YUNIRÜBO RHIMO 8 - AMÜSÜH HÜM CL Bible (BSI)

¹ Tüsho api shekhi ju Saulnü mülüjih-a lakheah. Tüsho ju nimung Jirusalem ching borü azhihde thsümüchi ato akhiuk; tüsho amüsüh-thsangyurübo kheak hode, arü alala Judea tüsho Samaria lomibo ching müzütabah.

Saulnü Borü Thsümüchikhi

² Shuhmülanga jihkhi mihtsürübonü Stephen kiuyukabah, tüsho api dünkheak khide tüzho.

³ Tüsho Saulnü borü thsümünimpü tankih. Athrürü tüsho aliberübo thüyam chingnü yankhita rihyam ching jih.

Samaria ching Thsangyuthsangrakhi

⁴ Kheakü sherü hiumüzüta lakheanü thiyusheak thsangyuthsangrade yü.

⁵ Philipnü Samaria kiuto ching yüki, tüsho Khrista dünkheak zhiyukjih.

⁶ Apinü athakhi sochoki tüsho amüyinsahbe rhimokhi ngüchoki botonü arihbah Philip ki ani.

⁷ Tümüde amünean me yüzah-a lakhibo düsheak achangnü zhide ahihkhüh chingnü akhiuk; tüsho thripshe thsürü yungsho kikzükikdorü ahihkhüh thsüngu.

⁸ Jumonü ju kiuto asühachihkhi ato lakheah.

⁹ Mihtsürü khülang müngühlim kiuto ching wurük huhde tüsho api ato kamde Samariarü müyinsahshihkhi amung Simon lakheah.

¹⁰ Arü aninibenü atobe khiungde api ki anide tha, “Ha mihtsürü a Thrünpuh wu ato lah.”

¹¹ Arünü api ki ani, tümütüsho kim ashang apinü anihbuh wurüknü arü müyinsahshih.

¹² Tüshe küyimki Thrünpuh kiulongthsü yusheak atsü tüsho Jisu Khrista mung thsangyuthsangrakhi hode arünü Philip kheak akin lakhea, arü athrürü tüsho aliberübo chido bapti.

¹³ Simon she kin, tüsho bapti dunglim Philip yande tsah, tüsho amüyinsahbe le khinthiyinbebo ngübah api müyinsah.

¹⁴ Küyimki Samaria mihtsürübonü Thrünpuh yu leangkhido de Jirusalem ching amüsüh-thsangyurübonü asokhea, arünü Peter tüsho Johan arü kilim yüshih.

¹⁵ Küyimki arü akhiungkhea, arübo Amüsüh Me leangkhipü thsüde arü thsungkheak tamkhüntamnüjih,

¹⁶ tümütüsho arü she kheak she ju müyükihyi, tüshe Atungpuh Jisu mung chingnü khülang lang baptia lakheah.

¹⁷ Jushu arünü arü kheak khahbo nimkih tüsho Amüsüh Me leangkhi.

¹⁸ Küyimki amüsüh-thsangyurü khahbo nimbah Me jihkhi Simonnü angükhea, apinü arü kilim sho jih

¹⁹ tüsho tha, “Inü khürü kheak I khahbo nimsho Amüsüh Me leangkhipü thsüde I kilim she ha wu jihang.”

²⁰ Tüshe Peternü api ki tha, “Nü yo shotoyinchi nü lung dükheakshang, tümütüsho shonü Thrünpuh thsambah ngübah de nünü lümdo!

²¹ Nü ha ching bepü yungsho shihcham müla, tümüde nü mulong ju Thrünpuh miki alungki yung.

²² Jumonü nü mihbukmuyukkhi müthriang, tüsho Atungpuh ki tamkhüntamnüang, khükia nü mulong ching ha lümkhi hode apinü nü neak bahjihbah.

²³ Tümüde nü a akhühnü mide tüsho neak bukkhüp azhorü lakhi inü ngüchoh.”

²⁴ Tüsho Simonnü alo, “Nünü athakhi tümü she I kheak marüpü I thsungkheak Atungpuh ki tamkhüntamnüjang.”

²⁵ Küyimki arünü thiyumütsan jihde Atungpuh yu asukkhea, arünü Samariarü kiulongbo ahihdo ching thiyusheak-atsü thsangyuthsangrade Jirusalem lim alode yü.

Philip tüsho Ethiopia Torü

²⁶ Tüshe Atungpuh yunirünü Philip ki tha, “Asürang tüsho Jirusalem chingnü Gaza lim yüki limro düjinglim thrip yüang.” Ha sunglo limro ah.

²⁷ Apinü asürübah tso. Tüsho kheahang, Ethiopia kiulongthsüberü Kandas rahpung alala kurungkheak atorü dukha ju kingaünpü Jirusalem ching arü

²⁸ tüsho yülode alakheah; khoralolungbe kheak binbah apinü Isaia wukihbuh hüm chingnü khede alakheah.

²⁹ Tüsho Menü Philip ki tha, “Khora-lolungbe ju yanphuhde yüang.”

³⁰ Jumonü Philipnü api kilim alihde yü tüsho Isaia wukihbuh hüm chingnü khede sobah keokhi, “Nünü tümü khechonü anikhitnah?”

³¹ Tüsho apinü tha, “Khürünü müthanaksho inü küde thsah anikhitpü?” Tüsho apinü Philip ju akihbah api lung binpü tha.

³² Kheakü khede alakhi amüsühyu ju ha lakheah: “Namfimihnu alaksahpü bede ayükhi yungsho namfimihnununü anam-rhiprü miki zhikde alakhi nangde, apinü amün mükhimshuh.

³³ Api junokhi ching anihbuh kheak thiyuro khenoabah. Shepünü api tsühsoniusobo thakhukba? Tümütüsho api rhangdung alomi chingnü bede yükihdo.”

³⁴ Tüsho dukhanü Philip ki tha, “Wukihbuh hanü anihbuh dünkheak a shi khürü dünkheak thachonü I ki thaang?”

³⁵ Judüki Philipnü api mün khimshuh, tüsho ha amüsühyu tankihde api ki Jisu yusheak atsü tha.

³⁶ Ane limro ching yüde alachoki ke ki arü, tüsho dukhanü tha, “Kheahang, ha kheak ke lah! Tümü thsüde I mübaptipü?”

³⁷ Philipnü tha, “Nü mulong athrünkhinü kinsho nü baptipü kuklah.”

³⁸ Jumonü apinü khora-lolungbe ju tukloa zhipshih. Tüsho Philip le dukha ane chido ke ching yüzahbah api baptijih.

³⁹ Tüsho küyimki ane ke chingnü akhiukkhea, Atungpuh Menü Philip ram; dukhanü api müngüde kam, tüsho asühde api limro ching yü.

⁴⁰ Tüshe Philip ju Azota ching ngü, tüsho apinü tsahhode kiutobo alala ching Kaesarea khiungde thiyusheakatsü thsangyuthsangrade arü.