ZEKARIA 13 - AMÜSÜH HÜM CL Bible (BSI)

¹ Ju nimung David yamkhün tüsho Jirusalem ching larü thsungkheak arü neak tüsho mümüsühkhi chingnü arü müsühkhitpü kenü khülang yahshungbah.

² Wuto Atungpuhnü thachoh, ju nimung inü lomi chingnü sangthsübo mung dükheakshihbah, junangde kheaküa arü mülümkhit; tüsho inü lomi chingnü wukihrübo le mümüsühkhi me yihkhitbah.

³ Tüsho mürangkhüh wukihrü khürü akhiuksho, arü abuh tüsho arü zübekhi berübonü athabah, “ Nü ashebah, tümüde nünü Atungpuh mung ching akeangyu asukchoh;” tüsho arü züberü arü abuh tüsho berübonü arünü müchitchoki arü chinkhitshihbah.

⁴ Ju nimung wukihrübo ju arünü müchitchoki mihbüm aban nihbuh michih dünkheak achihbah; arünü mülapyukpü thsüde anamkihkhi khim müyih,

⁵ tüshe arü abannü athabah, “ I wukihrü yung, I thulu thsürü khülang ah; tümüde I rhangdung amuyung thulu thsüde arükheah.”

⁶ Tüsho khürünü api ki, “ Nü khüh kheak ha tümü mübo a le?” de thasho, apinü alobah, “ I müyamrübo yam chingnü ayihkhukkhi mübo ah.”

Thrünpuh Namfimihnu Neakrü Laksahpü Thiyukhüm

⁷ “ O nukshang, I yo namfimihnu neakrü azhihde asürang, I lung larü mihtsürü azhihde,” Wuto Atungpuhnü thachoh. Namfimihnu neakrü shikang, junangde namfimihnubo hiumüzütbah; inü aninibo azhihde I khah rholobah.

⁸ Lomi athrünkhi ching, Atungpuhnü thachoh, shihcham mahsam ching mahne shekhambah, tüsho shihchamkhüh labah.

⁹ Tüsho ha shihchamkhüh ju inü mo ching yukbah, khürünü shotoyinchi changkhitkhi nangde arü changkhitbah, tüsho suna taka kheahkhi nangde arü taka kheahbah. Arünü I mung jibah, tüsho inü arü ki alobah. Inü athabah, “Arü I mihtsürü ah;” tüsho arünü athabah, “Atungpuh ju isa Thrünpuh.”