YUZÜNGTHALO 22 - AMÜSÜH HÜM CL Bible (BSI)

¹ “Nü keoniorü moshipung yungsho namfimihnu nünü kheahde dütsoshih tüsho nü lupü amümürang düthsü; nünü keoniorü kilim belode arüjang.

² Tüsho nü keoniorü ju nü phünide mülasho, yungsho api mümükheahsho nü yam ching bedarang, tüsho nü keoniorünü müyimchoki khiungde nü yam ki labah; tüsho nünü api kilim jihlobah.

³ Nünü api yo donki tüsho khimmih she ju ruk thsang; nü keoniorü kukruk tümükhüh dükheakkhi nünü ngüsho, ju ruk thsang; nünü düramkhiramra.

⁴ “Nü keoniorü donki yungsho moshipung limro ching angaka yapkhi ngüsho, amümürang düthsü; nünü yihmusuloang.

⁵ “Aliberünü athrürü khimmih düyuk, yungsho athrürünü aliberü khimmih düyuk, tümüde hadürü rhimorü Atungpuh nü Thrünpuh miki athraneanbe lah.

⁶ “Limro ching nü müngüh sang kheak yungsho alo kheak wuhnu sap ching anunu yungsho ake hüpbah abe ngüsho nünü anunu lung abe ju dulu.

⁷ Nünü abe tsoshang tüsho anunu luang, junangde nü tsüde alabah tüsho kutsüpde alabah.

⁸ “Küyimki nünü thüyam aso thsübanü thüyam mün yande khudopü thsang, junangde ju kheaknü khürü ayokhikhi hode nü yam kheak thiyih bukkhi amülim marü.

⁹ “Nünü kurungasolu ching müjih mungji mahne düyang, jude yungsho nünü ayangkhi müjih mukhuhkhi tüsho kurungasolu ching sangaso müneanabahbah.

¹⁰ “Nünü moshipung tüsho donki ane nungde thulu düwochakshih.

¹¹ “Nünü alamlam khim tüsho khimthünak thsürua düphuyu.

¹² “Nünü nü khim münkheam phüyi ching amüngam müchea zoang.

Müzammüram Mülapü Dünkheak Yakzan

¹³ “Athrürü khülangnü niuberü lubah anihbe lung nungde alashu mulunede bahsho,

¹⁴ tüsho anihbe kheak achih kipde thade tüsho mung amütsü hande arüde, Inü ha liberü lukheah tüshe anihbe atsangkhitkhi liberü yung de müdamsho,

¹⁵ alibe tsangkhitkhi dünkheak anünübe bebuhrünü kiuto chipimurung ki azothsürübo ki thiyumütsan hande arübah.

¹⁶ Tüsho anünübe abuhnü azothsürübo ki thabah, ‘Inü I tsührü ha buh niube thsüpü jihkheah, tüsho apinü anihbe mulune;

¹⁷ kheakü apinü anihbe achih kipde thachoh, “Nü tsührü ha atsangkhitkhi liberü yung de inü ngüdo,” tüsho kheahang, I tsührü alibe tsangkhitkhi dünkheak thiyumütsan harü lah.’ Tüsho anihbe bebuhrünü kiuto azothsürübo miki khim dütrüna huhbah.

¹⁸ Judüki kiuto azothsürübonü mihtsürü ju bedarübah alakbah;

¹⁹ arünü api kheak shotoyinchi 100nü zhea anihbe bebuhrü kilim jihbah, tümüde ju buh, mihtsürünü Israel liberü kheak achih hande arüdo. Tüsho anihbe ju api niube thsübah; apinü anihbe rhangdung amuyung mübah.

²⁰ Tüshe dükde thsüa lasho tüsho anünübe thsungkheaknü atsangkhitkhi thiyumütsan mülasho,

²¹ arünü alibe ju abuh yam khimdopü ki bede akhiukbah, tüsho kiuto ching lakhi athrürübonü anihbe ju lungnü arusahbah, tümütüsho alibenü abuh yam chingnü müzammüramde achihbe rhimo Israel ching rhimodo; jumonü nüsanü amütsü mihtsürü nüsa bolungnü yihkhita bahang.

²² “Athrürü khülangnü püpürü niuberü kheak müzammüramsho ane chido sheshihbah; hanangde nüsanü amütsü mihtsürü Israel chingnü yihkhita bahang.

²³ Keoazokhi atsangkhit liberü khülang kiuto ching athrürü khülangnü shorubah anihbe kheak müzammüramsho,

²⁴ nüsanü ane chido kiuto chipimurung ching bede akhiukbah, tüsho ane lungnü rusahang, anünübenü arungkhishihpü kiuto ching müzhi, tüsho athrüpünü püpürü niuberü thsümünimdo; hanangde nüsanü amütsü mihtsürü nüsa bolungnü yihkhita bahang.

²⁵ “Tüshe athrürü khülangnü thiyu-zokhi liberü mükeak ching ngübahle arochihde bebah yapsho, athrüpü lang asheshihbah.

²⁶ Tüshe nüsanü anünübe kheak tümü dürhimo; anünübe kheak ashepü thülünde neak tümü müla, tümüde ha mihtsürü khülangnü nihbuh yamhingrü azhihde alaksahkhi ruk ah;

²⁷ tümüde apinü anihbe mükeak ching ngü, tüsho thiyu-zoa lakhi alibenü zhido, tüshe ju ching anihbe khümkhitpü she mülade alakheah.

²⁸ “Athrürü khülangnü thiyu-muzokhi atsangkhit anünürü ngübahle anihbe kheak müzammüramsho, tüsho ane ju ngükhitsho,

²⁹ alibe thsümünimbuh athrüpünü alibe abuh kilim shotoyinchi 50 jihbah, tüsho alibe ju api niube thsübah tümütüsho apinü anihbe thsümünimdo; api rhangdung amuyung apinü anihbe mübah.

³⁰ “Tüsho athrürü khülangnü abuh niube mulu, yungsho abuh niube kheak müzammüram müthsü.