YUZÜNGTHALO 8 - AMÜSÜH HÜM CL Bible (BSI)

Alo Atsü Mükühpü

¹ “Inü nüsa kilim khihni thiyukhüm jihkhi yuzüngbo alala jinjihde anide rhimoang, junangde nüsa rhangdung lade wüh bubah, tüsho Atungpuhnü nüsa bebuhrü ki thiyuchihchimkhi lo ching yünü müküh-a lubah.

² Tüsho Atungpuh nüsa Thrünpuhnü sunglo ching nimung yirü bedarükhi nüsanü alümkhitbah, junangde apinü nüsa azhihayihshihde, nüsanü api yuzüng anidüshi yungnü nüsa mulong ching lakhi mükheahpü rükakibah.

³ Tüsho apinü nüsa azhihayihshihpü khümshih tüsho nüsa kilim manna kip, küpü nüsa yungsho nüsa bebuhrübonü mümükheahkhea, junangde mihtsürü ju yikhapnü lang rhangdung müla de nüsanü amükheahbah, tüshe mihtsürü ju Atungpuh mün chingnü athakhitkhi abannü rhangdung lah.

⁴ Ha kam yirü amuyung nüsa kheak lakhi khimmihbo mümürhüt, yungsho nüsa jing mübüm.

⁵ Jumonü nüsa mulong ching mükheahang, mihtsürü khülangnü atsührü danyukkhi nangde, Atungpuh nüsa Thrünpuhnü nüsa danyukchoh.

⁶ Jumonü nüsanü api limro ching tsahde tüsho trede, Atungpuh nüsa Thrünpuh yukhümbo zobeah.

⁷ Tümüde Atungpuh nüsa Thrünpuhnü nüsa alo atsü ayung lakhibo, tüsho kenü jindükhün le awungbo thrip bukde ayükhi lo ching bebah yüchoh,

⁸ wheat hi tüsho barli hi lakhi lo, kurungaso wung, khubaso dung, tsarümkiu dung, oliv sangdung tüsho mukhuke lakhi lo,

⁹ nüsanü anüzhak mülade yikhap tsühpung lo, ju ching nüsa tümü she mümükheak, yinchi lungbo lakhi lo tüsho ju wungbo chingnü nüsanü müwayinchi kiukhitbah.

¹⁰ Tüsho nüsanü tsühbahle bukthsüchoki, Atungpuh nüsa Thrünpuh shiang tümüde apinü alo atsü nüsa kilim jih.

Atungpuh Mümihpü Thakhi

¹¹ “Nüsanü api yukhümbo, yuzüngbo, yakzanbo, küpü inü khihni nüsa ki thiyukhüm jihchonü harü manikhi hode Atungpuh mihamübahpü kümkangang.

¹² Jude müthsüsho küyimki nüsa tsühbah bukthsüba, thüyam atsübo thsübah alaba,

¹³ tüsho nüsa moshi le mihnu boto bude tüsho shotoyinchi, suna tüsho nüsa lakhi rünkihchoki,

¹⁴ nüsa mulong ching kükheangbah tüsho Ijip azhorü lo chingnü nüsa bekhitbuh Atungpuh nüsa Thrünpuh mihabahbah.

¹⁵ Apinü nüsa mükheahbinkhi tüsho atrebe sunglo, kethürikhi tüsho akung lo, müzüm phuruto tüsho lungthsühri lakhi hode bebah arü. Apinü nüsa kilim lungmüzhak chingnü ke handarü.

¹⁶ Akheam ching nüsa tsüde alashihpü apinü nüsa kilim nüsa bebuhrünü küyimkishe mümükheahkhi, nüsa azhihayihshihpü tüsho rükakipü atsühbe manna kip.

¹⁷ Jumonü nüsanü nihbuh wu tüsho sühmüh hode lakhit ngüdo de küyimkishe mülümbeah.

¹⁸ Tüshe Atungpuh nüsa Thrünpuh lümkhitang, tümüde lakhit ngüpü apinü wu-sühmüh nüsa kilim jihchoh, junangde nüsa khihni lakhi nangde, apinü nüsa bebuhrü ki tangzüngkhi düküngloshihba.

¹⁹ Tüsho ha ruk labah, Küdüküdüshe nüsanü A TUN GPU H nüsa Thrünpuh mihabahde püpürü thrünpuhbo yansho, tüsho arü tankihde kingaünsho, nüsa tsükjide adükheakbah de inü nüsa azhihde ha nimung thiyumütsan jihchoh.

²⁰ Nüsa müngüh Atungpuhnü trükshihbo dükheakshihkhi nangde, Atungpuh nüsa Thrünpuh düsheak manikhi dünkheaknü nüsa she adükheakbah.