YUZÜNGTHALO 3 - AMÜSÜH HÜM CL Bible (BSI)

Israelnü Og Kiulongthsüpuh Kukkhi

¹ “Judüki isa rholobahle Bashan limro wutu; tüsho Bashan kiulongthsüpuh Ognü api mihtsürü alala bebah Edrei ching isa bede keochihpü akhiuk.

² Tüsho Atungpuhnü I ki tha, api dütre, tümüde inü api lung amihtsürü, tüsho api lo alala nü khah ching jihdo; nünü api kheak, Heshbon ching lakhi Amorrü kiulongthsüpuh Sihon kheak rhimokhi nangde arhimobah.

³ “Jumonü Atungpuh isa Thrünpuhnü Bashan kiulongthsüpuh Og tüsho api mihtsürü alala isa khah ching yukjih, tüsho arü khülang she maningshihde laksahkham.

⁴ Judüki isanü kiutobo alala lu; isanü amulukhi kiuto khülang lang she mülade alakheah: kiuto 60, Argob kewung alala, Bashan ching Og kiulongthsü.

⁵ Harü kiutobo alala chipi achangnü tüsho chipimurung le akhrihbe thsübah alakheah, tüsho chipi müthsükhi kiutobo she ahihdo lakheah.

⁶ Isanü Heshbon kiulongthsüpuh Sihon kheak rhimokhi nangde, arü athrürü, aliberü, tüsho kiutobo ching lakhi athrünkhi dükheakkhamshih.

⁷ Tüshe akamshiwühbo tüsho kiuto chingnü ayankhikhibo nihbuh thsungkheak isanü lu.

⁸ “Judüki isanü Amorrü kiulongthsürü mahne khah chingnü Jordan yean lakhi alo, Arnon ayung kheaknü Hermon wung khiungde lu.

⁹ (Sidonrünü Hermon ki Sirion tüsho Amorrünü Senir de jichoh.)

¹⁰ Awung kheak lakhi kiutobo, Gilead, Bashan alala, Saleka tüsho Edrei khiungde Bashan ching Og kiulongthsü kiutobo alala isanü lu.”

¹¹ (Bashan kiulongthsüpuh Og ju lang Rephaimrü lungnü ashe aningkhi lakheah. Api kiuyuk ju yinchinü thsü tüsho ashanglim khahnap thürükheak mahsam akumung tüsho atolim khahnap thuruk. Ha Amonrü kiuto Rabba ching khihni khiungde lah.)

Jordan Aniakhiuklim Lakhi Trükbo

¹² “Judüki isanü ha lo luchoki inü Aroer kheaknü Arnon jindükhün chinkheam, tüsho Gilead lomi chamkhüh lung kiutobo bebah Reuben le Gadrü kilim jih;

¹³ aningkhi Gilead, Bashan alala, Argob kewungbo, inü Manase trük chamkhüh kilim jih. (Bashan alala ki ju Rephaim lo de jichoh.

¹⁴ Manaserü Jairnü Argob kewung ju Bashan, Geshur aredung tüsho Makathrü khiungde lu, tüsho kiulongbo ju api mung yande Havvoth-jair de ji, ju khihni khiungde lah.)

¹⁵ “Makir kilim inü Gilead jih,

¹⁶ tüsho Reubenrü le Gadrü kilim inü Gilead lomi kheaknü Arnon jindükhün khiungde, aredung thsüde jindükhün phulungnü, Amonrü aredung Jabbok ayung khiungde jih;

¹⁷ kheaküshe Jordan aredung thsüde, Kinnereth kheaknü Araba Thimi Keto, aniakhiuklim Pisga wungdüpheak bukkhüp ah.

¹⁸ “Tüsho judüki inü nüsa ki thiyukhüm jihde tha, Atungpuh nüsa Thrünpuhnü ha lo nüsa lushihpü jihdo; nüsa mihtsürü alala thirithsü zülu hanbahle nüsa keoniorü Israelrü müngüh yüang.

¹⁹ Tüshe nüsa niuberübo, tsührübo, tsührü aninibo, tüsho akam-shiwühbo (nüsa akamshiwüh ahihdo lah de inü mükheahlah) inü ajihkhi kiutobo ching aninga lashang,

²⁰ ju Atungpuhnü nüsa ruk nüsa keoniorü sühakhim müjih khiungde, tüsho arünü she Atungpuh nüsa Thrünpuhnü Jordan mungyean mümükühyi khiungde; jushu nüsa mihtsürü abannü nüsa kilim inü ajihkhi lo ching alode arübah.

²¹ “Tüsho inü judüki Jihusua ki thiyukhüm jih, Atungpuh nüsa Thrünpuhnü ha kiulongthsürü mahne kheak rhimokhi nü müknü ngüdo; junangde nüsa hode ayüpü lakhi kiulongthsübo ching Atungpuhnü arhimobah.

²² Arü dütre; tümüde Atungpuh nüsa Thrünpuhnü aküdah thsüde nüsa thsung thsüde keochihchoh.

Mosa Kanan ching Yüzahpü Mümülükhi

²³ “Judüki inü Atungpuh ki mushude tha:

²⁴ O Atungpuh Thrünpuh, nünü nü yamlarü ki nü tokhi tüsho wu-sühmüh khah huhpü tankih, tümüde thüning yungsho alo ching lakhi tümü thrünpuhnü amüyinsahbe nü rhimo nangde arhimokhukpü?

²⁵ Inü tamkhüntamnüchoh, I hode yüshang tüsho Jordan yean alo atsü, awung atsü tüsho Lebanon ngüshang.

²⁶ “Tüshe nüsa dünkheak abukakhiuk tüsho I yu mani. Jumonü Atungpuhnü I ki tha: Ju suhdahdo! Ha dünkheak I ki düthalo.

²⁷ Pisga wungmujuk kheak wutuang, tüsho nü müknü aniyüzahlim, dukulim, düjinglim tüsho aniakhiuklim chinzhinang; nü müknü ju kheahang, tümüde nü ha Jordan hode müyü.

²⁸ Tüshe Jihusua ki thiyukhüm jihang, tüsho api mulong tuthsukde reangzahshang, tümüde api ha mihtsürü müngüh yübah, tüsho apinü arü kilim nünü angükhi lo lushihbah.

²⁹ Jumonü isa Beth Peor jukkih jindükhün ching la.”