkihbah; tüsho inü ha dangpung chingnü Baal kingaünrü aningkhibo tüsho müzammüram amükinrü amükeamrü mungbo dükheakshihbah;

⁵ sherünü thüyam kumung kheaknü chiningbo ki khukningcho; sherünü khukningcho tüsho Atungpuh ki thiyuchihchimcho, tüsho Molek thrünpuh mung ching she thiyuchihchimcho;

⁶ sherü Atungpuh yankhi chingnü rholode, shepünü Atungpuh müyim yungsho api ki mükeokhide la.

⁷ Atungpuh Thrünpuh miki zhikde laang! Tümüde Atungpuh nimung khah ki lah; Atungpuhnü shuhmülanga jihpü thsakhamlah; apinü api hanrübo jiyukdo.

⁸ Tüsho Atungpuhnü shuhmülanga jihkhi nimung inü atorübo le kiulongthsüpuh tsührübo tüsho khiungkerü khimmih yihrü alala thsümüchibah.

⁹ Ju nimung inü amükinrü nangde kingaünrü, sherünü arü putungrü yam athsümünim tüsho rük mütsünü mishihchonü arü thsümüchibah.

¹⁰ Atungpuhnü thachoh, ju nimung Thüngüh Ripit chingnü azhikhi khülang, kiuto dangpung aso chingnü mitripkhi tüsho awungbo chingnü akeamkhi düsheak ato sobah.

¹¹ Mortar ching larü tüzhochoh, tümüde shothsümolorü alala dükheakdo; shotoyinchi adünrü alala mülatsan.

¹² Ju kim ching inü tsünpungbo shuhbah Jirusalem yimbah, tüsho nihbuh kheak reangkeamrü tüsho mulongramrü mihtsürü thsümüchibah, sherünü arü mulong ching thacho, “Atungpuhnü atsü yungsho amütsü she mürhimo.”

¹³ Arü lakhit yankhia lubah, tüsho arü yambo thsümünimbah. Arünü thüyambo thsüthsü she, arünü jurü ching müla; arünü kurungasolu thsüthsü she, arünü jurü chingnü yukhu muyung.

¹⁴ Atungpuh nimung ato thüninde lah, thüninde tüsho niokheamde arado; Atungpuh nimung düsheak ju akhüh lah, ju ching thirithsürünü tode zhichoh.

¹⁵ Ju nimung ju mulong zhipzhip nimung, lümthsünü tüsho thsünü labah, athsümünim tüsho abahyukkhi nimung, amiting tüsho akhüpdokhi nimung, amo-khüpkhi tüsho kheahde amitingkhi nimung labah,

¹⁶ chipi ayünkhi kiutobo tüsho amühit aheangpungbo azhihde hulipungpung mütkhi tüsho keochihde azhikhi nimung labah.

¹⁷ Inü hadürü lümthsünü mihtsürübo kheak handarübah, junangde arübo müktukrü nangde atsahbah; tümütüsho arünü Atungpuh azhihde neak yihbeakkhinü, arü thiyih ke nangde abukkhitbah, tüsho arü shih müneanmuru mujung nangde alabah.

¹⁸ Atungpuh bukakhiuk nimung ching arü shotoyinchi yungsho sunanü arü mükhümkhitkhuk; api mükthsü mo ching alomiküp athrünkhi aniuabahbah, tümüde apinü alomi ching larü alala zukleangnü akheamshihbah.