YUNIRÜBO RHIMO 24 - AMÜSÜH HÜM CL Bible (BSI)

Jihudarünü Paul Müdamkhi

¹ Nimung phüngü dunglim achangbe amükeambuh Anania lung azothsürü khürü tüsho yakzan mükheahrü khülang Tertulla bebah aki. Arünü Paul azhihde arü lümkhi kovünor miki jih;

² küyimki Paul jiyukkhea, Tertullanü api müdamde athapü tankih: “Atoashangrü Felix, nü hode isa mungtsü lado tüsho isa lomi thsungkheak amüthrikhi ahihdo rhimodo,

³ limro alala tüsho lüpdükhi ching isanü asühde ha leangkhichoh.

⁴ Tüshe nü müpeangshangshihpü, muzhobah isa ki anükhüh anijang de mushuchoh.

⁵ Ha mihtsürü ju thsümütsü-jihrü, Jihudarü alala bolung arhungangüm jihbuh ah de isanü yimkhitdo, tüsho Nazarethrü bolung api aberü ah.

⁶ Apinü arüngyam she amüneanpü mürang, tüshe isanü api ram.

⁷ Tüshe limthobuh Lysia arü tüsho isa khah chingnü jangkhia lubah

⁸ api müdamrübo nü kilim arüpü thiyukhüm jih. Api rükakheahkhi hode isanü api müdamkhi alala nünü amütsanbah.”

⁹ Tüsho Jihudarünü she harü thiyuro ah de lümbah amüdamkhi lung berung.

Paulnü Felix miki Reanglokhi

¹⁰ Küyimki kovünornü api ki thiyu thapü athsungkheanü Paulnü alo: “Ha trükshih kurungkheak kam ahihdo mahkhaprü lakheah de mükheahbah, inü asühde reanglode thachoh.

¹¹ Inü kingaünpü Jirusalem ching wutukhi nimung thürükheak mahne muhoyi de nünü mütsanlah;

¹² tüsho arünü I arüngyam yungsho sinagogbo yungsho kiuto ching khürü ki atsangde yungsho boto thurumusude müngü.

¹³ Arünü I azhihde nü ki she amütsan jihkhukpü yung.

¹⁴ Tüshe arünü yingüh khülang de ajikhi Limro yande yakzan ching lakhi yungsho wukihrübo ching thrütkhi lüpdükhi yande isa jipürü Thrünpuh kingaünkhi inü nü ki alokhichoh.

¹⁵ Tüsho harü mihtsürübo nangde thiyuro-lungki tüsho mihbukmuyuk chido thsungkheak arhang kamlokhi labah de inü Thrünpuh kheak akin lah.

¹⁶ Junangde inü Thrünpuh tüsho mihtsürü kilim lümkhi müsühde alapü kamruhroro mürangchoh.

¹⁷ Kam anükhüh dunglim inü I yo trükshih kilim arung tüsho kingaün jihpü arü.

¹⁸ Inü ha rhimode alachoki Asia ching Jihudarü khürünü boto yungsho arhungangüm mülade arüngyam ching I tsangkhita ngü.

¹⁹ Arünü I azhihde tümüanü nüsa miki I amülim jihpü ha ching lah.

²⁰ Yungsho I kiuthsü-binkiu miki zhipchoki inü amütsü rhimokhi arünü I kheak ngüa lasho ha ching larünü thashang,

²¹ inü arü bolung zhipbah azhikhi khülang ha lang düh, ‘Asherü arhang kamlobah de akinkhi hode nüsa miki I mahkhapkhi ching lah.’ ”

²² Tüshe mütsanmükhide Limro mükheahbuh Felixnü akheam thsüde tha, “Küyimki limthobuh Lysia akibanü inü nüsa dünkheak zanzhak jihbah.”

²³ Apinü atorü ki Paul ju rihyam ching zopü, tüshe api zuzu khürü lapü tüsho api yihnüpü jihpü müyamrübo ki mülüpü thiyukhüm jih.

Felix tüsho Drusilla miki Paul

²⁴ Nimung anükhüh dunglim Felixnü aniube Jihudaberü Drusilla bebah arü; apinü Paul jishih tüsho apinü Jisu Khrista kheak akin lakhi thade so.

²⁵ Tüsho apinü thiyuro le zangrü danyukkhi tüsho arübe mahkhap atsangachihchoki Felix trede kam tüsho tha, “Kheakü thsungkheak tsoang; küyimki I kim labanü inü nü jibah.”

²⁶ Kheaküshe Paulnü api kilim sho jihpü labah de mulonglam. Jumonü apinü alode api jishihbah asukachih.

²⁷ Tüshe küyimki kam mahne hokhea, Felix ju Porcia Festanü müthri; tüsho Jihudarü asühshihpü Felixnü Paul ju rihyam ching zo.