YUZÜNGTHALO 11 - AMÜSÜH HÜM CL Bible (BSI)

Amuzho tüsho Mihyuanikhi

¹ “Jumonü nünü Atungpuh nü Thrünpuh muzhoang, tüsho apinü alunekhibo, yakzanbo, thiyuzüngbo, tüsho thiyukhümbo kamruhroro zoang.

² Atungpuh nü Thrünpuhnü thsangdankhi nü tsührübonü müngü tüsho mümükheah de khihni lümkhitang: Api wüntre-müretah, api khah ato; achungkhitkhi khah;

³ amütsanbo tüsho api rhimobo Ijip ching Pharao kiulongthsüpuh ki tüsho api lomi alala ching rhimokhi,

⁴ tüsho apinü Ijip bonungrü, arü khorabo tüsho khora-lolungbebo kheak rhimokhi; apinü arü nüsa müshamde arüchoki Amürüm Keto bukmishihkhi, tüsho Atungpuhnü arü khihni ha khiungde dükheakshihkhi;

⁵ tüsho nüsa ha dangpung mukhiungyi khiungde apinü nüsa ki sunglo ching rhimokhi;

⁶ tüsho apinü Reuben tsührü, Eliab tsührübo Dathan tüsho Abiram kheak rhimokhi; alonü amün kabah, arü yambukbo, khimyambo tüsho Israelrü bolung arü yande arükhi rhangdung labe alala arü lung muyuabahkhi;

⁷ tümüde Atungpuhnü rhimo ato rhimokhi alala nüsa müknü ngüdo.

Alokhikhi Lo Müngühmühibo

⁸ “Jumonü khihni inü nüsa kilim jihkhi thiyukhüm alala aniang, junangde, nüsanü amükühpü hode ayüpü lomi ching yüzahpü sühmüh labah tüsho alubah,

⁹ tüsho junangde Atungpuhnü nüsa jipürü tüsho arü tsühsoniuso kilim jihpü thiyuchihchimkhi niuhke tüsho mukhuke bukde alakhi lo ching nüsa kutsüpde alabah.

¹⁰ Tümüde nüsanü yübah müküh-a lupü lakhi lo ju nüsa arüpung Ijip lo nangde yung, ju ching nüsanü wotsühworabe tüsho awündo nangde müjih yang tüsho nüsa jingnü tsahde ke duh;

¹¹ tüshe nüsanü müküh-a lupü lo ju thüning ching tsüngkenü adütsütkhi awungbo tüsho jindükhünbo lah,

¹² alo ju Atungpuh nüsa Thrünpuhnü kümchoh; kam atankihnü kam akheam khiungde Atungpuh nüsa Thrünpuh mük ju kheak lachoh.

¹³ “Tüsho nüsanü khihni inü ajihkhi thiyukhümbo düshihde anide, nüsa mulong athrünkhinü tüsho me athrünkhinü Atungpuh nüsa Thrünpuh tankihsho,

¹⁴ nüsa lo thsungkheaknü inü akheahmünchi ching, akhuhbe tüsho ashube tsüng arüshihbah, junangde nüsanü hi, yukhu tüsho oliv müdangke hanmukhungbah.

¹⁵ Tüsho inü nüsa lubo ching nüsa akam-shiwüh thsungkheak rim mukhuhshihbah, tüsho nüsanü akünkhi tsühyungpü tsühde nüsa bukthsübah.

¹⁶ Nüsanü ha tsüde aniang, jude yungsho nüsa mulong bephülapde püpürü thrünpuhbo tankihbah tüsho kingaünbah,

¹⁷ jude yungsho nüsa azhihde Atungpuhnü bukakhiukbah, tüsho apinü thüning khimdobah tsüng marüshih, tüsho alonü tümü makhiukshih, tüsho Atungpuhnü nüsa kilim jihkhi lo chingnü nüsa nahde adükheakbah.

¹⁸ “Jumonü nüsanü I yu harübo nüsa mulong tüsho me ching zoang tüsho jurübo mümihpü thsüde nüsa khahbo tüsho kingkangbo kheak rümkihang.

¹⁹ Nüsa yam ching binchoki, nüsa limro ching tsahchoki, nüsa ayapchoki tüsho asürüchoki nüsanü harü nüsa tsührübo ki thsangyubah.

²⁰ Tüsho nüsanü jurübo nüsa yam ripit dungjingbo tüsho chipimurungbo kheak thrütkih-a zoang,

²¹ junangde Atungpuhnü nüsa jipürü ki arü jihpü thiyuchihchimkhi lo ching alomi kumung thüning lakhi khiungde nüsa le nüsa tsührübo kutsüpde alabah.

²² “Tümüde nüsanü kümkangde arhimopü thsüde inü thiyukhüm jihkhi ha thiyukhümbo Atungpuh nüsa Thrünpuh muzhopü, api limro ching tsahpü tüsho api kheak chingkihde alapü mihyuanisho,

²³ Atungpuhnü arü trükshihbo nüsa müngühnü yankhita bahbah, tüsho nüsa kheaknü atobe tüsho wu-sühmüh lakhi trükbo nüsanü yankhita bahbah.

²⁴ Nüsa jinglungnü athrümkhi dangpung aban nüsa yo thsübah: sunglo tüsho Lebanon chingnü Euphra yung kheaknü Mediterranean Keto she khiungde nüsa lomi thsübah.

²⁵ Mihtsürü shenü she nüsa azhihde müzhipkhuk; apinü nüsa ki thiyuchihchimkhi nangde, nüsanü tsahyukde ayüpung lomi alala ching nüsa dünkheak phüthsaksümde tüsho trede akamshihbah.

²⁶ “Kheahang, inü khihni nüsa miki müngühmühi khülang tüsho muthrumünean khülang zojihchoh:

²⁷ khihni inü nüsa ki thiyukhüm jihkhi Atungpuh nüsa Thrünpuh yukhümbo anisho müngühmühi;

²⁸ tüsho inü nüsa khihni thiyukhüm jihkhi Atungpuh nüsa Thrünpuh yukhümbo manide rholobah nüsanü mümükheahkhi püpü thrünpuhbo kilim yüsho, muthrumünean.

²⁹ Tüsho ha ruk labah, küyimki Atungpuh nüsa Thrünpuhnü nüsanü amükühpü lakhi lo ching bedarübanü, Gerizim müzüng kheaknü müngühmühi zhiyukang tüsho Ebal müzüng kheaknü muthrumünean zhiyukang.

³⁰ Jurübo Jordan hobah, aniyüzahlim peang Araba ching lakhi Kananrü lo ching Gilgal phünide, More thülamsang yean lah yung de?

³¹ Tümüde Atungpuh nüsa Thrünpuhnü nüsa kilim jihkhi lo müküh-a lupü thsüde nüsa Jordan hode ayübah; tüsho küyimki nüsanü ha müküh-a lubah ju ching labanü,

³² khihni inü nüsa miki zojihkhi yakzanbo tüsho thiyuzüngbo nüsanü kümkangde rhimoang.