YUZÜNGTHALO 4 - AMÜSÜH HÜM CL Bible (BSI)

Mosanü Israelrü ki Mihyuanipü Thakhi

¹ “O Israel, inü nüsa ki thsangyukhi yakzanbo tüsho thiyuzüngbo kheakü aniang, junangde nüsa rhangdung labah, tüsho Atungpuh nüsa bebuhrü Thrünpuhnü ajihkhi lo nüsanü yübah alubah.

² Inü thiyukhüm jihkhi yu kheak nüsanü alü düyuk, yungsho yihkhita dübah, junangde nüsanü inü thiyukhüm jihkhi, Atungpuh nüsa Thrünpuh yukhüm zobah.

³ Atungpuhnü Baal Peor ching tümü rhimokheanü nüsa müknü ngüdo; tümüde Atungpuh nüsa Thrünpuhnü Peor ching Baal yanrü nüsa bolungnü mihtsürü alala dükheakshihdo.

⁴ Tüshe nüsa Atungpuh kheak zhimkihbah alarü alala khihni rhangdung lah.

⁵ “Tsükjide Atungpuh I Thrünpuhnü I ki thiyukhüm jihkhi yande inü nüsa ki thsangyudo, junangde nüsa yübah alupü lakhi lo ching jurübo zhimbah.

⁶ Jumonü jurübo anipü kümkangang: tümüde mihtsürübo mük ki ha nüsa lümlung tüsho mükheahmudu, harü sobah mihtsürübonü athabah, Tsükjide ha trükshih ato ha lümlung tüsho mükheahmudurü mihtsürübo ah!

⁷ “Tümüde isanü Atungpuh isa Thrünpuh ki jikhi nangde, thrünpuhnü athüninkhi püpürü trükshih ato küju la?

⁸ Tüsho inü khihni nüsa miki yakzan tüsho thiyuro yuzüngbo zojihkhi nangde trükshih ato küju la?

⁹ Nüsa thsungkheaknü mük-yukde kümkangang, jude müthsüsho nüsa müknü angükhi mihabahbah, tüsho nüsa rhangdung lakhi amuyung nüsa mulong chingnü chamkhide atsobah. Tüsho jurübo nüsa tsührübo le tsühsoniusobo ki thsangyuang,

¹⁰ künangde nüsa Atungpuh nüsa Thrünpuh miki Horeb ching zhipchoki Atungpuhnü I ki tha, Mihtsürübo I ki bemukhungang; tüsho inü I yu soshihbah, junangde arü alomi ching lachoki rhangdung amuyungnü I wüntrepü mükheahbah, tüsho arünü tsührübo ki thsangyubah.

¹¹ “Nüsa müzüng jing thüninde arünü azhipchoki, amo amürak, akheah amitingkhi bebah thüning khiungde mo trude tak.

¹² Tüsho mo phulung chingnü nüsa ki Atungpuhnü asukachih. Nüsanü thiyu düsheak sodo, tüshe ajak müngü; düsheak lang alakheah.

¹³ Jumonü apinü nüsa ki arhimoshihpü tangzüng jihkhi ju thiyuzüng thürü lakheah; tüsho apinü jurübo lungbeak mahne kheak thrüt.

¹⁴ Judüki nüsanü yübah müküh-a lupü lakhi lo ching rhimopü thsüde nüsa ki jurü thsangyushihpü Atungpuhnü I ki thiyukhüm jih.

Sangthsü azhihde Athakhi

¹⁵ “Nüsa thsungkheak kümkangang, tümüde Horeb ching mo phulungnü Atungpuhnü nüsa ki asukachihchoki ajak müngü,

¹⁶ jude yungsho nüsanü rhimophüneanbah tüsho tümükhüh jak yande sangthsü thsübah: athrürü yungsho aliberü jakjak,

¹⁷ alo kheak lakhi shiwühbo khürü jak nangde yungsho apung ching phinkhi aghi kihbe wuhnu nunu jak nangde,

¹⁸ alo kheak abüde atsahbe tümükhüh nangde yungsho alo bukkhüp ke ching lakhi thüngüh khürü jak nangde.

¹⁹ Tüsho küyimki nüsanü thüning lim abinkih-a kheahbanü tüsho ani, khinu, chiningbo, thüning ching lakhi alala ngübanü Atungpuh nüsa Thrünpuhnü thüning bukkhüp mihtsürü alala ki jihkhibonü nüsa dümünityukshih tüsho mükhümde arü dütankihshih.

²⁰ Tüshe Atungpuhnü nüsa yinchi trukhi, Ijip chingnü nüsa khihni lakhi ruk api mihtsürü thsüpü tüsho api yamrüplurüp thsüpü bekhit.

²¹ Kheaküshe nüsa dünkheaknü Atungpuhnü I kheak bukakhiuk, tüsho Atungpuh nüsa Thrünpuhnü nüsa kilim jihkhi alo atsü ching yüzahpü, I Jordan hode müyükhuk de thiyuchihchim.

²² Tahle I ha lo ching shebah, I Jordan hode müyü, tüshe nüsa hode yübahle alo atsü müküh-a lubah.

²³ Kümkangang, Atungpuh nüsa Thrünpuhnü tangzüngkhi nüsanü dümihabah, tüsho nüsa Thrünpuhnü düh de athakhi nüsanü tümükhüh jak yande sangthsü düthsü.

²⁴ Tümüde A TUN GPU H nüsa Thrünpuh ju muliuabahbe mo nangde mükthsübuh Thrünpuh lah.

²⁵ “Küyimki nüsa tsührübo tüsho tsührü-tsührü ngübahle lomi ching zode arübah, thsümünimde tüsho tümükhüh jak kiphahde sangthsü thsübanü, tüsho Atungpuh nüsa Thrünpuh miki amütsü rhimode api bukakhiukshihbanü,

²⁶ khihni nüsa azhihde inü thüning tüsho alo jichoh, junangde nüsa Jordan hode ayükhi lomi chingnü shahde adükheakkhambah; nüsa nimungbo mushuhakhin, tüshe shahde adükheakbah.

²⁷ Tüsho Atungpuhnü mihtsürü bolung nüsa hiumüzütshihbah, tüsho Atungpuhnü nüsa külimpeang bebanü trükshih bolung nüsa nükde alabah.

²⁸ Tüshe ju ching mihtsürü khahnü athsükhi, sang le lung, müngükhi yungsho musokhi, yungsho mütsühkhi yungsho mümünimkhi thrünpuhbo nüsanü tankihbah.

²⁹ Tüshe ju ching Atungpuh nüsa Thrünpuh nüsanü ayimbah, tüsho nüsanü mulong tüsho me athrünkhinü api yimsho angübah.

³⁰ Nimung ho dunglim hadürü nüsa kheak arübah nüsa lümthsünüsho, küyimki nüsanü Atungpuh nüsa Thrünpuh kilim rholode api düsheak anibanü,

³¹ (tümüde Atungpuh nüsa Thrünpuh ju amüthsüm Thrünpuh) apinü nüsa mübahyuk yungsho müdükheakshih, yungsho apinü nüsa bebuhrü kheak tangzüngkhi mümih.

³² “Kheakü nüsa müngüh lakhi ahokhi nimungbo, Thrünpuhnü alomi kheak mihtsürü thrünkhi nimungnü rünbah lümakheahang, tüsho hadürü ato dünjikhi yungsho sodüshi musonü thüning akheamnü khülim khiungde keoa kheahang.

³³ Nüsanü düsheak mo phulungnü sobahle rhangdung lakhi nangde, mihtsürü khürünü Thrünpuh düsheak sonah?

³⁴ Yungsho A TUN GPU H nüsa Thrünpuhnü nüsa ki Ijip ching rhimokhi nangde, thrünpuh khürünü trükshih khürü püpü trükshih chingnü api yo thsüpü rükakide, amükheahmihbe huhde, khinthiyinbe rhimode, keochihde, wu-sühmüh khah chunghuhde, tüsho tode müzünkhi la shi?

³⁵ Atungpuh ju Thrünpuh ah de ahuhpü thsüde ha nüsa ki rhimodo; api hode sheshe müla.

³⁶ Apinü nüsa thsangdanpü thsüde thüning chingnü api düsheak soshihdo; alomi kheak apinü nüsa ki mo ato huhdo, tüsho nüsanü api yu mo phulungnü sodo.

³⁷ Tümütüsho apinü nüsa bebuhrü muzho, jumonü apinü arü dunglim tsühsoniusobo mokhit; tüsho api wunü nüsa Ijip chingnü bekhit.

³⁸ Nüsa khihni lakhi nangde nüsa bedarüpü tüsho yamrüplurüp jihpü thsüde wu-sühmüh ato lakhi trükbo nüsa müngühnü yanabah.

³⁹ Jumonü khihni ha mükheahang, tüsho Atungpuh ju thüning tüsho alomi ching Thrünpuh ah de nüsa mulong ching lümang; ju ching püpü sheshe müla.

⁴⁰ Jumonü nüsanü api yakzanbo tüsho yuzüngbo inü khihni jihkhi aniang, junangde nüsa dunglim tsührübo kheak tsüde alabah, tüsho Atungpuh nüsa Thrünpuhnü lün thsungkheak jihkhi lo ching nüsa kutsüpde alabah.”

Jordan Aniakhiuklim Tsoyukpung Kiutobo

⁴¹ Tüsho Mosanü aniakhiuklim, Jordan thrip kiuto mahsam akhukhita zo,

⁴² junangde mihtsürü khürü anihbuh kheak amülim mürhimode yamhingrü müreanglimnü laksahsho api rhangdung lapü thsüde ju ching tsode ayübah:

⁴³ Reubenrü thsungkheak sunglo ching wungduduh kheak lakhi Bezer, Gadrü thsungkheak Gilead ching lakhi Ramoth, tüsho Manaserü thsungkheak Bashan ching lakhi Golan.

Thrünpuh Yakzan Huhtanyu

⁴⁴ Tüsho ha Mosanü Israel mihtsürü miki zojihkhi yakzan;

⁴⁵ harü ha Israel mihtsürü Ijip chingnü abekhitshu Mosanü Israel mihtsürü ki thakhi yukhüm, yakzan tüsho yuzüngbo,

⁴⁶ ha Mosa tüsho Israel mihtsürübonü Ijip chingnü akhiukshu kukkhi, Hebron ching lakhi Amorrü kiulongthsüpuh Sihon lo ching jindükhün ching Beth Peor miki, Jordan thrippeang lakheah.

⁴⁷ Tüsho arünü api lo müküh tüsho Bashan kiulongthsüpuh Og lo aniakhiuklim Jordan thrippeang, Amorrü kiulongthsürü mahne lo lu,

⁴⁸ Arnon ayung yean lakhi Aroer kheaknü Sion müzüng khiungde (ju Hermon,)

⁴⁹ tüsho Jordan aniakhiuklim adükhünbo kheaknü Pisga düpheak bukkhüp, Araba Keto khiung.