YUZÜNGTHALO 1 - AMÜSÜH HÜM CL Bible (BSI)

Huhtan Yukhüm

¹ Thiyu harübo ha Mosanü Israelrü alala ki sunglo ching Jordan thrippeang, adükhün ching Suph miki, Paran, Tophel, Laban, Hazeroth tüsho Dizahab dükeak chingnü athakhibo ah.

² Horeb chingnü Seir Awung limro yande Kadesh-barnea khiungpü nimung thürükheak khülang ah.

³ Kheakü kam yirü, khinu thürükheak khülang, akhuhbe nimung ching Atungpuhnü arü thsungkheak thiyuzüngbo api kheak jihkhi nangde Mosanü Israel mihtsürübo ki tha.

⁴ Ha apinü Heshbon ching lakhi, Amor kiulongthsüpuh Sihon, tüsho Ashtaroth le Edrei ching lakhi Bashan kiulongthsüpuh Og laksahshu lakheah.

⁵ Moab lomi ching Jordan hobah, Mosanü ha yakzan yihthünaka huhpü tankih. Apinü tha,

⁶ “Atungpuh isa Thrünpuhnü isa ki Horeb chingnü tha: Nüsa ha wung ching ashangkhüh lado.

⁷ Rholoang tüsho nüsa tsahmusuang, tüsho Amorrü wungbo, adükhün ching lakhi phünirü lapungbo, awungbo tüsho lokeambo, düjinglim tüsho keto yean Kanan tüsho Lebanonrü lo ching, Euphra yung ato khiungde yüang.

⁸ Kheahang, inü nüsa müngüh alo zojihlah; Atungpuhnü nüsa bebuhrübo– Abraham, Isak tüsho Jakob tüsho arü dunglim tsührübo kilim jihkhi lo ching yüzahbah mükühang.”

Mosanü Mahkhaprübo Mokhitkhi

⁹ Tüsho judüki inü nüsa ki thado, “I langzünü nüsa bepü khide hahmülang tolah.

¹⁰ Atungpuh nüsa Thrünpuhnü nüsa wüh bushihdo, tüsho thüning ching lakhi amükhebin chiningbo nangde, khihni nüsa ha ching lah.

¹¹ Atungpuh nüsa bebuhrü Thrünpuhnü nüsa kheakü lakhi kheaknü chithürü ki alü apinü tangzüngkhi nangde nüsa müngühshang!

¹² Tüshe küde thsah I langzünü nüsa lümkhilümduh hahmülang tüsho nüsa atsangachihkhi hankhukpü?

¹³ Lümlung larü, anikhitrü, tüsho mükheahmudurü mihtsürübo nüsa trükbo chingnü mokhitang, tüsho inü arübo nüsa kurungkheak akubo thsüshihbah.

¹⁴ Tüsho inü athakhi ha arhimopü tsülah de nüsanü mulongkhitde tha.

¹⁵ Jumonü inü nüsa trükbo ching akubo, lümlung larü tüsho mükheahmudurü mihtsürübo lubahle nüsa kurungkheak, chithürü limberü, chi limberü, thürü limberü tüsho nüsa trükbo thsungkheak atorübo mokhitjih.

¹⁶ “Tüsho judüki inü nüsa mahkhaprübo ki tha, Nüsa keoniorü dükeak mahmungbo aniakheahang, tüsho keoniorü dükeak yungsho api lung lakhi khiungkerü dükeak thsüthsü alungkinü khapjang.

¹⁷ Nüsanü mahkhapkhi ching jak dükheah; nüsanü aninirü tüsho atorü ane chido yu aniang; nüsanü mihtsürü sheshe dütre, tümüde mahkhapkhi ju Thrünpuh yo. Khide achakkhi mahmung ju I kilim lubah arang, tüsho inü ju anibah.

¹⁸ Tüsho judüki nüsanü arhimobebo alala inü thsangdan.

Kadesh-barnea ching Thirirhurü Yüshihkhi

¹⁹ “Jumonü isa Horeb chingnü akhinde nüsanü angükhi ato tüsho atrebe sunglobo Amorrü wungbo limro lim, Atungpuhnü isa ki thiyukhüm jihkhi nangde yü. Jushu isa Kadeshbarnea khiung.

²⁰ Tüsho inü nüsa ki tha, Atungpuh isa Thrünpuhnü isa kilim jihkhi Amorrü wungbo ching nüsa arüdo.

²¹ Kheahang, Atungpuh nüsa Thrünpuhnü nüsa müngüh alo zojihlah; Atungpuh nüsa bebuhrübo Thrünpuhnü athakhi nangde, nüsa wutuang tüsho ju luang; dütre yungsho mulong dünini.

²² “Tüsho nüsa mihbüm abannü I ki arübahle tha, Isanü isa müngüh mihtsürübo yüshihanü, tüsho arübonü isa thsungkheak alo ajamaraa kheahshihanü; tüsho isa wutupü limro tüsho kiutobo kürü ching isa yübeanü thiyusheak hanlobah arüshihanü.

²³ “Tüsho ju lümkhi atsü ah de inü mükheah; jumonü inü nüsa trük aban chingnü mihtsürü khülang khülang 12 mokhitkheah.

²⁴ Tüsho arübo awungbo ching wutubahle, Eshkol jindükhün lim arü tüsho rük ajamakheah.

²⁵ Arübonü sangaso khürü she arü khah chingnü shuhbahle isa kilim aki; tüsho Atungpuh isa Thrünpuhnü isa kilim jihkhi lo tsülah de thiyusheak hanlobah arü.

²⁶ “Tüshe nüsanü muwutunede, Atungpuh nüsa Thrünpuh yukhüm azhihdo;

²⁷ nüsanü nüsa khimyambo ching dapdapde tha, Tümütüsho Atungpuhnü isa thraneande, Amorrü khah ching yukjihbahle isa dükheakshihpü Ijip chingnü bekhit.

²⁸ Isa küching yükhukpü? Isa keoniorübonü isa mulong ninishihde tha, Mihtsürübo isa kheaknü atoshang ah; kiutobo thüning khiungde chipi ayünlah; kheaküshe isanü ju ching Anakim tsührübo ngüdo.

²⁹ “Tüsho inü nüsa ki tha, Jurübo mihtsürü dütre.

³⁰ Nüsa müngüh yübuh Atungpuh nüsa Thrünpuhnü Ijip ching nüsa mük ki rhimokhi nangde, nüsa thsungkheak keochihjihbah,

³¹ tüsho mihtsürünü nihbuh tsührü buhkhi ruk sunglo tüsho ha khiungde arükhi lomi ching Atungpuhnü künangde nüsa buhde arükheanü nüsanü ngüdo.

³² Tüshe jude thsüthsü she, nüsanü Atungpuh kheak mükin,

³³ shepü nüsa khimyam thsüpung kheahjihpü nüsa müngüh yü, nüsa yüpü limro huhde, azhing ching mo dungtonü be tüsho animung amo dungtonü be.

Atungpuhnü Israelrü Thsümüchi

³⁴ “Tüsho Atungpuhnü nüsanü athakhi düsheak sobah abukakhiuk tüsho thiyuchihchimde tha,

³⁵ Tsükjide ha amütsü lün mihtsürü shepü she inü nüsa bebuhrü jihpü tangzüngkhi lo atsü müngü,

³⁶ Jephunne tsührü Kaleb lang yüzahbah; apinü ju ngübah, tüsho api le atsührübo kilim apinü atsahkhi lo inü ajihbah, tümütüsho api mulong athrünkhinü Atungpuh ru yando.

³⁷ Nüsa dünkheaknü Atungpuhnü I kheak she bukakhiukde tha, Nü she ju ching müyüzah;

³⁸ tüshe Nun tsührü nü rungbuh Jihusua, ju ching yüzahbah. Api ki mulong tuthsukang, tümüde api hode Israelnü ju yamrüplurüp lubah.

³⁹ “Kheaküshe nüsa tsührü aninibo thiririnü ramde atsobah de nüsanü athakhi, sherübo khihni atsü tüsho amütsü dünkheak mükheahmudu mülanü, arübo ju ching yüzahbah; arübo kilim inü ju jihbah, tüsho arünü ju mükühbah.

⁴⁰ “Tüshe nüsabo a rholobah Amürüm Keto limro yande sunglo lim yüang.

⁴¹ “Judüki nüsanü I ki alo, Isanü Atungpuh azhihde neak yihbeakdo; Atungpuhnü isa ki thiyukhüm jihkhi nangde, isanü wutubah keochihbah. Jumonü nüsa alalanü thirithsü zülu rümkih-a lu tüsho awung lomi ching wutupü thülihde lüm.

⁴² “Tüsho Atungpuhnü I ki tha, Arü ki thaang, Duwutu tüsho dükeochih, tümüde I nüsa lung müla; jude yungsho thiririnü nüsa kukbah.

⁴³ Jumonü inü nüsa ki thado; tütüshe nüsanü manide Atungpuh yukhüm azhihde, tüsho lülüshishide awung ching wutukheah.

⁴⁴ Tüsho ju wung ching larü Amorrü nüsa azhihde akhiukbahle mukhunü ayankhi ruk nüsa yande müsham, tüsho nüsa Seir chingnü Horma lim yanloa arüshih.

⁴⁵ Judüki nüsa rholode arübahle Atungpuh miki trip, tüshe Atungpuhnü nüsa düsheak mani yungsho musojih.

⁴⁶ Jumonü arübo kim tüsho nimung ashang Kadesh ching lakheah.