YUNIRÜBO RHIMO 21 - AMÜSÜH HÜM CL Bible (BSI)

Paul Jirusalem lim Yükhi

¹ Küyimki arü kheaknü isa chamachihbah tsahmusukhea, isanü langde Kos ching arü, tüsho ashidopü Rhode tüsho ju chingnü Patara khiung.

² Tüsho sangkung ju Phoenikia lim yüde ngübah, isanü yükihbah yü.

³ Küyimki isanü Saipra ngüde arükhea, huzulimnü anguhbah Siria lim yü tüsho Tair ching yüki; tümüde ju ching sangkung hah shuhkhipü lakheah.

⁴ Ju ching isanü akinrü khürü ngü tüsho arü lung nimung thüne mung. Me wu hode arünü Paul ki Jirusalem lim müyüpü tha.

⁵ Küyimki ju ching isa nimungbo bankheanü isanü chamachihbah yü; arü niuberü tüsho tsührübo alalanü kiuto aleanglim khiungde bea dükhe. Isanü kemungyean kheak khukningbah tamkhüntamnü tüsho chode thaachih.

⁶ Jushu isanü sangkung kheak yükih tüsho arübo thüyam lim yülo.

⁷ Küyimki isa Tair chingnü hantsahde Tolima khiungkhea, isanü keoniorübo ki salüm thsübah arü lung nimung khülang mung.

⁸ Ashidopü isanü chamachihbah Kaesarea ching arü; tüsho isanü thüne bolung khülang thsangyuthsangrarü Philip yam ching yüzah tüsho api lung bin.

⁹ Tüsho api tsührü amürhangrü aliberü müchitrü 4 lakheah.

¹⁰ Isa nimung anükhüh mungde alachoki, wukihrü khülang amung Agaba Judea chingnü aki.

¹¹ Apinü isa kilim arübah Paul chimrümbe lu tüsho ajing le akhahbo rhükbah tha, “Amüsüh Menü ha thachoh: Ha chimrümbe atungrü Jihudarünü Jirusalem ching hanangde arhükbah, tüsho arünü api khiungkerü kilim jihbah.”

¹² Küyimki isanü ha sokheanü isa le püpürünü Jirusalem lim muwutupü Paul ki mushu.

¹³ Tüshe apinü alo, “Hanangde tripde tüsho I mulong thsümünimshihde nüsa tümü thsücho? Jirusalem ching rhükpü lang yung tüshe Atungpuh Jisu mung chingnü ashepü she inü thsakhambah lah.”

¹⁴ Küyimki isanü api yu mukukkheanü isanü tuklo tüsho tha, “Atungpuh lümkhi thsüshang.”

¹⁵ Harü nimungbo ho dunglim isanü thsakhambah Jirusalem lim wutu.

¹⁶ Tüsho Kaesarea chingnü jingyanrü khürü isa lung arü tüsho isa binpü thsüde adüso jingyanrü Saiprarü Nason yam ching bede yü.

Paulnü Jakob Rhuakheahkhi

¹⁷ Küyimki isa Jirusalem ching arükheanü keoniorünü isa asühde leangkhi.

¹⁸ Ju shidopü Paulnü isa lung Jakob kilim arü; tüsho azothsürü alala lakheah.

¹⁹ Arü ki salüm jih dunglim, apinü tankihkhi hode Thrünpuhnü khiungkerü bolung rhimokhibo akhinashunü thiyusheak jih.

²⁰ Küyimki arünü ha sokheanü Thrünpuh müretahshih. Tüsho arünü api ki tha, “Keoniorü, Jihudarü bolung akinrü chithürü küdükhüh lanü kheahang; arünü yakzan ching khide mulong jihlah,

²¹ tüsho nünü khiungkerü bolung lakhi Jihudarü ki arü tsührü tsütamübahpü yungsho isa yakli yande mülapü thsangyude Mosa bahyukpü thakhi arü ki thiyusheak jihdo.

²² Dale küde athsüba? Nü arükhi dükde arünü asobah.

²³ Jumonü isanü nü ki tümü thabanü rhimoang. Thiyuchihchim lukhi mihtsürü 4 lah;

²⁴ harü mihtsürübo bea lubah arü lung nü tsangkhitang tüsho arü dünkheak bahzübahdojang, junangde arünü ku hütbah. Junangde nü dünkheak arü ki thakhi tümü müla tüshe nü a yakzan yande lah de alalanü amükheahbah.

²⁵ Tüshe khiungkerü thsungkheak a isanü münrünkhi sangthsü kingaünkhi, thiyih tüsho athünitsahkhi mütsühpü, tüsho müzammüram müthsüpü kihüm mühahdo.”

²⁶ Jumonü Paulnü mihtsürübo bea lu tüsho ashidopü arü lung api tsangkhit tüsho atsangkhitkhi nimung bankhitpü tüsho arü aban dünkheak kingaün jihpü lakhi thiyusheak jihpü arüngyam ching yüzah.

Arüngyam ching Paul Ramkhi

²⁷ Küyimki nimung thüne bankhitkheanü Asia ching Jihudarünü api arüngyam ching ngübah boto alala thurumusu, tüsho Paul ram.

²⁸ Arünü zhi, “Israel mihtsürübo, isa rungang! Isa mihtsürü le yakzan tüsho ha dangpung azhihde lüpdükhi ching alala thsangyukhi mihtsürü ha ah; kheaküshe apinü Greekrü ju arüngyam ching bede yüzahbah amüsüh dangpung müneanjih.”

²⁹ Tümüde arünü akhuhlim Efisiarü Trophima api lung kiuto ching ngü, tüsho Paulnü api arüngyam ching beyukdo de arünü lüm.

³⁰ Kiuto abümnü alanajide wusu, tüsho alala thripnü mihtsürübo alihde arübah Paul ram tüsho arüngyam chingnü yankhit. Tüsho ripit nahde rihabah.

³¹ Arünü Paul laksahpü mürangde alachoki, Jirusalem kiuto abümnü alanaji ching lah de Rom bonungrü limthobuh kilim thiyusheak arü.

³² Apinü nahde bonungrübo le wühkenorübo bebah arü kilim alihde yüki. Küyimki arünü limthobuh le bonungrübo ngükheanü Paul lakkhi tuklo.

³³ Limthobuhnü thüninde arübah api bea lu tüsho wuhrünliu mahnenü api rhükpü thiyukhüm jih; tüsho api she a tüsho anihbuhnü tümü rhimokheanü apinü keokhi.

³⁴ Tüsho boto ching khürünü khürü tüsho püpürünü püpü zhi. Küyimki alanajikhinü thiyuro mütsanpü mukukkhea, apinü anihbuh ju bonungrü-yam ching bede ayüpü thiyukhüm jih.

³⁵ Tüsho küyimki api jingjungpung-dukkhi khiungkhea, boto nanachihkhi hode bonungrünü api shuhpü kam.

³⁶ Tümüde mihtsürü botonü dunglim zhide arü, “Api laksahang!”

Paulnü Boto ki Thakhi

³⁷ Paul ju thüyam ching bede yüzahpü lachoki apinü limthobuh ki tha, “Inü nü ki thapü kuknah?” Apinü alo, “Nünü Greek thakhukla de?

³⁸ Nü a azhipü tankihde rimthsümünimrü 4000 bebah sunglo ching bede ayükhi Ijiprü yung de?”

³⁹ Tüshe Paulnü tha, “I a Kilikia ching lakhi Tarsa ching zübekhi, adungto kiuto mihkhung khülang ah. Muzhobah inü mihtsürübo ki thashang.”

⁴⁰ Küyimki apinü anihbuh ki mülüjihkhea, Paulnü adamkhi kheak zhipbah mihtsürübo ki akhah hit. Tüsho küyimki jikshe müthsükheanü, apinü arü ki Ibri yutha chingnü tha: