YUNIRÜBO RHIMO 27 - AMÜSÜH HÜM CL Bible (BSI)

Paulnü Rom lim Yükhi

¹ Tüsho küyimki isanü Itali ching yüpü pungkhikhea, arünü Paul le aramrü püpürü khürü Augusta Bonungrü atorü Julio kilim jih.

² Jumonü Adramittium sangkung ching yüzahbah isanü Asia keyeannü bede ayüpü keto ching yüzah. Tesalonika ching lakhi Macedoniarü Aristarka isa lung bekheah.

³ Tüsho ashidopü isa Sidon khiung. Julionü Paul ki muzhode rhimo, tüsho api yihnüpü lakhi arünü ajihshihpü thsüde api müyamrübo kilim yüpü mülüjih.

⁴ Isanü ju chingnü Saipra alamme khüp yü, tümütüsho apungnü isa kheak yünlode alakheah.

⁵ Tüsho küyimki isanü Kilikia le Pamphylia phüni keto hode ayükheanü Lysia ching lakhi Myra ching arü.

⁶ Ju ching atorünü Alexandria sangkung khülang Itali lim yükhi ngü, tüsho isa ju ching yüzahshih.

⁷ Isanü nimung ahihdo arünnü yü, tüsho küpkhukde Nida phüni khiung, tüsho apungnü isa yünlokhinü Salmone phüni Krete alamme lim yü.

⁸ Küpkhukde keyean arübah isanü Lasea kiuto phüni binkheampung atsü dangpung ching arü.

⁹ Kim shangde yü tüsho hantsahpü atrebe kam tümütüsho dünthsükhi nimung hoabah. Jumonü Paulnü arü ki tha,

¹⁰ “Atorübo, isa hantsahkhi thsümütsü labah tüsho sangkung, kukrukbo tüsho isa rhangdungbo kukshah thsüpü lakhi inü ngüchoh.”

¹¹ Tüshe atobuhnü Paulnü athakhi anipü müthri aphülapbuh le sangkung putungrünü athsunganahkhi lu.

¹² Tümütüsho binkheampung ju tsüngkam ching thsungkheak mütsüde alakhinü ahihbenü ju chingnü akhinde Phoenix ching yübah ju ching mungpü tha. Binkheampung ju Krete ching düjing-aniyüzahlim tüsho tuku-aniyüzahlim lakheah.

Keto ching Chinthrüm

¹³ Apung ju thünakde ayünpü tankih, tüsho arü lümkhi kukbah de mihtsürübonü lüm, jumonü arünü sangkung tholobe thokih-a lu tüsho Krete keyean thüninde bede yü.

¹⁴ Tüshe nahdü lang duku-aniakhiuklim chinthrüm pungnü alo kheaknü yün;

¹⁵ tüsho küyimki sangkung ju tholobah apung kilim manguhkhukkhea, isanü ju lim rholo tüsho bede yü.

¹⁶ Tüsho Kauda de ajikhi kekunglo anikhüh alamme khüp tsahde isanü küpkhukde sangkung ju tsüde bekhiung;

¹⁷ Küyimki mihtsürübonü ju thokihkheanü liubonü sangkung ju rhüklo; arübo Sarti keyean loyi kheak alihde ayüpü trede arünü sangkung-tholobe yüzahshih tüsho sangkung ju bede yüshih.

¹⁸ Tüsho chinthrüm amütsü lakhi hode ashidopü arünü sangkung chingnü kukruk akükhita bahpü tankih.

¹⁹ Asam nipü arünü sangkungkukrukbo arü khahnü yihkhita bah.

²⁰ Tüsho küyimki nimung ashang ani yungsho chiningbo makhiukkhea, tüsho chinthrüm, mutuklode akamkhea, akheam ching a isa khümkhitpü mulonglam müladebah.

²¹ Mihtsürübo jim müngüde aruhkhüh lashu, Paulnü arü bolung mikhuh arübah tha, “Mihtsürübo, nüsanü I yu anide Krete chingnü mütsahmusupü lado; junangde isanü ha athsümünim tüsho kukshah tsokhipü lakheah.

²² Kheakü inü nüsa mulong topü thachoh, tümüde nüsa bolung rhangdung a yung tüshe sangkung lang adükheakbah.

²³ Tümütüsho shepü yo I la tüsho inü tankihkhi Thrünpuh yunirü yishih I ki zhip,

²⁴ tüsho tha, ‘Dütre, Paul; nü Kaesar miki zhippü lah; tüsho Thrünpuhnü nü lung bekhi rhangdungbo alala nü kilim jihdo.’

²⁵ Jumonü mulong toang, mihtsürübo, tümüde inü athakhi nangde adünjipü Thrünpuh kheak I akin lah.

²⁶ Tüshe isanü kekung-lo khürü ching rholobeah.”

²⁷ Küyimki tsüngre thürükheak phüyipü arükhea, tsüngphulung muro isa Adria behode alachoki isabo alo thüninchoh de sangkung berübonü lüm.

²⁸ Jumonü arünü liu kheak mülangde chingkihbah yüzahshih tüsho ke asüklim limthrip 40 lakheah; anükhüh kheak dunglim arünü ju ruk thsü tüsho limthrip 30 sükde alakheah.

²⁹ Lungto kheak yünü ashangpü trede arünü adunglim sangkung tholobe phüyi yüzahshih tüsho ayinkhishihpü tamkhüntamnü.

³⁰ Sangkung berübonü atsokhitpü yimde mikhuhlim atholobe yihkhitpü nangde rük thsüde sangkung ju keto ching keamyukshihchoki,

³¹ Paulnü atobuh tüsho bonungrübo ki tha, “Mihtsürü harü sangkung ching mülasho nüsa mükhümkhitkhuk.”

³² Jumonü bonungrübonü sangkung liubo lipshak tüsho jude yüshih.

³³ Ayinkhipü lachoki Paulnü arü alala ki tsühyungbe khürü tsühpü mushude tha, “Nüsanü tsühyungbe tümü mütsühde arükhi khihni nimung thürükheak phüyi ni thsüchoh.

³⁴ Jumonü tsühyungbe khürü tsühpü inü nüsa ki mushuchoh; hanü nüsa sühmüh jihbah, tümütüsho nüsa shepü ku kheaknü she kuyü bümkhüh she müdükheak.”

³⁵ Tüsho küyimki apinü ha thakheanü yikhap lu tüsho alala mikinü Thrünpuh ki makshe jihbah ju yihnak tüsho atsühpü tankih.

³⁶ Jushu arü alala mulong tode kam, tüsho arünü tsühyungbe ju tsüh.

³⁷ Tüsho sangkung kheak mihtsürü alalanü isa 276 lakheah.

³⁸ Junangde küyimki arünü suhdahde atsühkhea, wheat ju keto ching jipa bahde sangkung hiphipde kamshih.

Sangkung Angakkhi

³⁹ Küyimki ayinkhikhea, arünü alo mükheahmütsan, tüshe jinyean lakhi kenap arünü ngü, junangde kuksho arünü sangkung ju keyean bedarüpü lümkhi thsü.

⁴⁰ Jumonü arünü sangkung tholobe yihshakbah keto ching yüzahshih, tüsho sangkung-bebe kheak chingkhi liubo trün. Jushu arünü apung lim aku lahkihbah keyean lim yüshih.

⁴¹ Tüshe sangkungnü loyi mujung kheak dükheahbah juhramde yü; amüngüh lim ju dükheahrambah maphapkhuk, tüsho ke müküpde abükkhinü adunglim ju adütre kamde yihthünak.

⁴² Bonungrü lümkhi ju mutsokhishihpü thsüde aramrübo laksahpü lakheah;

⁴³ tüshe atobuhnü Paul khümkhitpü lümde arü lümkhi rhimopü tukloshih. Sherünü phungkhuklanü sangkung kheaknü jukkhibah keyean phungde ayüpü apinü alala ki thiyukhüm jih.

⁴⁴ Aningkhibo ju sangbeak le sangkung yihthünakkhibo kheak lakheah. Tüsho junangde alala tsokhitde alo kheak yü.