YUZÜNGTHALO 26 - AMÜSÜH HÜM CL Bible (BSI)

Yimlu Kingaünbo

¹ “Küyimki nüsa Atungpuh nüsa Thrünpuhnü yamrüplurüp jihkhi lo ching arübanü, tüsho müküh-a ju ching labanü,

² nünü alo chingnü akhuh akhiukkhi luang, ju Atungpuh nüsa Thrünpuhnü nüsa kilim jihkhi lo chingnü hande arang, tüsho ju muluk ching yukbahle Atungpuh nüsa Thrünpuhnü api mung zopü mokhitkhi dangpung ching nahde yüang.

³ Tüsho nünü ju kim ching shepü amükeambuh lanü api ki yübahle thaang, ‘Atungpuhnü isa jipürü ki isa jihshihpü alokhikhi lomi ching I arüdo de Atungpuh nüsa Thrünpuh ki khihni inü thakhitchoh.

⁴ “Judüki amükeambuhnü nü khah chingnü muluk lubahle A TUN GPU H nü Thrünpuh kingaün sadam ki zobah.

⁵ Tüsho nünü Atungpuh nü Thrünpuh miki thabah: ‘Rümde atsahrü Aramrü ju I buh lakheah; tüsho api wühkhe nükde Ijip ching tsode yünü la; tüsho ju ching api trük ato, sühmüh lakhi tüsho wüh hihde kam.

⁶ Tüsho Ijiprünü isa kheahmüchihde thsümüchi, tüsho azhorü nangde rhimo amüküp nimkih-a rhimoshih.

⁷ Judüki isanü Atungpuh isa jipürü Thrünpuh ki zhide tha, tüsho Atungpuhnü isa düsheak so, tüsho isa thsümüchikhi, isa khisahkhi, tüsho isa junokhi ngü;

⁸ tüsho Atungpuhnü isa api wu-sühmüh khah chunghuhde, atrebe amütsan tüsho mihmüyinsahbe thsüde Ijip chingnü bekhit;

⁹ tüsho apinü isa ha dangpung ching bede arübah ha niuhke tüsho mukhuke bukkhi lomi isa kilim jih.

¹⁰ Tüsho kheahang, O Atungpuh , kheakü nünü I kilim jihkhi lo chingnü akhuh asokhi sangaso hande arüchoh.’ Muluk ju Atungpuh nü Thrünpuh miki zojang tüsho api miki khukningang.

¹¹ Tüsho nü le Levirü tüsho nüsa lung lakhi khiungkerünü Atungpuh nü Thrünpuhnü nü tüsho nü yamkhün kilim jihkhi atsübo alala ching asühachihbah.

¹² “Küyimki nünü thürü shihcham jihpü kam, kam asampü thürü shihchambo jihkhambanü, tüsho ju Levirü, mürerü, tüsho khimoberübo kilim jihbah arünü nüsa chipimurung khüp ching tsühbah bukthsübanü,

¹³ nünü Atungpuh nü Thrünpuh miki thabah: ‘Inü arüng shihcham I yam chingnü yihkhitdo, tüsho jurü Levirü, khiungkerü, mürerü tüsho khimoberü kilim, nünü I kilim thiyukhüm jihkhi yande jihdo; inü nü yukhüm mülakphah, yungsho inü jurübo mümihabah.

¹⁴ Inü ju I tüzhode alachoki kim ching mütsüh, yungsho mümüsühkhi rhimo thsungkheak inü müyihkhit, yungsho asherü kilim müjih. Inü Atungpuh I Thrünpuh yu anido, tüsho nünü I ki thiyukhüm jihkhi yande rhimodo.

¹⁵ Nü lapung amüsüh yinmi chingnü abinkhia kheahang, tüsho nü mihtsürü Israel tüsho nünü isa jipürü kheak thiyuchihchimkhi nangde, nünü isa kilim jihkhi, niuhke tüsho mukhuke bukkhi lomi müngühjang.’

Atungpuh Mihtsürü

¹⁶ “Ha nimung Atungpuh nüsa Thrünpuhnü harü yakzan tüsho thiyuzüngbo leangkhishihpü nüsa kilim thiyukhüm jihchoh; jumonü nüsanü kümkangde harübo nüsa mulong athrünkhinü tüsho nüsa me athrünkhinü aniang.

¹⁷ Khihni nüsanü Atungpuh ju nüsa Thrünpuh thsüpü alokhido, tüsho junangde nüsanü api limro ching tsahbah tüsho api yakzan, api yukhüm, tüsho yuzüngbo anibah.

¹⁸ Kheaküshe apinü nüsa ki thiyuchihchimkhi nangde, khihni Atungpuhnü nüsa api mihtsürü thsüpü alokhido, junangde nüsanü api yukhümbo anibah,

¹⁹ tüsho apinü nüsa mungshimungthu tüsho wüntre jihkhi ching trükbo kurungkheak shuhkihbah, tüsho apinü athakhi nangde, Atungpuh nüsa Thrünpuh miki nüsa amüsüh mihtsürü thsübah.”