ZEKARIA 12 - AMÜSÜH HÜM CL Bible (BSI)

Arübe ching Jirusalem Bekhitpü

¹ Müchityu khülang. Israel dünkheak Atungpuh yu: Atungpuhnü ha thachoh, shepünü thüningbo thoshang tüsho alomi khimtan tüsho ju ching mihtsürü kheak me lashih:

² Kheahang, inü Jirusalem ju mühi mihtsürü alala thsungkheaknü amüshangbe pung khülang kamshihpü lah; Jirusalem yanchoki Juda she ayanbah.

³ Ju nimung mihtsürü alala thsungkheak inü Jirusalem ju lung amülang kamshihbah; ha shuhkihrü alala nihbuh zangrü khitode ayuribah. Tüsho lomi trükshih alalanü rukhüh thsübah ha azhihde arübah.

⁴ Atungpuhnü thachoh, ju nimung khora aban thsününü tüsho aberübo ayingyingkhinü ashikbah. Tüshe inü mihtsürübo khora aban kheak mük tukshihchoki, inü Juda yamkhün kheak a mürüngkihde kheahde alabah.

⁵ Judüki Juda gukbonü arü mulong ching thabah, “Jirusalem ching larü a Wuto Atungpuh arü Thrünpuh hode sühmüh lah.”

⁶ Ju nimung ching inü Juda gukbo ju sangrhungkihkhi kheak mophüh nangde, hineang bolung motru nangde akamshihbah; tüsho arünü tsülim tüsho huzulim mükamde alakhi mihtsürübo aniubah, judüki Jirusalem a anihbe lapung ching lalobah.

⁷ Tüsho Atungpuhnü akhuhde Juda lapungbo kilim akukkhi jihbah, junangde David yamkhün müretah tüsho Jirusalem ching lakhi müretah ju Juda kumung kheak atobe müla.

⁸ Ju nimung ching Atungpuhnü Jirusalem ching larü tsungdobah, junangde arü bolung sühmüh mülarü ju nimung David nangde alabah, tüsho David yamkhün ju arü müngüh Atungpuh yunirü nangde Thrünpuh ruk labah.

⁹ Tüsho ju nimung Jirusalem azhihde arükhi trükshih alala dükheakshihpü inü ayimbah.

¹⁰ Tüsho inü I mihmuzho tüsho amushukhi me khülang David yamkhün tüsho Jirusalem ching larü kheak dungkihbah; junangde arü achinkhitshihkhi khürü kheak kheahchoki, arünü api thsungkheak khürünü tsührü khülang lang alakhi thsungkheak tüzhokhi nangde atüzhobah tüsho adüjirü kurungkheak mitripkhi nangde düsüknimde atripbah.

¹¹ Ju nimung Jirusalem ching tüzhokhi ju Megiddo dükhün ching Hadad-rimmon thsungkheak tüzhokhi ruk tode alabah.

¹² Lomi ching, yamkhün abannü nihbuh zangrü tüzhobah; David yamkhün betsührü tüsho arü niuberübo; Nathan yamkhün betsührü tüsho arü niuberübo;

¹³ Levi yamkhün betsührü tüsho arü niuberübo; Shimeirü yamkhün tüsho arü niuberübo;

¹⁴ tüsho aningkhi betsührü alala, tüsho arü niuberübo.