YUZÜNGTHALO 21 - AMÜSÜH HÜM CL Bible (BSI)

Mihtsürü Laksahkhi Dünkheak

¹ “Atungpuh nüsa Thrünpuhnü nüsa lashihpü jihkhi lo ching khürü laksah-a thulu ching yapde ngüsho, tüsho shepünü api laksahkheanü mümükheahsho,

² nüsa yo azothsürübo tüsho mahkhaprübo yübah tüsho arünü mi thüninde alakhi kiutobo dükeak akea kheahbah.

³ Tüsho mi phünide alakhi kiuto ching lakhi azothsürübonü moshi drelü khülang küyimkishe mürhimoshihkhi tüsho sangkap munokhi lubah;

⁴ tüsho ju kiuto azothsürübonü moshi drelü ju ke bukpung jindükhün, thulu müthsüpung yungsho müjih muyukpung hande arübah arünü moshi drelü hung ju ayihshakbah.

⁵ Judüki Levi tsührü amükeamrübo ju phünide arübah, tümüde Atungpuh nüsa Thrünpuhnü api tankihshihpü tüsho Atungpuh mung ching müngühshihpü arü mokhit; arü yu hode neamneamruru tüsho laksahachihkhi dünkheakbo khikzhakbah.

⁶ Tüsho mihtsürü laksahkhi phünide alakhi kiuto ching larü azothsürübonü jindükhün chingnü ahung khapshakkhi moshi drelü kumungnü arü khah mütsakbah.

⁷ Jushu arünü athabah, ‘Isa khahnü ha thiyih bukshihkhi yung, yungsho isa müknü müngü.

⁸ O Atungpuh nünü rhokhitkhi nü mihtsürü Israel ki neak bahjang, tüsho amülim mükihkhi mihtsürü thiyih bukkhi amülim nü mihtsürü Israel bolung dülashih; tüshe thiyih bukkhi amülim arü ki neak bahjang.’

⁹ Junangde Atungpuhnü alümkhi rhimokhi hode, mihtsürü laksahkhi dünkheak nüsa hahmülang müla.

Thirithsü ching Ramkhi Aliberübo

¹⁰ “Küyimki nüsa riri bede keochihpü yübanü, tüsho Atungpuh nüsa Thrünpuhnü arü nüsa khah ching yukjihbahle arü rama lubanü,

¹¹ tüsho aramrü bolung nünü aliberü jak atsü ngübah mürühde nü niube thsüpü lubanü,

¹² nünü alibe nü yam lim bede arübah, tüsho anihbenü akuyü hütbah tüsho müzan lambah.

¹³ Anihbenü aramrü khimmih müthribah nü yam ching labah, tüsho abe le abuh thsungkheak khinu khülang tüzhobah; jushu nünü alibe luang.

¹⁴ Tüsho hanangde alabah, nünü anihbe kheak masühde lasho api zuzu thsüde dükheang, tüshe tsükjide nünü alibe sho mo düyin; nünü anihbe ki azhorü nangde dahori, tümütüsho nünü anihbe ki mükhemükim thsüdo.

Adüjibuh Yamrüplurüp

¹⁵ “Mihtsürü khülangnü niuberü mahne lubah khülang kheak muzho tüsho püpü kheak mümuzhosho, tüsho anenü api kilim tsührü zübejihkhi ching adüjibuh ju amümuzhobe kheak yo thsüsho,

¹⁶ hanangde alabah, mihtsürü khülangnü küyimki tsührübo kilim yamrüplurüp chamjihbanü, apinü jak kheahde anihbuhnü amuzhokhi niuberü kheak yo tsührü ki adüjibuh shihcham müjihbeah.

¹⁷ Tüshe apinü mümuzhokhi niuberü kheak yo tsührü adüjibuh kilim api lakhi shihcham mahne kinü alü jihde mütsanmükhibeah, tümüde api ju anihbuh sühmüh atankih ah; adüjibuh yo alim ju api yo.

Mihyumanikhi Tsührü

¹⁸ “Mihtsürü khülang tsührü mihmukhiuh tüsho azhihrü, danyukyuk she berü buhrü yu manirü lasho,

¹⁹ abuh le abe anenü api thobahle kiuto ching azothsürü miki chipimurung ki hande arübah.

²⁰ Tüsho arünü kiuto azothsürübo ki thabah, ‘Isa tsührü ha mihmukhiuh tüsho azhihrü ah; apinü isa yu mani, api bukchihrü tüsho amüshangrü khülang ah.’

²¹ Judüki kiuto ching lakhi mihtsürü alalanü api lungnü arusahbah; junangde nüsanü amütsürü nüsa bolungnü yihkhita bahang, tüsho Israelrü alalanü sobah atrebah.

Yakzanbo

²² “Mihtsürü khülangnü ashepü thülünde neak yihbeakbahle api sheshihsho, tüsho nüsanü api sangdung kheak zhinsho,

²³ api mi ju sangdung kheak tsüngreroro düzo, tüshe nüsanü api ju ninü kiuyuka bahang, tümüde shepü zhindünü Thrünpuh muthrumüneankhi ah. Atungpuh nüsa Thrünpuhnü nüsa kilim yamrüplurüp jihkhi lo nüsanü mümüneanbeah.