YUNIRÜBO RHIMO 25 - AMÜSÜH HÜM CL Bible (BSI)

Festa miki Paul

¹ Küyimki Festa api lomi ching arükhea, nimung mahsam dunglim Kaesarea chingnü Jirusalem lim wutu.

² Amükeam putungrübo tüsho Jihudarü adungto mihtsürübonü Paul azhihde api ki thiyusheak jih; tüsho arünü api ki mushude,

³ limro ching jimde binbah api laksahpü mihtsürü ju Jirusalem lim yüshihpü tha.

⁴ Paul ju Kaesarea ching zolah, tüsho api she nahde ju ching yüpü lümlah de Festanü alo.

⁵ Apinü tha, “Jumonü, nüsa bolung adungto mihtsürübo I lung akishang, tüsho mihtsürübo dünkheak tümüanü amülim lasho, arünü api müdamshang.”

⁶ Apinü arü lung nimung tizheah yungsho thürü mung dunglim Kaesarea lim yüki; tüsho ashidopü apinü mahkhap binkiu kheak binbah Paul bede arüpü thiyukhüm jih.

⁷ Tüsho küyimki api arükhea, Jirusalem chingnü arükhi Jihudarünü api mükamdoa zhipbah arünü mümütsankhukkhi ahihdonü Paul azhihde atsang.

⁸ Tüshe Paulnü api chilode tha, “Inü Jihudarü yakzan, yungsho arüngyam, yungsho Kaesar azhihde amülim tümü mürhimo.”

⁹ Tüshe Festanü Jihudarü asühshihpü mulungde Paul ki tha, “Nünü Jirusalem lim wutubah harü dünkheak I miki mahkhapshihpü mulongla shi?”

¹⁰ Paulnü tha, “I a I mahkhappü lakhi Kaesar mahkhappung kheak zhiplah. Nünü tsüde mükheahlah, inü Jihudarü ki amülim tümü mürhimo.

¹¹ I amülim rhimorü thsübah ashepü thülünde lakmihkhülaa, inü ashe tsokhipü müyim tüshe mihtsürübonü I müdamkhi ching tümü mülasho, shenü she I arü kilim müjihkhuk. Inü Kaesar ki mushuchoh.”

¹² Judüki Festanü kiuthsü-binkiu ki asukachihbah alo, “Nünü Kaesar ki mushudo; nü Kaesar kilim yübah.”

Agrippa le Berni miki Paul

¹³ Küyimki nimung anükhüh hokhea, kiulongthsüpuh Agrippa le Berni büne Festa leangkhipü Kaesarea khiung.

¹⁴ Küyimki arü ju ching nimung ahihkhüh mungkhea, Festanü Paul dünkheak kiulongthsüpuh ki tha: “Felixnü aramrü thsüde alashihkhi mihtsürü khülang lah;

¹⁵ tüsho küyimki I Jirusalem ching lakhea, amükeam putungrü tüsho Jihudarü azothsürübonü api azhihde amüdamkhibo hande arü tüsho api bahyukpü I ki keokhi.

¹⁶ Tüshe mihtsürü khülang ju api müdamrü mironü miro shorubah api azhihkhi matsangyikia jihabahpü Rom yakzan müla de inü arü ki tha.

¹⁷ Küyimki arü I lung ha ching arükhea, inü ju dünkheak mashu, tüshe ashidopü mahkhappü ji tüsho mihtsürü ju bede azahpü thiyukhüm jih.

¹⁸ Küyimki amüdamrü zhipkhea, inü mükkin thsükhi arünü api azhihde amütsü mütha.

¹⁹ Tüshe arünü api ki atsangpü lakhi ju arü kingaün tüsho Paulnü rhangdung lah de athakhi shea lakhi Jisu dünkheak lakheah.

²⁰ Harü dünkheak keokhikeorapü inü mukukde kam; jumonü Jirusalem ching yübah harü dünkheak mahkhap ching zhippü mulongnahnü inü api ki keokhi.

²¹ Tüshe küyimki kiulongthsüpuhnü mütsanmükhishihpü Paulnü rihyam ching zopü mushukhea, inü api Kaesar kilim müyüshihyi khiungde lashih.”

²² Tüsho Agrippanü Festa ki tha, “Inü ha mihtsürü ki aniakheahnelah.” Apinü alo, “Nünü api shido anibah.”

²³ Ashidopü Agrippa le Berni bünenü tsüde thsakhambah arü tüsho atorübo le kiuto ching azo mihtsürübo bebah boto khiungshak ching yüzah. Festanü thiyukhüm jihbah Paul bede azah.

²⁴ Tüsho Festanü tha, “Kiulongthsüpuh Agrippa tüsho isa lung berü alala, Jirusalem tüsho ha ching Jihudarü mihtsürü athrünkhinü api kheaküa mülashihbeah de I ki zhikhi mihtsürü ha kheahang.

²⁵ Tüshe api ashepü thülünde tümü mürhimokhi inü yimkhit; tüsho api küdahnü kiulongthsüpuh ki mushukhi nangde inü api kilim yüshihpü pungkhi.

²⁶ Tüshe inü api dünkheak I tungpuh kilim thrütpü tümü mütsande müla. Jumonü inü adungto thsüde api ju nü, kiulongthsüpuh Agrippa miki bede arükheah, junangde isanü api yimakheah dunglim, inü athrütpü tümükhüh labah.

²⁷ Tümütüsho api azhihkhi mümütsanmükhide aramrü khülang yüshihpü ju alungki yung de inü lümlah.”