YUZÜNGTHALO 9 - AMÜSÜH HÜM CL Bible (BSI)

Mihtsürübonü Mihyumanikhi

¹ “O Israel aniang: Nüsa khihni Jordan hode ayübah, tüsho nüsa kheaknü atobe tüsho sühmüh lakhi trükbo, chipi ato tüsho thüning khiungde ayünkhi kiutobo yanabahbah,

² Anakim tsührü-tsührü, mihtsürü ato tüsho ashang, sherü nüsanü mükheahla tüsho tha, Shepünü Anak tsühsoniuso müngüh zhipkhukpü?

³ Jumonü Atungpuh nüsa Thrünpuh khihni nüsa müngüh motru aniukhi nangde yüchoh de mükheahang. Apinü arü sheshihbah tüsho nüsa miki hande akijihbah; jumonü Atungpuhnü nüsa ki thakhi nangde nüsanü arü yankhitbah, tüsho nahde adükheakbah.

⁴ Atungpuhnü arü ju nüsa müngühnü yankhita bahchoki, nüsa kheak thiyuro-lungki lakhi hode Atungpuhnü ju lo mükühpü bedarüdo de nüsa mulong ching dülüm; tüshe harü trükshih khide amütsükhi hode Atungpuhnü arü nüsa müngühnü yankhita bahchoh.

⁵ Ha nüsa thiyuro lamo yungsho mulong alungki lamonü nüsa arü lo mükühde ayükhi yung, tüshe harü trükshih khide mütsükhi hode Atungpuh nüsa Thrünpuhnü arübo nüsa müngühnü yankhita bahchoh, junangde Atungpuhnü nüsa jipürübo Abraham, Isak, tüsho Jakob ki thiyuchihchimkhi dünjibah.

⁶ Jumonü nüsa kheak thiyuro lamonü Atungpuh nüsa thrünpuhnü ha lo atsü nüsanü amükühpü jihkhi yung de mükheahang, tümüde nüsa anihnih mihtsürü ah.

⁷ “Nüsanü künangde sunglo ching Atungpuh nüsa Thrünpuh bukakhiukshihkheanü lümkhitang tüsho dümih; nüsa Ijip lomi ching chamachihkhi nimungnü ha dangpung khiungde arüchoki dükeak ching nüsanü Atungpuh azhihde arüdo.

⁸ Horeb ching she nüsanü Atungpuh bukakhiukshih, tüsho Atungpuhnü nüsa kheak khide bukakhiuk, junangde apinü nüsa dükheakshihpü thsüde alakheah.

⁹ Atungpuhnü nüsa kilim thsüjihkhi tangzüng lungbeakbo leangkhia lupü küyimki I müzüng ching wutukhea, inü müzüng ching nimung yirü tüsho tsüngre yirü mung; inü yikhap she mütsüh yungsho ke she muyung.

¹⁰ Tüsho Thrünpuh yingkhingnü athrütkhi lungbeak mahne Atungpuhnü I kilim jih; tüsho ju ne ju nüsa mukhungkhi nimung ching müzüng kheak mo phulungnü Atungpuhnü nüsa ki thakhi yubo kihbah alakheah.

¹¹ Nimung yirü tüsho tsüngre yirü kheamshu Atungpuhnü tangzüng lungbeak mahne ju I kilim jih.

¹² “Tüsho Atungpuhnü I ki tha, Asürang, ha chingnü nahde yükiang; tümüde nünü Ijip chingnü bedarükhi nü mihtsürübonü thsümünimde rhimodo; inü arü ki thiyukhüm jihkhi limro chingnü arübo nahde tsoakhindo; arünü arü thsungkheak sangthsü rhimoa lah.

¹³ “Kheaküshe Atungpuhnü I ki tha, Inü harü mihtsürü ngüdo, tüsho kheahang, arü anihnih mihtsürü ah;

¹⁴ I langzü zojang, junangde inü arü dükheakshihbah tüsho arü mung thüning bukkhüp chingnü nankhita bahjihbah; tüsho inü arü kheaknü nü sühmüh labe tüsho atobe trükshih kamshihbah.

¹⁵ “Jumonü I rholobah müzüng chingnü aki tüsho müzüng ju monü takde alakheah; tüsho tangzüng lungbeak mahne ju I khah ching lakheah.

¹⁶ Tüsho inü kheahshe, ju ching nüsanü Atungpuh nüsa Thrünpuh azhihde neak yihbeaka lakheah, tüsho nüsa thsungkheaknü sangthsü moshi nunu kiphahde thsü. Atungpuhnü thiyukhüm jihkhi limro chingnü nüsanü nahde akhin.

¹⁷ Judüki inü lungbeak mahne ju lu tüsho I khah mahne chingnü jipa bah tüsho ju ne nüsa mük ki adannak.

¹⁸ Akhuhlim nangde, nimung yirü tüsho tsüngre yirü inü Atungpuh miki khukning; tümütüsho nüsanü Atungpuh miki mütsüde neak yihbeakbah api bukakhiukshihkhi hode inü yikhap mütsüh yungsho ke she muyung.

¹⁹ Tümüde Atungpuhnü nüsa dükheakshihpü nüsa azhihde bukakhiukkhi tüsho khide masühkhi inü trede alakheah. Tüshe ju kim ching she Atungpuhnü I ki anido.

²⁰ Tüsho Atungpuhnü Aron kheak api dükheakshihpü thsüde khide bukakhiuk; tüsho ju kim ching she inü Aron thsungkheak tamkhüntamnüjih.

²¹ Judüki inü nüsanü athsükhi amünean kukruk sangthsü lubah mo ching tak tüsho adütre tüsho asungthulung nangde mükamyi khiungde kingnak; tüsho inü asungthulung ju müzüng chingnü bukde akikhi yung ching bah.

²² “Nüsanü Tabera, Massa, tüsho Kibroth-hattava ching she A TUN GPU H bukakhiukshih.

²³ Tüsho küyimki Atungpuhnü nüsa Kadeshbarnea chingnü thiyide ha ruk thakhea, Wutuang tüsho inü nüsa kilim jihkhi lo müküh-a lung, judüki nüsanü Atungpuh nüsa Thrünpuh yukhüm azhihlo tüsho api kheak mükin yungsho api düsheak mani.

²⁴ Inü nüsa mükheahkhi nimungnü ründe nüsanü Atungpuh azhihde arüdo.

²⁵ “Jumonü inü Atungpuh miki nimung yirü tüsho tsüngre yirü mükhüm; tümütüsho Atungpuhnü nüsa dükheakshihbah de tha.

²⁶ Tüsho inü Atungpuh ki tamkhüntamnü, O Wuto Atungpuh , nü tokhinü rhokhitkhi, nü khah sühmüh atonü Ijip chingnü abekhitkhi, nü mihtsürü tüsho nü yamrüplurüp düdükheakshih.

²⁷ Nü yamlarübo Abraham, Isak tüsho Jakob lümkhitang; ha mihtsürübo nihnihkhi, yungsho mihbukmuyuk yungsho arü neak dükheahjih,

²⁸ jude yungsho nünü isa bebah arüpung lonü athabah, Tümütüsho Atungpuhnü arü ki thiyuchihchimkhi lo ching arü bebah müyü, tümütüsho apinü arü thranean, apinü arü sunglo chingnü alaksahpü bekhit.

²⁹ Judüalalashe arübo, nü wu-sühmüh tüsho nü khah chunghuhde abekhitkhi, nü mihtsürü tüsho nü yamrüplurüp ah.