YUNIRÜBO RHIMO 5 - AMÜSÜH HÜM CL Bible (BSI)

Anania tüsho Sapphira

¹ Tüshe mihtsürü khülang amung Anania tüsho aniube Sapphira anenü kukruk khürü yin,

² tüsho aniubenü mükheahde sho khürü aninga zobah chama lang lude arünü amüsüh-thsangyurübo kilim jih.

³ Tüshe Peternü tha, “Anania, tümü thsükhi alo yinkhi sho khürü chama zopü Amüsüh Me ki akeangyu thade nü mulong ching Arimri yüzahkhea?

⁴ Ju müyinyichoki nü yo lakhi yung de tüsho ju yinshu sho nü yung de? Tümünü nü hadürü rhimoshihkhea? Nünü mihtsürü ki yung tüshe Thrünpuh ki akeangyu rhimodo.”

⁵ Küyimki Ananianü harü yubo sokhea, api lunga yap tüsho sheabah. Tüsho ju sorü alala kheak atrekhi ato arü.

⁶ Athunu mihtsürübonü wusubah api hing tüsho hande wukhiuknü kiuyukabah.

⁷ Kimkhü 3 bande labah adünjikhi mümükheahde aniube azah.

⁸ Tüsho Peternü alibe ki tha, “Alo ha dükhüh mo yinkhea shi yungnü I ki thaang.” Alibenü tha, “Am, ju dükhüh ah.”

⁹ Tüshe Peternü alibe ki tha, “Atungpuh Me rükakipü thsüde küde thsah nükenü rukhüh mulongkhea? Kheahang, nü niubuh hande awukhiukrü lah, tüsho arünü nü she hande awukhiukbah.”

¹⁰ Zukleangnü alibe ju api jing ki keam tüsho sheabah. Küyimki athunurü mihtsürübo azahkhea, arünü alibe ju shea ngü tüsho hande wukhiukbah aniubuh rheang ki kiuyukabah.

¹¹ Borü tüsho harü sorü alala kheak atrekhi ato arü.

Khinthiyinbebo

¹² Amüsüh-thsangyurübonü khinthiyinbe tüsho amüyinsahbebo ahihdo mihtsürü bolung rhimo. Tüsho arü alala rukhüh Solomon yam ayinkhe khüp lakheah.

¹³ Püpürü shenü she arü lung bepü mümürang, tüshe mihtsürübonü arü ki khide wüntre jih.

¹⁴ Tüsho püpüki kheaknü alü akinrübo athrürü tüsho aliberü boto Atungpuh lung kheyuk,

¹⁵ junangde arünü tukthsürübo kiudunglimrobo ching bekhitbah Peter tsahhode alachoki api me arü kheak alamshihpü yapkiubo le pheakbo ching yapshih.

¹⁶ Mihtsürübonü Jirusalem mühi kiutobo chingnü she tukthsürü tüsho amünean mebonü thsünükhi bedarüde mukhung, tüsho arü alala thsüngu.

Amüsüh-thsangyurübo Thsümüchikhi

¹⁷ Tüshe achangbe amükeambuhnü wusu tüsho api lung lakhi Sadukirü borü alalanü mükthsüde kam,

¹⁸ arünü amüsüh-thsangyurübo rambah boto rihyam ching zo.

¹⁹ Tüshe azhing ching Atungpuh yunirünü rihyam khimdopübo yeahshungbah arü bekhit tüsho tha,

²⁰ “Yübah arüngyam ching zhipang tüsho mihtsürübo ki ha rhangdung yubo alala asukang.”

²¹ Küyimki arünü ju sokheanü yapsu mükikde arüngyam ching yüzahbah thsangyu. Tüshe achangbe amükeambuh tüsho api lung larü arübah kiuthsübinkiu lung Israelrü azothsürü bede rukhüh mukhung, tüsho arü bedarüpü rihyam ching yüshih.

²² Tüshe küyimki atorübo arübah rihyam ching arü müngükheanü alode yübah thiyusheak jih,

²³ “Rihyam tsüde rihdoa isanü ngü, tüsho aheangrübo khimdopü ki aleanglim zhip; tüshe isanü akhimshuhchoki alunglim sheshe müngü!”

²⁴ Küyimki achangbe amükeambuh, arüngyam wühkenobuh, tüsho amükeam putungrübonü harü sokhea, tümü dünjibaki de müyinsah.

²⁵ Judüki khülang arübah arü ki tha, “Kheahang, nüsanü rihyam ching yukrübo thsü arüngyam ching zhipbah mihtsürübo ki thsangyuchoh!”

²⁶ Tüshe wühkenobuhnü atorübo bebah yü tüsho arübo amütsü müthsüde bedarü, tümüde arübo mihtsürübonü lungnü arupü tre.

²⁷ Küyimki arübo bede arükheanü, arünü kiuthsü-binkiu miki zhipshih, tüsho achangbe amükeambuhnü arü ki keokhi,

²⁸ “Ha buh mung chingnü müthsangyupü isanü nüsa ki müküpde thiyukhüm jihkhi yung de? Kheahang, nüsa kingaün-yakzannü Jirusalem mide kamshihdo, tüsho ha mihtsürü shekhi isa mudopü lümchoh!”

²⁹ Judüki Peter tüsho amüsüh-thsangyurü püpürünü alo tüsho tha: “Isanü mihtsürü kheaknü a Thrünpuh ki mihyuanibah.

³⁰ Nüsanü laksahbah sangdung kheak zhinkhi Jisu isa jipürü Thrünpuhnü asürüshih.

³¹ Israel mulong müthrishihpü tüsho neak bahjihde yakzanshuhrü tüsho akhümkhitrü thsüpü Thrünpuhnü akhah tsülim api shuhkih.

³² Tüsho harü thsungkheak api thiyumütsanbo isa lah, tüsho api ki mihyuanirü kilim Thrünpuhnü ajihkhi Amüsüh Me she lah.”

³³ Küyimki arünü ha sokheanü bukakhiuk tüsho arü laksahpü kün.

³⁴ Tüshe kiuthsü-binkiu ching mihtsürü alalanü wüntre jihkhi yakzan thsangyurü amung Gamalielnü zhip tüsho mihtsürübo ju anükhühkheak wungdo bekhitpü thiyukhüm jih.

³⁵ Tüsho apinü arü ki tha, “Israel mihtsürübo, harü mihtsürü kheak nüsanü tümü thsüchonü kümkangang.

³⁶ Tümütüsho müngühlim Theudasnü nihbuh küdahnü ato kamde wusu, tüsho mihtsürü 400 bande api ki mukhung; tüshe api laksah tüsho api dunglim yanrübo tümü mülade müzütabah.

³⁷ Api dunglim Galileerü Juda wühkhe lukhi nimungbo ching wusu tüsho api dunglim mihtsürü khülang bebah tso; api she laksah, tüsho api dunglim yanrü alala müzütabah.

³⁸ Jumonü ha thsungkheak inü nüsa ki thachoh, harü mihtsürü kheaknü chamkhiang tüsho arü zangrü zojang; tümüde ha lümkhi yungsho rhimokhi mihtsürü kilimnü a sho ju akuk müngü;

³⁹ tüshe ha Thrünpuh kilimnü a sho nüsanü arü mukuk. Nüsanü Thrünpuh azhihde keochihkhi kambah!”

⁴⁰ Jumonü arünü ha athsunganahkhi lu, tüsho amüsüh-thsangyurübo jiyukbah lak tüsho Jisu mung chingnü müthapü thürühbah tsoshih.

⁴¹ Judüki Jisu dünkheak mükhemükimpü thülünlah de arünü asühachihde kiuthsü-binkiu kinü tso.

⁴² Tüsho nimung aban arüngyam tüsho thüyam ching Jisu ju Khrista de athsangyupü tüsho thsangyuthsangrapü arünü anüzhak müthsü.