ZEKARIA 4 - AMÜSÜH HÜM CL Bible (BSI)

Tsünpung-zopung Michih

¹ I ki asukachihbuh yunirünü kheaküshe arü, tüsho khürü ayapkhi chingnü yihmusukhi nangde I yihmusu.

² Apinü I ki tha, “ Nünü tümü ngücho?” Tüsho inü alo, “ Inü sunanü athsükhi khülang, aku kheak phurusük kihbah ngüchoh; ju kheak tsünpung thüne lah, tsünpung aban aku kheak hühpung kihlah.

³ Tüsho ju ki oliv sangdung mahne lah, khülang ju phurusük tsülim peang tüsho püpü ju huzulim lah.”

⁴ Inü I ki asukachihbuh yunirü ki tha, “ I tungpuh, harü ha tümü a?”

⁵ Judüki I ki asukachihbuh yunirünü I ki keo, “Harü tümüanü nünü mümükheah de?” Inü alo, “ I tungpuh, mümükheah.”

⁶ Apinü I ki tha, “Ha Zerubbabel ki Atungpuh yu lah: ‘ Sühmühnü yung yungsho wunü yung, tüshe me hode lah,’ Wuto Atungpuhnü thachoh.

⁷ Nü she a, O müzüng ato? Zerubbabel miki nü adükhün kambah; tüsho nünü amükham-lung yukchoki mihtsürübonü azhibah, ‘ Akhamlah, akhamlah!’ ”

⁸ Kheaküshe Atungpuh yu I ki thade arü,

⁹ “Zerubbabel khahbonü ha yam khimtan thsüdo; api khahbonü ju she athsükhibah. Judüki Wuto Atungpuhnü I nüsa kilim thiyikheah de nüsanü amükheahbah.

¹⁰ Tümüde sherünü anükhüh lang arhimokhi nimung mükhemükimkheanü asühachihbah, tüsho Zerubbabel khah ching akeara-liu ngübah. “Harü thüne ha alomi athrünkhi ngükhi Atungpuh mükbo lah.”

¹¹ Judüki inü api ki tha, “Harü oliv sangdung mahne tsünpung-zopung tsülim tüsho huzulim lakhi ha tümü a?”

¹² Tüsho mahne kipü inü api ki tha, “Suna hühpung mahne chingnü abukkhitkhi müdangke, oliv sangdung khah mahne ha tümü a?”

¹³ Apinü I ki keo, “Harü tümüanü nünü mümükheah de?” Inü alo, “ I tungpuh, mümükheah.”

¹⁴ Jushu apinü tha, “Hane ha alomi athrünkhi Tungpuh ki zhiprü mujude-mokhitkhi ah.”