ZEKARIA 10 - AMÜSÜH HÜM CL Bible (BSI)

Atungpuhnü Bekhitpü Alokhikhi

¹ Atungpuh , chinthrüm mo thsübuh ki mükheankim tsüng akheahmünchi ching kheangang. Apinü mihtsürü kilim tsüng arüshihchoh, tüsho mihbüm aban kilim thulu sangrungbo jihchoh.

² Tümüde sangthsübonü akeangyu thachoh; tüsho müchitrünü akeangyu ngüchoh; milim-mirünü akeangyu michoh, tüsho akeangkeang ching mulong shukheamchoh. Jumonü mihtsürübo ju namfimihnu nangde rümde tsahchoh; arübo aneakrü mülakhinü küpkhukchoh.

³ Namfimihnu neakrübo kheak I bukakhiukkhi takde lah, tüsho inü limberübo thsümüchibah; tümüde Wuto Atungpuhnü api mihnu boto, Juda yamkhün kümchoh, tüsho apinü arübo kükheangkhi thirithsü khora nangde kamshihbah.

⁴ Arü bolung chingnü amühit-lung arübah, arü bolungnü khimyam ashungdung labah, arü bolungnü keochih sanglüh labah, arü bolungnü limthorü labah.

⁵ Arü thsürubah keochih ching thirithsürü nangde, kiudunglimrobo akhimniuhniuh ching thiriri thrümbah; arünü keochihbah, tümüde Atungpuh arü lung lah, tüsho arünü khora kheak binrübo achih ngüshihbah.

⁶ Inü Juda yamkhün düküngde akamshihbah, tüsho Josep yamkhün inü khümkhitbah. Inü arü belode arübah, tümütüsho arü kheak I muzhokhi lah, tüsho arü ju inü mübahyukkhi nangde alabah; tümüde I ju Atungpuh arü Thrünpuh tüsho inü arü ki alojihbah.

⁷ Judüki Ephraim mihtsürübo ju thirithsürü nangde akambah, tüsho arü mulongbo ju yukhu yungkhi nangde asühbah. Arü tsührübonü ju ngübah tüsho asühachihbah, arü mulongbo Atungpuh kheak khide asühbah.

⁸ Inü arü jibah tüsho arübo mukhungbah, tümüde inü arü rhokhitdo tüsho akhuhlim nangde arü hihde akambah.

⁹ Inü arübo trükshih bolung hiumüzütshihshih she, limshu lomibo chingnü arünü I lümkhitbah, tüsho arünü arü tsührübo mütrübah tüsho alodarübah.

¹⁰ Inü arü Ijip lomi chingnü thüyam lim bedarübah, tüsho arübo Asiria chingnü bemukhungbah; inü arübo Gilead lomi tüsho Lebanon ching, arü thsungkheak khiungshak mülayi khiungde bedarübah.

¹¹ Arünü lümthsünü keto tsahhobah, tüsho keto abükkhibo kingkheambah tüsho Nile asükbo alala ngahbah. Asiria kükheangkhi abobe kambah tüsho Ijip tso chamde atsobah.

¹² Inü arübo Atungpuh kheak düküngde akamshihbah, tüsho arünü api mung ching tsahbah, Atungpuhnü thachoh.