YUZÜNGTHALO 12 - AMÜSÜH HÜM CL Bible (BSI)

Kingaün Dangpung Khülang

¹ “Harü ha Atungpuh nüsa jipürü Thrünpuhnü nüsa müküh-a lushihpü jihkhi lo ching nüsa alomi ching lachoki amuyungnü kümkangde rhimode alapü yakzanbo tüsho thiyuzüngbo lah.

² Nüsanü yankhita bahpü lakhi trükshihbonü arü thrünpuhbo tankihkhi dangpungbo müzüng achangbo ching awungbo tüsho sangdung aphüyak bukkhüp lakhibo alala thsümünima bahjang.

³ Tüsho nüsanü arü kingaün sadam thsümünimjang, amüsüh dungjingbo kingkheamjang tüsho sangthsükhi thrünpuhbo monü taka bahjang; sangthsükhi thrünpuhbo nüsanü kiukheama bahjang tüsho ju dangpung chingnü arü mung dükheakshang.

⁴ “Arünü arhimokhi yande nüsanü Atungpuh nüsa thrünpuh dükingaün.

⁵ Tüshe Atungpuh nüsa Thrünpuhnü api lapung thsungkheak api mung zopü nüsa trükbo lungnü amokhitkhi dangpung nüsanü yimang; tüsho ju ching nüsa yübah.

⁶ Ju ching nüsanü taka kingaünbe, shuhmülanga kingaünbe, thürü shihchambo, büthsüde kingaünbe, thiyuchihchimkhi kingaün, amulongkhi kingaün tüsho moshi le mihnu bolungnü akhuh adrekhibo hanbah arang;

⁷ nüsanü arhimokhi alala ching nüsa le nüsa yambukbonü, Atungpuh nüsa Thrünpuh mikinü atsühbah tüsho asühachihbah, tümütüsho Atungpuh nüsa Thrünpuhnü nüsa müngühjihdo.

⁸ “Ha ching khihni isa mihtsürü abannü nihbuh künkhi rhimokhi nangde nüsanü dürhimo;

⁹ tümüde Atungpuh nüsa Thrünpuhnü ajihpü lakhi sühakhimpung tüsho yamrüplurüp nüsanü mukhiungyi.

¹⁰ Tüshe küyimki nüsa Jordan hode yübah Atungpuh nüsa Thrünpuhnü yamrüplurüp jihkhi ching, apinü nüsa mühirü thiriribo kheaknü sühakhimshihde nüsa akhümkhit ching labanü,

¹¹ judüki Atungpuh nüsa Thrünpuhnü api mung lashihpü mokhitpung ching inü nüsa ki thiyukhüm jihkhi lüpdükhi lubah arang: nüsanü taka kingaünbebo, laksah-a kingaünbe, thürü shihcham, arung kingaünbo tüsho nüsanü Atungpuh ki thiyuchihchimde mokhitkhi kingaünbo.

¹² Tüsho A TUN GPU H nüsa Thrünpuh miki nüsa tüsho nüsa tsührübo le tsührübebo, nüsa yamlarü athrürü le aliberübo, tüsho nüsa kiutobo ching lakhi Levirü bebah asühachihang, tümüde Levirü a nüsa lung nihbuh shihcham yungsho yamrüplurüp müla.

¹³ Nüsanü angükhi dangpung abande taka kingaünkhi müjihpü kümkangang;

¹⁴ tüshe Atungpuhnü nüsa trük bolungnü amokhitkhi dangpung ching, nüsanü taka kingaünang, tüsho ju ching nüsanü inü thiyukhüm jihkhi alala rhimobeah.

¹⁵ “Judüalalashe, Atungpuh nüsa Thrünpuhnü nüsa kilim jihkhi müngühmühi yande, nüsa kiutobo chingnü dakdakpü tüsho shihmüchi laksah-a nüsa künthülün tsühpü kuklah; amümüsüh tüsho amüsüh thsüthsü atsühpü kuklah.

¹⁶ “Nüsanü athiyih lang dütsüh; nüsanü ju ke nangde alo kheak dunga bahang.

¹⁷ Nüsanü nüsa hi thürü shihcham yungsho yukhu yungsho oliv müdangke yungsho moshi le mihnu akhuh adrekhi yungsho thiyuchihchimkhi kingaün, yungsho mulongkhi kingaün yungsho nüsanü arung kingaünkhibo nüsa kiutobo chingnü dütsüh;

¹⁸ tüshe nü tüsho nü tsührü le tsührübe, yamlarü athrürü le aliberübo tüsho kiutobo ching larü Levirübonü jurübo Atungpuh nüsa Thrünpuh miki apinü amokhitkhi dangpungnü tsühang; tüsho nüsanü arhimokhi alala ching Atungpuh miki asühachihang.

¹⁹ Nüsanü nüsa lo ching lachoki amuyung Levirübo mübahyukpü kümkangang.

²⁰ “Küyimki Atungpuh nü Thrünpuhnü thiyuchihchimkhi nangde nü lomi toshihbanü tüsho nünü shih tsühnekhi hode, I shih tsühnelah de athabanü, nü mulongnü akünthülün tsühpü kuklah.

²¹ Atungpuh nü Thrünpuhnü api mung zopü mokhitkhi dangpung ju nü kheaknü khide limshusho, inü nü ki thiyukhüm jihkhi yande, Atungpuhnü nü kilim jihkhi moshi yungsho mihnu khürü laksahang; tüsho thüyam chingnü nü künthülün tsühpü kuklah.

²² Dakdakpü tüsho shihmüchi tsühkhi nangde nünü ju tsühpü kuklah; amümüsüh tüsho amüsühbo tsühpü kuklah.

²³ Nünü athiyih lang mütsühpü mütsanang tümüde thiyih ju rhangdung, tüsho nünü rhangdung ju shih lung mütsühbeah.

²⁴ Nünü ju dütsüh; nünü ju ke nangde alo kheak dunga bahang.

²⁵ Nünü ju dütsüh, junangde küyimki nünü Atungpuh miki alungki rhimobanü, nü tüsho nü dunglim tsührübo kheak tsüde alabah.

²⁶ Nü yo amüsüh kukrukbo, tüsho thiyuchihchimkhi kingaünbo nünü lubah Atungpuhnü amokhitkhi dangpung ching yüang.

²⁷ Tüsho nünü taka kingaünkhi shih tüsho thiyih Atungpuh nü Thrünpuh kingaün sadam kheak kingaünang; tüsho nünü laksah-a kingaünkhi thiyih ju Atungpuh nü Thrünpuh kingaün sadam kheak bukkihang, tüsho nünü shih ju tsühang.

²⁸ Inü nü ki thiyukhüm jihkhibo ha leangkhiang tüsho aniang, junangde küyimki nünü Atungpuh nü Thrünpuh miki atsü tüsho alungki rhimobanü nü tüsho nü dunglim tsührübo kheak lünnü tsüde alabah.

Sangthsü Dünkheak Thakhi

²⁹ “Küyimki Atungpuh nüsa Thrünpuhnü trükshihbo nüsa müngühnü adükheakshihbanü tüsho nüsanü arü yankhita bahbah arü lo ching labanü,

³⁰ arübo nüsa müngühnü dükheakabahshu arü dunglim müyanpü nüsanü kümkangang, tüsho harübonü arü thrünpuhbo küruk tankihkheanü ju ruk inü she rhimoanü de thade arü thrünpuhbo dünkheak dükeokhikeora.

³¹ Nünü Atungpuh nü Thrünpuh judürü limro chingnü dükingaün; tümüde Atungpuhnü athraneankhi alala arünü arü thrünpuhbo ki rhimodo; tümüde arünü arü tsührü tüsho tsührübebo she arü thrünpuhbo kilim kingaünde mo ching takdo.

³² Inü tümüpürü nüsa ki thiyukhüm jihchonü ju rhimopü kümkangang; nüsanü ju ching düyukajak yungsho yihkhita she dübah.