YUZÜNGTHALO 28 - AMÜSÜH HÜM CL Bible (BSI)

Mihyuanikhi Müngühmühi

¹ “Kheakü nüsanü Atungpuh nüsa Thrünpuh ki mihyuanisho tüsho inü khihni nüsa kilim jihkhi yukhüm ayihyih thsüde yansho, Atungpuh nüsa Thrünpuhnü alomi ching nüsa trükshih alala kurungkheak achangbe kamshihbah.

² Nüsanü Atungpuh nüsa Thrünpuh ki mihyuanisho harü müngühmühi alala nüsa kheak arübah tüsho nüsa yo thsübah:

³ “Nüsa kiuto tüsho lomi ching müngühjihbah.

⁴ “Nüsa kilim tsührü ahihkhüh müngühjihbah, tüsho alo chingnü akhiukbe, akam-shiwüh, moshi tüsho namfimihnubo müngühjihbah.

⁵ “Nüsa muluk tüsho zowupung ching müngühjihbah.

⁶ “Nüsa yüzahkhi tüsho wukhiukkhi ching müngühjihbah.

⁷ “Nüsa azhihrü thiriribo Atungpuhnü nüsanü akukshihbah; arünü nüsa azhihde limbeak khülang chingnü akhiukbah tüsho nüsa müngüh limbeak thüne chingnü alihde atsobah.

⁸ “Atungpuhnü nüsa jakam tüsho nüsanü arhimokhi alala ching müngühjihbah, tüsho Atungpuh nüsa Thrünpuhnü ajihkhi lo ching apinü nüsa müngühjihbah.

⁹ “Nüsanü Atungpuh nüsa Thrünpuh yukhüm anisho tüsho api limro ching tsahsho Atungpuhnü nüsa ki thiyuchihchimkhi nangde nüsa api kilim amüsüh mihtsürü kamshihbah.

¹⁰ Judüki alomi ching mihtsürübonü Atungpuhnü nüsa api mihtsürü thsüpü mokhitdo de angübah, tüsho arünü nüsa trebah.

¹¹ Tüsho Atungpuhnü nüsa jipürü ki nüsa jihpü alokhikhi lo ching, nüsa tsührübo, akam-shiwüh, tüsho alo chingnü akhiukkhi suhdahde ajihbah.

¹² Kim dükdü ching nüsa lo ching tsüng arüshihpü tüsho nüsa rhimo ching müngühjihpü thsüde Atungpuhnü nüsa kilim api lakhit atsü, thüning khimshuhjihbah. Nüsanü trükshih ahihdo kilim nipjihbah, tüshe nüsanü a anip mulu.

¹³ Tüsho Atungpuhnü nüsa amo yungde aku kamshihbah; inü khihni nüsa kilim jihkhi Atungpuh yukhüm anide jurübo düshihde rhimosho, nüsa akumung lang alabah tüshe abukkhüp lim müla.

¹⁴ Jumonü inü khihni küpü yukhüm nüsa ki jihchonü nüsanü püpürü thrünpuhbo tankihpü ju kheaknü tsülim yungsho huzulim danguh.

Mihyumanikhi Muthrumünean

¹⁵ “Tüshe nüsanü Atungpuh nüsa Thrünpuh düsheak manide, inü khihni nüsa ki thiyukhüm jihkhi api yukhüm tüsho yakzanbo müyansho, harü muthrumünean alala nüsa kheak akihde arheakbah:

¹⁶ “Kiuto tüsho mükeak ching nüsa muthrumünean thsübah.

¹⁷ “Nüsa muluk tüsho zowupung ching muthrumünean labah.

¹⁸ “Nüsa tsührü tüsho alo chingnü akhiukbe, nüsa moshi tüsho namfimihnubo kheak muthrumünean labah.

¹⁹ “Nüsa azahkhi tüsho awukhiukkhi ching muthrumünean labah.

²⁰ “Nüsanü amütsü rhimode I bahyukkhi dünkheaknü, nüsa müshe khiungde tüsho nahde müdükheak khiungde Atungpuhnü nüsa kheak muthrumünean, ayingyingpü arüshihbah, tüsho nüsanü arhimokhi alala ching thsümütsü lashihbah.

²¹ Nüsanü müküh-a lupü lakhi lo ching nüsa müsheyi khiungde Atungpuhnü nüsa kheak arüm tukthsü lashihbah.

²² Nüsa müsheshihyi khiungde Atungpuhnü nüsa kheak ashepü tukthsü, phütsak tüsho abümpü, alamlam tüsho thsühnuk, mümüpü tüsho mokri arüshihbah.

²³ Tüsho nüsa kumung lakhi thüning ju müwayinchi labah, tüsho nüsa bukkhüp lakhi alo ju yinchi labah.

²⁴ Atungpuhnü nüsa lo ching tsüng ju asungsung müthrishihbah; tüsho nüsa müsheshihyi khiungde asungthulung lang thüning chingnü nüsa kheak akibah.

²⁵ “Atungpuhnü nüsa riri kilim nüsa kurungkheak akuk ngüshihbah; nüsanü arü azhihde limbeakkhühnü awukhiukbah tüsho arü müngüh limbeak thüne chingnü alihde atsobah; tüsho nüsa ju kiulongthsü alala ki mihtrebe kambah.

²⁶ Nüsa ashemibo ju thüning ching wuhnubo tüsho alo kheak shiwühbo jim thsübah, tüsho arübo shenü she müzüna mütsoshih.

²⁷ Ijip ching lakhi phanjakkhuh, mü, müshak rangrangrurubo chingnü müthsüngukhukpü thsüde Atungpuhnü nüsa kheak thsümüchibah.

²⁸ Atungpuhnü nüsa kheak bünkeangbünru, müktuk tüsho lüm keakeashahshahnü athsümüchibah.

²⁹ Müktukrü mihtsürünü amiting ching ajamkhi nangde nüsanü animuro ajambah; nüsanü arhimokhi ching nüsa alü müthsü; nüsa mutuklode ajunobah tüsho mülapyukbah, tüsho shenü nüsa mükhümkhit.

³⁰ “Nünü aliberü khülang neakbah tüshe khürünü anihbe lubah; nünü thüyam khülang thsübah tüshe nü ju ching müla; nünü kurungasolu thsübah tüshe aso rhoa mütsüh.

³¹ Nü moshipung nü mük kinü alaksahbah, tüshe nünü ashih mütsüh; nü yo donki nü mikinü jangkhia lubah atsobah, tüsho nü kilim müjihlo; nü yo namfimihnu nü riribo kilim jihbah, tüsho jurü bekhitpü thsüde nü ki sheshe alapü yung.

³² Nü tsührü le tsührübebo püpürü mihtsürü kilim jihbah, tüsho nimung aban arü alode arüpü nü mükji tukde akheahbah; tüsho nü khah ching sühmüh mülade akambah.

³³ Nünü mümükheahkhi trükshihnü nü lo chingnü akhiukkhi sangaso tüsho nünü arhimokhitkhi tsühbah, tüsho nüsa mutuklode ajunobah tüsho azünakbah.

³⁴ Junangde nü müknü angükhinü nü aduhabahshihbah.

³⁵ Müthsüngukhukpü thsüde nü mukhukmuruk tüsho nü jingbo kheak akin mütsüdakde Atungpuhnü , nü jinglung chingnü thangphülang khiungde akhiukshihbah.

³⁶ “Atungpuhnü nüsa tüsho nüsa kiulongthsüpuh, nüsa le nüsa jipürünü mümükheahkhi trükshih ching bede ayübah; ju ching nüsanü sang tüsho lungnü athsükhi thrünpuhbo tankihbah.

³⁷ Atungpuhnü nüsa hiumüzüta yüshihkhi trükshih bolung ching nüsa mihtrebe, mükhemürangkhi tüsho münedung kambah.

³⁸ “Nüsanü thulu ching müjih hihde ahiubah tüshe anükhüh lang ayimlubah, tümüde ju tangkhonü tsühabahbah.

³⁹ Nüsanü kurungasolu thsübah akümbah tüshe nüsanü ake muyung yungsho aso mürhomukhung; tümüde jurübo arinü tsühabahbah.

⁴⁰ Nüsa lomi alala ching oliv sang mukhuhbah, tüshe nüsanü nihbuh kheak oliv müdangkenü mumuju; tümüde nüsa yo oliv keamkhiabahbah.

⁴¹ Nüsa tsührü tüsho tsührübebo labah, tüshe arübo nüsa yo müthsü; tümüde arübo ramde atsobah.

⁴² Nüsa sangdungbo tüsho alo ching khahleak alala tangkhonü atsühbah.

⁴³ “Khiungkerü nü lung lakhi nü kheaknü achangbe achangbe yükihbah, tüshe nü a abolim abolim akibah.

⁴⁴ Apinü nü kheak nipjihbah, tüshe nünü api kheak münipjih; api aku thsübah tüsho nü amo thsübah.

⁴⁵ “Nüsa müsheshihyi khiungde harü muthrumüneanbo nüsa kheak arübah tüsho müshamde nüsa yanphuhbah, tümütüsho apinü nüsa ki thiyukhüm jihkhibo rhimopü nüsanü Atungpuh nüsa Thrünpuh ki mihyumani.

⁴⁶ Jurübo nü tüsho tsühsoniuso kheak lünnü amütsan tüsho khinthiyinbe labah.

⁴⁷ Tümütüsho hadükhüh müthangmüsünkhi ching nüsanü Atungpuh nüsa Thrünpuh mulong asühkhinü mütankih,

⁴⁸ jumonü nüsanü khümde, kethüride, bünkeang, tüsho kimkethürü mükheakde Atungpuhnü nüsa azhihde arüshihkhi nüsa riri tankihbah; tüsho nüsa müsheshihyi khiungde apinü nüsa hung ching yinchi-khrih yihkihjihbah;

⁴⁹ Atungpuhnü trük khülang müleang nangde aphinkhi, nüsanü arü yutha mümükheahkhi trükshih, alomi akheam, limshu chingnü nüsa azhihde handarübah.

⁵⁰ Arü ju bukmüshak tüsho azürü yungsho azorü she ki she mihmüthsüm muhuhrü labah.

⁵¹ Tüsho nüsa müsheshihyi khiungde arünü nüsa yo akam-shiwüh bukhi tüsho nüsa lo chingnü akhiukkhi tsühbah; arünü nüsa kilim hi yungsho yukhu aso yungsho oliv müdangke yungsho moshi yungsho mihnubo bukhi, nüsa müsheshihyi khiungde maningjih.

⁵² Nüsa lomi alala ching nüsa mulonglamkhi chipi achangnü ayünkhibo mükeamyi khiungde arünü nüsa kiutobo alala ching yanbah; tüsho Atungpuh nüsa Thrünpuhnü nüsa kilim jihkhi lo alala ching arünü nüsa yanbah.

⁵³ “Tüsho nüsa ririnü nüsa kiutobo yande tüsho nüsa mulong kimishihkhinü, Atungpuh nüsa Thrünpuhnü ajihkhi nüsa pang ching yo tsührü tüsho tsührübebo shih nüsanü atsühbah.

⁵⁴ Nüsa bolung adüngakhi tüsho azhihayihrünü she nihbuh keoniorü yungsho apinü amuzhokhi yamkhünbe yungsho aningkhi atsührübo kheak she marümkheamkhukde abahbah;

⁵⁵ junangde apinü tsühde alakhi atsührü shih arü she ki she mükip, tümütüsho nüsa ririnü kiutobo yankhi tüsho nüsa kiutobo alala ching thsümütsü jihkhinü api tümü she maning.

⁵⁶ Nüsa bolung aliberü adüngakhi tüsho azhihayih, shepü ajinglungnü alo kheak müqiukheanü anihbenü she aniubuh le atsührü tüsho tsührübebo ki,

⁵⁷ zübeshu akhiukkhi shim tüsho anihbenü azübekhi tsührübo mükipnede alabah; tümüde nüsa ririnü kiutobo yankhi tüsho nüsa kiutobo alala ching thsümütsü jihkhinü tümü she maningkhi hode anihbenü ju ramde atsühbah.

⁵⁸ “Nüsanü Atungpuh nüsa Thrünpuh müretahkhi tüsho api atrebe mung wüntrepü thsüde, ha hüm ching thrüta lakhi yakzan alala kümkangde müyansho,

⁵⁹ Atungpuhnü nüsa tüsho tsühsoniusobo kheak khidokhi arüm ato tüsho beshebe tukthsü amülang arüshihbah.

⁶⁰ Tüsho apinü nüsa kheak Ijip ching lakhi nüsanü trede alakhi tukthsü arüshihbah, tüsho jurü nüsa kheak müripkih-a labah.

⁶¹ Kheaküshe ha yakzan hüm ching thrüta mülakhi tukthsü tüsho arümbo alala nüsa müsheshihyi khiungde Atungpuhnü nüsa kheak arüshihbah.

⁶² Nüsa thüning ching chiningbo nangde hihdakde alakhi chingnü wühkhe nükde akambah, tümütüsho nüsanü Atungpuh nüsa Thrünpuh ki mihyumani.

⁶³ Tüsho Atungpuhnü nüsa lalimlako tsüshihde tüsho wüh bushihde asühkhi nangde, Atungpuhnü nüsa sheshihde tüsho athsümünim hande arüde asühbah; tüsho nüsanü müküh-a lupü lakhi lomi chingnü nüsa rukkhita bahbah.

⁶⁴ “Judüki Atungpuhnü nüsa mihtsürü alala lung, alomi akheam thripkhühnü khülim khiungde müzütshihbah, tüsho nüsanü ju ching nüsa yungsho nüsa jipürünü mümükheahkhi sang tüsho lungnü athsükhi püpü thrünpuhbo tankihbah.

⁶⁵ Tüsho ju trükshih bolung nünü sühakhimpung, yungsho nü jinglung zokheampung müngü; tüshe ju ching Atungpuhnü nü kilim mulong ajanpü, mükji keahpü, tüsho me thsünüpü jihbah.

⁶⁶ Nü rhangdung ju nü miki lümtrüp ching labah; nünü animung tüsho are trebah tüsho rhangdung ching mütsanmükhi mülade alabah.

⁶⁷ Yapsu nünü athabah, ‘O, ha are ah de müthsüde!’ ha nü mulong ching ajankhi, tüsho nü müknü angükhi hode alabah.

⁶⁸ Tüsho Atungpuhnü nüsa ki ha ruk thakhi limro yande sangkung chingnü Ijip lim belobah ayübah, ‘Nüsanü küyimkishe müngülo.’ Tüsho ju ching nüsabo riri ki athrürü tüsho aliberü azhorü thsüde ayinbah, tüshe shenü nüsa muthulo.”