YUZÜNGTHALO 2 - AMÜSÜH HÜM CL Bible (BSI)

Sunglo ching Tsahkhi Kambo

¹ “Judüki isa rholobahle Atungpuhnü I ki thakhi nangde Amürüm Keto limro yande sunglo lim yü, tüsho isa Seir wung ching nimung ashang rümde tsah.

² “Tüsho Atungpuhnü I ki tha,

³ Nüsa ha wung ching ashangkhüh rümde tsahdo; dukulim rholoang.

⁴ Tüsho mihtsürübo ki thaang, Nüsa Seir ching lakhi, Esau tsühsoniusobo, nüsa keoniorü lomi hode ayüpü khiungmuroh; tüsho arübonü nüsa trebah. Jumonü nüsabo kümkangang.

⁵ Arü bebah dükeochih, tümüde inü arü lo nüsa kilim jingdükü khülang lang she müjih, tümütüsho inü Esau kilim Seir wung ju api yamalo thsüshihpü jihdo.

⁶ Nüsanü arü kheaknü tsühyungpü shonü thuloa tsühang; tüsho ke she shonü thuloa yungang.

⁷ “Tümüde Atungpuh nüsa Thrünpuhnü nüsa khah rhimokhi alala ching müngühjihdo. Apinü nüsa ha sunglo ato hode keaksahde atsahkhi mükheahlah. Ha kam yirü Atungpuh nüsa Thrünpuh nüsa lung lado; tüsho nüsa tümü she müngüde müla.

⁸ “Jumonü isa keoniorü Esau tsühsoniusobo, Seir ching larü hode Elath tüsho Ezion Giber chingnü atukhi Araba limro kheaknü rholobah, Moab limro sunglo yande yü.

⁹ Tüsho Atungpuhnü I ki tha, Moabrü kheak thsümütsü düjih yungsho arü bede dükeochih, tümüde arü lo dangkhüh lang she inü nüsa kilim müjih. Inü Ar ju Lot tsühsoniusobo kilim yamalo thsüshihpü jihdo.”

¹⁰ (Adüso ju ching mihtsürü ato tüsho wüh hihkhi Anakim nangde Emimrü lakheah.

¹¹ Anakim nangde arü ju atoshang khede alakheah, tüshe Moabrünü arü ki Emim de ji.

¹² Adüso Horrü ju Seir ching lakheah, tüshe Atungpuhnü ajihkhi lo ching Israelnü arhimokhi ruk, Esau tsühsoniusobonü arü müngühnü yankhita bahde thsümünima bahbahle arü lapung ching lakheah.)

¹³ “Kheakü asürang tüsho Zered jindükhün hode yüang. Jumonü isa Zered ayung hode yü.

¹⁴ Tüsho isa Kadesh-barnea chingnü tsahmusubah Zered ayung hochoki kam samrükheak tizheah bankhit. Atungpuhnü arü ki thiyuchihchimkhi nangde, thirithsürü mihtsürü lün binkheampung chingnü shekham.

¹⁵ Tümüde arübo binkheampung chingnü müsheshihyi khiungde Atungpuhnü azhihkhi khah arü kheak lakheah.

¹⁶ “Thirithsürü mihtsürübo shekhamshu,

¹⁷ Atungpuhnü I ki tha,

¹⁸ Khihni nüsa Ar limro yande Moab lomi hode ayübah.

¹⁹ Tüsho küyimki nüsa Amon mihtsürü phünide arübanü, arübo düthsümüchi yungsho bede dükeochih, tümüde Amonrü lo dangkhüh lang she inü nüsa kilim müjih, tümütüsho inü ha Lot tsühsoniusobo kilim yamalo thsüshihpü jihdo.”

²⁰ (Ju she adüso atoshang Rephaimrü lapung lo khede alakheah. Tüshe Amonrünü arü ki Zamzummim de ji,

²¹ mihtsürü ato, wüh hihkhi, tüsho Anakrü lo; tüshe Atungpuhnü Amonrü müngüh arübo dükheakshih, junangde arünü yankhita bahbah arü lo ching la;

²² Atungpuhnü Seir ching lakhi Esau tsühsoniusobo Edomrü kheak she ju ruk rhimo, apinü Horrü dükheakshih, junangde Edomrünü arü yankhita bahbah ju ching la, ju khihni khiungde arü lachoh.

²³ Tüsho kiulongbo ching Gaza khiungde alakhi Avvimrü ju Kaphtor chingnü arükhi Kaphtorrünü arü dükheakshihbah ju ching la.)

²⁴ “Asürang, tsahmusuang tüsho Arnon ayung hode yüang. Kheahang, Amorrü Sihon, Heshbon kiulongthsüpuh, tüsho api lo inü nüsa khah ching jihdo. Api bede keochihang tüsho api lo müküh-a lung.

²⁵ Ha nimungnü rünbah thüning bukkhüp trükshihbo kheak nüsa dünkheaknü amüyinsahkhi tüsho atrebe yükihshihbah. Arünü nüsa dünkheak sobah trede ajanbah.

Israelnü Sihon Kiulongthsüpuh Kukkhi

²⁶ “Tüsho inü yunithsürü mungtsü yusheak hanbah, Kedamoth sunglo chingnü Heshbon kiulongthsüpuh Sihon kilim yüshih tüsho tha:

²⁷ Isa nü lo hode yüanü; isanü limro ching lang atsahbah, tüsho tsülim yungsho huzulim müyü.

²⁸ Nünü isa ki jim le ke sho mo yinjang tüsho isanü tsühyungbah; judü lang isa jingnü hoshang,

²⁹ ju Esau tsühsoniusobo Seir ching larü tüsho Ar ching larü Moabrünü, Atungpuhnü isa kilim jihkhi lo ching yüchoki Jordan muhoyi khiungde isa kheak rhimokhi nangde.

³⁰ “Tüshe Heshbon kiulongthsüpuh Sihonnü isa muhoshih, tümüde khihni ha nangde, api nüsa khah ching jihpü Atungpuh nüsa Thrünpuhnü api me tüsho mulong müküpshih.

³¹ “Tüsho Atungpuhnü I ki tha, Kheahang, Inü Sihon tüsho api lo nüsa kilim jihpü tankihdo. Ju mükühpü tankihang, junangde nüsanü api lo yamrüplurüp lubah.

³² Judüki Sihon tüsho api mihtsürü alala isa azhihde keochihpü Jahaz ching akhiuk.

³³ Tüsho Atungpuh isa Thrünpuhnü api isa kilim jih; jumonü isanü api, atsührübo, tüsho api mihtsürü alala kukkheah.

³⁴ Judüki isanü api kiutobo ludo, tüsho athrürü, aliberü, tüsho kiuto ching lakhi azürü aninibo sheshe maningshihde dükheakkhamshih.

³⁵ Tüshe akam-shiwühbo tüsho kiutobo chingnü ayankhikhi kukrukbo lang isanü ludo.

³⁶ Arnon jindükhün chinkheam kheak lakhi Aroer jindükhün ching lakhi kiuto, Gilead khiungde, kiuto khülang lang she isa thsungkheaknü chipi müküpde mülakheah; Atungpuh isa Thrünpuhnü alala isa khah ching jih.

³⁷ Tüshe nüsanü Amonrü lo lu, yungsho Jabbok ayung hingbo, awung kiutobo ching, yungsho Atungpuh isa Thrünpuhnü düyü de athakhi ching lang phünide müyü.