YUZÜNGTHALO 14 - AMÜSÜH HÜM CL Bible (BSI)

Tüzhopü Zhipdokhi

¹ “Nüsa ju Atungpuh nüsa Thrünpuh tsührü ah; asherü thsungkheaknü nüsanü nihbuh küdah thsüde dütsüt yungsho kingkang kheak kuyü dühüt.

² Tümüde Atungpuh nüsa Thrünpuh kilim nüsa amüsüh mihtsürü ah, tüsho alomi mihtsürü alala kurungkheak lakhit atsübe Atungpuhnü api thsungkheak nüsa mokhit.

Amüsüh tüsho Mümüsühkhi Shiwühbo

³ “Nünü athraneanbe mungji tümü she dütsüh.

⁴ Nünü shiwüh harü tsühpü kuklah: moshipung, namfimihnu, mihnu,

⁵ shihmüchi, dakdakpü, khuduhshih, mütüm mihnu, awung mihnu, shahyih, awung namfimihnu.

⁶ Tüsho nünü shiwüh bolung abiuo dübeakkhi tüsho sangrung mukhiuhkhitloa müjakbebo tsühpü kuklah.

⁷ Judüalalashe sangrung müjakbe yungsho abiuo dübeakkhi harü ha mütsüh: kemel, ayipungshih tüsho loyeak, tümüde arübonü sangrung müjakchoh tüshe abiuo müdübeak; arübo nüsa thsungkheaknü mümüsüh.

⁸ Tüsho kheaknu she nüsa thsungkheaknü mümüsüh, tümütüsho abiuo dübeaklah tüshe sangrung mümüjak; nünü jurü shiwüh dütsüh yungsho ashemi düqiu.

⁹ “Ke ching lakhi aghi tüsho aphülap kihkhi alala nüsanü atsühpü kuklah.

¹⁰ Tüshe tümüpürü aghi tüsho aphülap mükihnü nüsanü dütsüh; ha nüsa thsungkheaknü mümüsüh.

¹¹ “Nüsanü amüsüh wuhnu alala tsühpü kuklah.

¹² Tüshe nüsanü harü dütsüh: müleang, müleangtopü, ke müleang,

¹³ chitri, tüsho müleangmuchu mungjibo,

¹⁴ khüyak mungjibo;

¹⁵ wuletopü, yapnebe, ke khüjak, tüsho arilupü mungjibo;

¹⁶ lungru trüngzapü, lungrutopü, kewunu,

¹⁷ ke fadak, merham, thüngüh tsühbe lungru,

¹⁸ ke wuhnu, kewüh mungjibo; asherü wuhnu tüsho phihnuliplip.

¹⁹ “Aghi kihkhi rireakrikobo nüsa thsungkheaknü mümüsüh; jurübo dütsüh.

²⁰ Nüsanü wuhnu amüsüh alala tsühpü kuklah.

²¹ Nüsanü tümükhüh akeangnü ashekhi dütsüh; nüsanü ju nüsa kiuto ching lakhi hanrü ki jihpü kuklah, junangde apinü ju tsühbah, yungsho nüsanü ju khiungkerü ki yinjang; tümüde nüsa ju Atungpuh nüsa Thrünpuh kilim amüsüh mihtsürü ah. Nüsanü mihnu nunu abe niuhke ching dükhiung.

Thürü Shihcham Yakzan

²² “Kam abande thulu chingnü akhiukkhi hi thürü shihcham nünü dükde jihang.

²³ Tüsho nünü kingaünkhi hi, yukhu aso tüsho oliv müdangke, tüsho moshi le mihnu boto chingnü akhuh adrekhi api mung lashihpü mokhitkhi dangpung ching Atungpuh nü Thrünpuh mikinü tsühang, junangde nünü kamruhroro Atungpuh nü Thrünpuh wüntrepü mükheahbah.

²⁴ Tüsho Atungpuh nü Thrünpuhnü api mung lashihpü mokhitkhi dangpung ju khide limshukhi hode Atungpuhnü amüngühjihkhi thürü shihcham hande müyükhuksho,

²⁵ nünü ju sho mo müthriang, tüsho nü khah ching zhimbahle Atungpuh nü Thrünpuhnü mokhitkhi dangpung ching yüang,

²⁶ tüsho sho ju nünü amulongkhi ching bahang–moshipung, namfimihnu, yukhu yungsho ayungbe amüküp yungsho nünü akünkhibo; tüsho nünü ju ching Atungpuh nü Thrünpuh miki nü tüsho nü yamkhünnü tsühde asühachihang.

²⁷ “Tüsho nüsanü kiutobo ching lakhi Levirü dübahyuk, tümüde api nüsa lung shihcham yungsho yamrüplurüp müla.

²⁸ Kam asampü akheam aban ching ju kam akhiukkhi thürü shihcham hande arang tüsho nüsa kiutobo ching zomukhungang,

²⁹ junangde nüsa lung shihcham yungsho yamrüplurüp mülarü Levirü, müshihyih-larü, mürerü, khimoberübo nüsa kiutobo ching larübo arübah reangkeamde atsühbah; junangde Atungpuh nüsa Thrünpuhnü nüsa khahnü arhimokhi alala ching müngühjihbah.