ZEKARIA 2 - AMÜSÜH HÜM CL Bible (BSI)

Akebe-liu Michih

¹ Inü abinkih-a kheah tüsho mihtsürü khülang akhah ching akebe-liu shuhbah ngü.

² Inü keokhi, “ Nü külim yücho?” Apinü I ki alo, “Jirusalem akepü, atolim tüsho ayunglim kheahpü.”

³ Judüki I ki asukachihbuh yunirü ju tsoabah, tüsho püpü yunirü api shorupü arü,

⁴ tüsho api ki tha, “Alihang, ju athrününgtsüng mihtsürü ki thaang: Jirusalem ju mihtsürü tüsho shiwüh hihkhinü chipi mayündoride alabah.

⁵ Tümüde ju alala mükamde I ju mo chipi labah, Atungpuhnü thachoh, tüsho ju ching I müretahkhi labah.”

Ramtsorü Thüyam lim Arüpü Jikhi

⁶ Wusuang, Wusuang! Dukulim lomi chingnü tsoang, Atungpuhnü thachoh; tümüde thüning lim pung phüyi nangde inü khiungke lim nüsa hiumüzütshih, Atungpuhnü thachoh.

⁷ Wusuang! Nüsa Babilon ching larübo, Zion lim tsoang.

⁸ Sherünü nüsa shikchonü I ki khide shoto lakhi shikchoh. Jumonü api mihtsürü yankhia lurü trükshihbo thsungkheak ha yusheak hanbah I arüshih:

⁹ Kheakü kheahang, inü arü azhihde I khah shuhkihbah, tüsho arübo ju arü nihbuh azhorübonü yankhia lupü kambah. Judüki Wuto Atungpuhnü thiyido de nüsanü mükheahbah.

¹⁰ Khün thsüang tüsho asühachihang, O Zion! Tümüde kheahang, I arübah tüsho nüsa bolung labah, Atungpuhnü thachoh.

¹¹ Trükshih ahihdonü ju nimung Atungpuh lung bebah, tüsho I mihtsürü thsübah; tüsho I nüsa bolung labah. Tüsho Wuto Atungpuhnü I nüsa kilim thiyido de nüsanü mükheahbah.

¹² Atungpuhnü Juda ju amüsüh lomi ching api shihcham thsüde yamrüplurüp lubah, tüsho Jirusalem mokhitlobah.

¹³ Mihtsürü alala Atungpuh miki zhikde laang; tümüde api amüsüh lapung chingnü api arüchoh.