YUNIRÜBO RHIMO 4 - AMÜSÜH HÜM CL Bible (BSI)

Peter tüsho Johan Kiuthsü-binkiu miki

¹ Anenü mihtsürübo ki thade alachoki, amükeamrübo le arüngyam wühkenorü tüsho Sadukirübo Peter tüsho Johan kilim atu.

² Anenü mihtsürübo ki Jisu ashe chingnü arhang kamlokhi dünkheak thsangyukhi hode arü mulong kipathsükde kam.

³ Tüsho ane rambah zhinga lamonü ashido khiungde rihyam ching zo.

⁴ Tüshe thiyu sorü ahihdonü kin, tüsho mihtsürübo khekhi 5000 bande kam.

⁵ Ashidopü arü yakzanshuhrü, azothsürü, tüsho athrütrü Jirusalem ching rukhüh mukhung,

⁶ ju lung achangbe amükeambuh Anna le Kaifa tüsho Johan le Alexander, tüsho achangbe amükeamrü yamkhün chingnü alala bekheah.

⁷ Arünü arübo arü müngüh zhipshihbah keokhi, “Tümü wunü yungsho tümü mung hode nüsanü ha rhimokhea?”

⁸ Judüki Peternü Amüsüh Menü mibah arü ki tha, “Mihtsürübo yo yakzanshuhrübo tüsho azothsürübo,

⁹ jingkikrü ki atsü rhimode, ha mihtsürü thsüngukhi dünkheak isa ki keokhisho,

¹⁰ nüsa alala tüsho Israel mihtsürü alalanü, nüsanü yümkihbah Thrünpuhnü ashe chingnü arhang kamloshihkhi Nazarethrü Jisu Khrista mung chingnü ha mihtsürü tsüde zhiplah de mükheahang.

¹¹ Ha lung nüsa thüyam-thsürübonü bahyuk, tüshe amühit lung adungtobe kamdo.

¹² Tüsho püpü tümü ching she akhümkhit müla, tümüde thüning bukkhüp mihtsürü bolung isa khümkhitpü püpü mung jih-a müla.”

¹³ Küyimki arünü Peter le Johan mulong tokhi ngükhea, tüsho ane amümükheahrü, mihtsürü dümung kheahkhitkhea, arünü müyinsah; tüsho ane Jisu lung lade arüa lah de mütsan.

¹⁴ Tüshe arü rheang ki zhipkhi mihtsürü thsüngukhi ngübah arünü azhihde athapü tümü mülakheah.

¹⁵ Tüshe küyimki arünü ane kiuthsü-binkiu chingnü wungdo wukhiukpü thiyukhüm jihkhea, arünü arü bolung atsangachih,

¹⁶ “Isanü harü mihtsürübo ki tümü rhimoba? Atsütsü anenü münchi hode khinthiyinbe rhimokhi Jirusalem ching larü alalanü mütsanlah, tüsho isanü ju mükhenokhuk.

¹⁷ Mihtsürü bolung alü thsüde mubushihpü, ha mung chingnü kheaküa masukpü isanü ane müzünanü.”

¹⁸ Jumonü arünü ane jibah Jisu mung chingnü masukpü yungsho müthsangyupü müneah.

¹⁹ Tüshe Peter le Johan bünenü arü ki alo, “Thrünpuh kheaknü alü nüsa ki anipü Thrünpuh miki alim la shi yungnü nüsanü lümakheahang.

²⁰ Tümüde isanü angükhi tüsho asokhi thapü isanü atuklopü mukuk.”

²¹ Jumonü küyimki arünü ane müzünkheanü ane thsümüchipü limro müyimkhitde mihtsürübo dünkheaknü ane tsoshih tümütüsho anenü arhimokhi alala thsungkheak arü alalanü Thrünpuh müretah.

²² Tümütüsho mihtsürü shepü kheak ha athsüngukhi khinthiyinbe rhimokheanü kam 40 akumung lakheah.

Akinrübo Tamkhüntamnü

²³ Ane dükheshu, anenü müyamrübo kilim yü tüsho amükeam putungrübo le azothsürübonü athakhi arü ki thiyusheak jih.

²⁴ Küyimki arünü ju sokhea, arünü rukhüh thsübah Thrünpuh ki zhi: “Atungpuh, nü a thüning le alomi, keto, tüsho ju ching alala thrünkhi Thrünpuh ah.

²⁵ Nünü nü yamlarü isa jipürü David mün hode Amüsüh Menü asuk: ‘Tümü thsükhi trükshihbonü mulong zhipzhipkhea, tüsho mihtsürübonü akeangkeang lümkhi thsükhea?

²⁶ Alomi kiulongthsürübonü thsakham, tüsho yakzanshuhrübonü Atungpuh tüsho api yo Khrista azhihde rukhüh mukhung.’

²⁷ Tümütüsho ha kiuto ching nünü mujude-müsühkhitkhi, amüsüh nü yamlarü Jisu azhihde khiungkerü tüsho Israel mihtsürü lungnü Herod tüsho Pontia Pilat ane chido mukhung,

²⁸ ju nü wu tüsho nü lümkhinü pungkhia lakhi dünjipü rhimopü lakheah.

²⁹ Atungpuh, arünü amüzünkhi kheakü mükheahjang tüsho nü yamlarübonü khide mulong tode nü yubo thakhukshang.

³⁰ Nü yo amüsüh yamlarü Jisu hode athsüngupü tüsho khinthiyinbebo rhimopü nü khah chungkihang.”

³¹ Küyimki arünü tamkhüntamnükhea, arü rukhüh mukhungkhi dangpung ju niuk; tüsho arü alala Amüsüh Menü mide kambah Thrünpuh yu thapü mulong tode tha.

Akinrübonü Lakhit-kukruk Chamachihkhi

³² Kheakü akinrü borü ju mulong tüsho me khülang lakheah, tüsho shenü she nihbuh kukruk ju api yo ah de mütha, tüshe lüpdükhi rukhüh yo lakheah.

³³ Tüsho wu atonü amüsüh-thsangyurübonü Atungpuh Jisu Khrista arhang kamlokhi thiyumütsan thsü, tüsho arü alala kheak amüthsüm ato lakheah.

³⁴ Arü bolung sheshe müthsümülarü mülakheah, tümüde sherü thulubo le thüyambo lakheanü yinbah sho lude arü,

³⁵ tüsho amüsüh-thsangyurübo kilim jih; tüsho sho ju mihbüm aban nihbuh yihnüpü ayannü chama jih.

³⁶ Junangde amüsüh-thsangyurübonü Barnaba (amütsan, mulong toshihkhi tsührü), Saipra chingnü azübekhi Levirü Josepnü

³⁷ api lu khülang yin, tüsho sho lude arübah amüsühthsangyurübo kilim jih.