YUNIRÜBO RHIMO 28 - AMÜSÜH HÜM CL Bible (BSI)

Malta ching

¹ Keyean tsokhita lachoki, ju kekung-lo Malta ah de isanü ngü.

² Ju ching larübonü isa ki amuzho büthsüde huh. Tsüng arüde athsakkhinü arünü mo thsübah isa beyuk.

³ Tüshe küyimki Paulnü sangjip thsünkhi lude arübah mo ching yukkhea, atakkhinü phuruto khülang akhiuk, tüsho akhah kheak hingkih.

⁴ Jumonü küyimki kekunglorünü phuruto akhah kheak zhinkhia ngükhea, arü khülangnü khülang ki thaachih, “Ha mihtsürü mihlaksahrü ah, api keto chingnü tsokhita lalashe thiyuronü api alapü mümülü.”

⁵ Tütüshe apinü phuruto ju müthsümünimde mo ching rhakyuk.

⁶ Arünü api ju abümpü yungsho zukleangnü lunga adana ashepü mükkin thsüde aleang; tüshe küyimki arünü api aruhkhüh aleangkhea, tüsho kuhi amütsü müdünjikhi ngükhea, arünü arü lümkhibo müthri tüsho api a thrünpuh ah de tha.

⁷ Ju dangpung phünide kekung-lo atorü Publio lubo lakheah. Apinü asühde isa beyuk tüsho api lung nimung mahsam mung.

⁸ Publio abuh ju phütsak tüsho thiyih-yüde tukthsü; Paulnü api rhuakheahde tamkhüntamnü, tüsho akhahbo api ku kheak nimkihde thsüngujih.

⁹ Küyimki ha dünjikhea, kekung-lo ching mihtsürü püpürü tukthsü larübo she arü tüsho thsüngu.

¹⁰ Arünü thsambah ahihdo isa kilim jih; tüsho küyimki isa ayükhea, arünü isa yihnüpü lakhibo sangkung ching yukjih.

Malta chingnü Rom ching

¹¹ Khinu mahsam dunglim tsüngkam ching kekung-lo ching lakhi Rüpde-zübekhi Keoniorübo de ajikhi Alexandria sangkung chingnü tsahmusu.

¹² Isanü Siraka khiung tüsho ju ching nimung mahsam mung.

¹³ Isanü ju chingnü tsahmusu tüsho Rhegium khiung; tüsho nimung khülang dunglim düjinglim pung yünpü tankih, tüsho mahne nipü isanü Puteoli ching arü.

¹⁴ Ju ching isanü akinrübo ngü, tüsho nimung thüne arü lung mungpü jiyuk. Tüsho isanü Rom ching arü.

¹⁵ Ju ching akinrübonü isa arükhi sobah Appia Yinzüyindopung tüsho Hanyam Mahsam khiungde isa shorupü arü. Arü ngübah Paulnü Thrünpuh ki makshe jih tüsho mulong toa lu.

¹⁶ Küyimki isa Rom khiungkhea, Paul ju api aheangpü bonungrü bede alangzü lapü mülü.

Rom ching

¹⁷ Nimung mahsam dunglim apinü Jihudarü limberübo jimukhung; tüsho küyimki arübo mukhungkhea, apinü arü ki tha, “Keoniorübo, inü I mihtsürü yungsho isa jipürü yakli azhihde tümü mürhimomo she Jirusalem ching I ram tüsho Romrü kilim jih.

¹⁸ Arünü I dünkheak yimzüyimoda kheah tüsho adükhepü kün, tümütüsho I ashepü thülünde athsümünimkhi mülakheah.

¹⁹ Tüshe küyimki Jihudarünü azhihkhea, I mihtsürü azhihkhi tümü mülalashe inü Kaesar khiungde atsangpü kam.

²⁰ Jumonü ha dünkheaknü inü nü shorubah asukachihpü keokheah, tümütüsho Israel mulonglam lakhinü ha wuhrünliunü I rhüka lah.”

²¹ Tüsho arünü api ki tha, “Judea chingnü nü dünkheak isanü tümü kihüm müleangkhi, tüsho keoniorü ha ching arürü shenü she nü dünkheak thiyusheak müjih yungsho amütsü masuk.

²² Tüshe lümkhi tümüanü isanü nü kilimnü sonelah; tümüde alala ching ha khunung azhihde asukkhi isanü mükheahlah.”

²³ Arünü Paul shorupü nimung akhukhit, tüsho ahihkhüh api lapung ching arü. Yapsunü are khiungde apinü Thrünpuh kiulongthsü dünkheak thanakde arü ki zhiyuk tüsho Mosa yakzan le wukihrübo chingnü arü ki Jisu dünkheak thapü mürang.

²⁴ Apinü athakhi hode khürünü kin, tüshe püpürünü a mükin.

²⁵ Jumonü Paulnü ha thachoki arü bolung marüpachihde chamachih: “Nüsa jipürü ki Isaia wukihrü hode Amüsüh Menü athakhi ju alungki lakheah:

²⁶ ‘Ha mihtsürübo kilim yüang tüsho thaang, Nüsanü anibah tüshe küyimkishe manikhit, tüsho nüsanü akheahbah tüshe mükheahkhit.

²⁷ Tümüde ha mihtsürübo mulong zhazhaabahdo tüsho arü nükhün peanga lah, tüsho arü mük tuka lah, jude yungkhülaa arü müknü akheahkhitbah, arü nükhünnü asobah, arü mulongnü anikhitbah, tüsho rholobah inü arü thsüngubah.’

²⁸ “Junangde ha Thrünpuh akhümkhit khiungkerü kilim yüshihdo de nüsanü mükheahang.”

²⁹ Küyimki apinü harü yubo thakhea, Jihudarünü chamachih tüsho arü bolung atsangachihkhi ato lakheah.

³⁰ Judüki Paulnü kam mahne amuyung müshihyih-yam ching la, tüsho api ki arürü alala beyuk.

³¹ Mulong tode tüsho müdukiuhlode apinü Thrünpuh kiulongthsü thsangyuthsangra tüsho Atungpuh Jisu Khrista dünkheak thsangyu.