YUZÜNGTHALO 6 - AMÜSÜH HÜM CL Bible (BSI)

Thiyuzüng Atobe

¹ “Kheakü ha nüsa ki thsangyushihpü Atungpuh nüsa Thrünpuh thiyukhümbo, yakzanbo tüsho thiyuzüngbo, junangde nüsanü hode yübah amükühpü lakhi lo ching nüsanü yande arhimobah,

² ju ruk inü nüsa, nüsa tsührü tüsho tsührütsührü ki thiyukhüm jihkhi, api yakzanbo tüsho thiyukhümbo zopü nüsanü Atungpuh nüsa Thrünpuh, rhangdung amuyung wüntrebah, tüsho nüsa kutsüp ashang labah.

³ Jumonü O Israel aniang, tüsho ha yande arhimopü kümkangang, junangde nüsa tsüde alabah, tüsho Atungpuh nüsa bebuhrü Thrünpuhnü nüsa ki thiyuchihchimkhi nangde niuhke tüsho mukhuke bukde alakhi lomi ching tode wüh bubah.

⁴ “O Israel aniang: Atungpuh isa Thrünpuh ju lang Atungpuh ah!

⁵ Nü mulong athrünkhinü, nü me athrünkhinü, tüsho nü sühmüh athrünkhinü Atungpuh nü Thrünpuh muzhoang.

⁶ Tüsho inü khihni thiyukhüm jihkhi yu ha nüsa mulong ching labah;

⁷ nüsanü jurü nüsa tsührübo ki düshihde athsangyubah, tüsho nüsa thüyam ching binchoki, limro tsahchoki, ayapchoki, tüsho awusuchoki thabah.

⁸ Jurübo mütsan thsüde nüsa khahbo tüsho nüsa kingkangbo kheak rümkihang.

⁹ Nüsanü jurübo nüsa yam khimdopü tüsho chipimurungbo kheak thrütkihang.

Mihyumanikhi Dünkheak Thiyukhüm

¹⁰ “Tüsho hanangde alabah, Küyimki Atungpuh nüsa Thrünpuhnü nüsa bebuhrü Abraham, Isak, tüsho Jakob ki nüsa ki tode ajihpü thiyuchihchimkhi tüsho nüsanü amüthsükhi akheahakham kiutobo ching bebah arübanü,

¹¹ nüsanü yuka muzokhi thüyam kukruk atsünü mide, nüsanü amukiukhi kekungbo, nüsanü amükhimkhi kurungasolubo tüsho oliv sangdungbo–küyimki nüsanü tsühde reangkeambanü,

¹² nüsa Ijip lo, azhorü kuhi chingnü abekhitbuh Atungpuh mümihpü kümkangang.

¹³ Nüsanü Atungpuh nüsa Thrünpuh wüntreang, tüsho api tankihang, tüsho api mung ching thiyuchihchim luang.

¹⁴ Nüsanü nüsa mükamde alakhi püpürü thrünpuhbo dunglim düyan,

¹⁵ tümüde nüsa lung lakhi Atungpuh nüsa Thrünpuh ju mükthsübuh Thrünpuh; jude yungsho Atungpuh bukakhiukkhi nüsa kheak labah, tüsho apinü nüsa alomi kheaknü dükheakshihbah.

¹⁶ “Nüsanü Atungpuh nüsa Thrünpuh Massa ching rükakikhi nangde rükdaki.

¹⁷ Nüsanü Atungpuh nüsa Thrünpuh yukhümbo, thiyumütsanbo, tüsho apinü nüsa ki thiyukhüm jihkhibo düshihde anide rhimoang.

¹⁸ Tüsho nüsanü Atungpuh mük ki küpü alungkia tüsho atsüanü ju rhimoang, junangde nüsa tsüde alabah, tüsho Atungpuhnü nüsa bebuhrü kheak thiyuchihchimkhi alo atsü ching nüsanü yübah amükühbah,

¹⁹ tüsho Atungpuhnü alokhikhi nangde nüsanü nüsa riri yankhita bahbah.

²⁰ “Arübe kim ching nü tsührünü nü ki keokhibah, Thiyumütsan, yakzanbo, tüsho Atungpuh isa Thrünpuhnü nüsa ki thiyukhüm jihkhi ha amütsan tümüa?

²¹ Judüki nünü nü tsührü ki thabah: Isa Ijip ching Pharao bukkhüp azhorü lakheah, tüsho Atungpuh khah ato hode isa Ijip chingnü bekhit;

²² tüsho Atungpuhnü Ijip, Pharao tüsho api yamkhün azhihde amükheahmihbe khinthiyinbe, tode atrebe isa mük ki huh.

²³ Tüshe apinü isa ju chingnü bekhitbah isa bebuhrü kheak isa jihpü alokhikhi lo ching bedarü.

²⁴ Tüsho kamruhroro tsüde alapü thsüde Atungpuh isa Thrünpuh wüntrepü thsungkheak Atungpuhnü isa ki harü yakzan alala anide arhimopü thiyukhüm jih, junangde khihni nangde apinü isa rhangdung lashihbah.

²⁵ Tüsho apinü isa ki thiyukhüm jihkhi nangde, harü yukhümbo kümkangde anisho isa thsungkheaknü ha thiyuro-lungki labah.