YUZÜNGTHALO 16 - AMÜSÜH HÜM CL Bible (BSI)

Phungho-thünio Thalokhi

¹ “Abib khinu leangkhiang, tüsho Atungpuh nüsa Thrünpuh ki phungho-thünio mungang, tümüde Abib khinu ching Atungpuh nüsa Thrünpuhnü nüsa azhing ching Ijip chingnü bekhit.

² Jumonü nüsanü mihnu tüsho moshi bolungnü yihkhitbah api mung zopü Atungpuhnü mokhitkhi dangpung chingnü Atungpuh nüsa Thrünpuh kilim phungho-thünio shuhmülanga kingaünang.

³ Nüsanü ju phaüm yukkhi yikhap lung dütsüh; nimung thüne nüsanü ju lung phaüm muyukkhi yikhap tsühbah, ju thsünükhi yikhap (tümüde nüsa Ijip chingnü niokheamde akhiuk), junangde nüsanü nüsa Ijip chingnü akhiukkhi rhangdung amuyung lümkhitbah.

⁴ Tüsho nimung thüne nüsa lomi alala ching nüsa bolung phaüm düngüshih, yungsho nüsanü atan ni shuhyini ching kingaünkhi shih yapsu khiungde daningshih.

⁵ “Nüsanü phungho-thünio ju Atungpuh nüsa Thrünpuhnü ajihkhi chipimurung khüpnü dükingaün;

⁶ tüshe Atungpuh nüsa Thrünpuhnü api mung zopü mokhitkhi dangpung chingnü ani yüzahchoki, shuhyini ching nüsa Ijip chingnü akhiukkhi kim ching kingaünang.

⁷ Tüsho nüsanü ju ngübahle Atungpuh nüsa Thrünpuhnü mokhitkhi dangpung chingnü tsühang, tüsho yapsu nüsanü alode nüsa khimyambo ching yüang.

⁸ Nimung thuruk nüsanü phaüm muyukkhi yikhap tsühbah tüsho athüne nipü nüsanü Atungpuh nüsa Thrünpuh kilim amüsüh amukhung labah. Nüsanü ju ni tümü dürhimo.

Yimlukhi Thünio

⁹ “Nüsanü nüsa thsungkheak amunimung thüne kheang; nüsa hirhüpbenü hi rhüpmusuchoki kimnü rünbah amunimungbo ju kheang.

¹⁰ Tüsho Atungpuh nüsa Thrünpuhnü amüngühjihkhi chingnü salade nüsanü kingaün jihkhinü yimlukhi thünio ju mungang.

¹¹ Nü tüsho nü tsührü le tsührübe, nü yamlabuhrü le yamlaberü, nüsa chipimurung khüp lakhi Levirü, hanrü tüsho mürerü tüsho nüsa lung lakhi khimoberü alalanü Atungpuh nüsa Thrünpuhnü api mung zopü mokhitkhi dangpung chingnü Atungpuh Thrünpuh miki asühachihang.

¹² Tüsho nüsa Ijip ching azhorü lakheah de nüsanü lümkhitang, tüsho nüsanü harü yuzüngbo anide arhimopü kümkangde alabeah.

Arüngkhimyam Thünio

¹³ “Küyimki nüsanü rhimopung chingnü hi tüsho yukhu nitpung ching kurungaso hanmukhungbanü arüngkhimyam thünio nimung thüne mungang;

¹⁴ tüsho nü le nü tsührü tüsho tsührübe, nü yamlabuhrü tüsho yamlaberü, Levirü tüsho nüsa chipimurung khüp lakhi hanrü, mürerü tüsho khimoberünü thünio jimpung thsakhamkhi ching asühachihang.

¹⁵ Atungpuhnü amokhitkhi dangpung ching nüsanü Atungpuh nüsa Thrünpuhnü nüsa rhimokhibo tüsho nüsa khahnü arhimokhi ching müngühjihbah; junangde nüsa tsükjide asühachihbah.

¹⁶ “Kam chingnü mahsam ki nüsa athrürü alala apinü amokhitkhi dangpung ching Atungpuh nüsa Thrünpuh miki mukhungbeah: Phaüm muyukkhi yikhap thünio ching, yimlukhi thünio ching tüsho arüngkhimyam thünio ching; tüsho arünü khahkeangnü Atungpuh miki marübeah.

¹⁷ Athrürü abannü A TUN GPU H nüsa Thrünpuhnü müngühjihkhi ayannü nihbuhnü akukkhi thülün jihbeah.

Thiyuronü Arhimobe

¹⁸ “Atungpuh nüsa Thrünpuhnü ajihkhi chipimurungbo ching nüsanü mahkhaprü tüsho atorübo nüsa trükbo yande moyukang, tüsho arünü thiyuro mahkhapkhi yande mihtsürübo ki mahkhapbah.

¹⁹ Nünü thiyuro amülim dükamshih; nünü jakkheahkukheah dühuh, yungsho buknim düleangkhi, tümüde buknimnü lümlung larü mük tukshihchoh tüsho thiyuro tharü yu thophülapjihchoh.

²⁰ Nünü küju thiyuroanü ju yimang, junangde nü rhangdung labah tüsho Atungpuh nüsa Thrünpuhnü ajihkhi lo yamrüplurüp lubah.

²¹ “Nünü Atungpuh nü Thrünpuh kingaün sadam thsükhi ki sangthsü tümü dükhim.

²² Atungpuh nü Thrünpuhnü athraneankhi amüsüh dungjing nünü dükhim.