YUNIRÜBO RHIMO 20 - AMÜSÜH HÜM CL Bible (BSI)

Macedonia tüsho Akaia lim

¹ Alanaji kheam dunglim, Paulnü akinrübo jimukhung tüsho mulong tuthsukyu thabah arü ki chode thsü. Jushu apinü chamachihbah Macedonia lim yü.

² Küyimki apinü harü alala ching yüde mulong tuthsukyu ahihdo thakhea, apinü Greece ching arü.

³ Apinü ju ching khinu mahsam mung, tüsho api Siria lim yüpü lachoki, küyimki Jihudarübonü api azhihde arhimokhea, apinü Macedonia hode ayüpü lümkih.

⁴ Pyrrha tsührü Berearü Sopaternü api atru; tüsho Tesalonikarü Aristarka tüsho Sekunda; Derberü Gaia tüsho Timothi; tüsho Asiarü Tykika tüsho Trophima.

⁵ Harü mihtsürü akhuhde ayürünü Troa ching isa aleangde la,

⁶ tüshe phaüm muyukkhi thünio dunglim isanü Filipi chingnü yü tüsho nimung phüngü dunglim arü kilim Troa ching arübah ju ching nimung thüne mung.

Paulnü Akheam Thsüde Troa Rhuakheahkhi

⁷ Amu-khip akhuhbe nimung, yikhap yihnakpü isa rukhüh mukhungchoki, Paulnü ashidopü chamachihpü lümde arü ki asukachih; tüsho apinü tsüngphulung khiungde asukachih.

⁸ Isa mukhunga lakhi akube khiungshak ching ju tsünpung ahihdo taka lakheah.

⁹ Tüsho athrününgtsüng mihtsürü amung Eutika ju ayinripit ching binde alakheah. Paulnü ruhde athachoki yapshede yü; yapshea lakhi hode rünkih mahsampü kheaknü ayokhi tüsho shea shuhmusu.

¹⁰ Tüshe Paulnü yükibah api kapkih-a lubah tha, “Darhungangüm, tümüde api arhang ah.”

¹¹ Paulnü arünkihkhi lim yükihlobah yikhap yihnak tüsho tsüh. Apinü ayinkhi khiungde asukachihbah chamachih.

¹² Arünü athrününgtsüngbuh ju arhang kama bebah tso, tüsho khide mulong sühakhim ngü.

Troa chingnü Mileta

¹³ Tüshe isanü Paul beyuka lupü thsüde akhuhlimnü sangkung lim yübah Assos lim yüpü tsahmusu; tümüde api a alo kheaknü yüde alakheah.

¹⁴ Küyimki apinü Assos ching isa shorukhea, isanü api sangkung kheak bekih-a bebah Mitylen ching arü.

¹⁵ Tüsho isanü ju chingnü tsahde ashidopü Kios ki arü; ju shidopü isanü Samos khiung; tüsho ju shidopü Mileta ching arü.

¹⁶ Tümütüsho Paulnü Asia ching kim mübahpü thsüde Efisia tsahhopü pungkhi; tümüde apinü akuk thürün thünimni-thünio nimung Jirusalem khiungpü niokheam.

Efisia Azothsürü ki Paul Achamyu

¹⁷ Tüsho apinü Mileta chingnü Efisia ching yüshihbah api kilim borü azothsürübo jide arüshih.

¹⁸ Küyimki arübo api ki arükheanü apinü arü ki tha: “I Asia ching jing düküyukkhi atan nimungnü nüsanü mükheahlah;

¹⁹ Jihudarünü azhihde rükaki tode lalashe azhihayihde tüsho chike bukde inü Atungpuh tankih;

²⁰ nüsa alü thsüpü lakhi thsangyuthsangrapü tümü she inü mudukiuhlo tüshe boto chingnü tüsho thüyam abande nüsa thsangyude,

²¹ mulong müthride Thrünpuh kilim rholopü tüsho isa Atungpuh Jisu kheak akin lashihpü Jihudarü tüsho Greekrü chido ki inü thiyumütsan thsü.

²² Tüsho kheakü Menü reangkih-a, I kheak tümü dünjibanü mümükheahde Jirusalem lim yüchoh.

²³ Kiuto aban rihyam ching lapü tüsho küpkhuk shorupü Amüsüh Menü athakhi lang inü mükheahlah.

²⁴ Tütüshe, inü alihpü bansho tüsho Atungpuh Jisunü I kilim jihkhi rhimo Thrünpuh amüthsüm thiyusheak-atsü lang she bansho, inü I rhangdung tümü thülünde mülüm.

²⁵ Tüsho kheakü kheahang, inü nüsa bolung kiulongthsü thsangyuthsangrakhi alalanü I miro müngülo.

²⁶ Jumonü nüsa alala thiyih dünkheak I amütsan müla de khihni inü nüsa ki khipkhitchoh,

²⁷ tümüde inü nüsa ki Thrünpuh lümkhi alala zhiyukpü müdukiuhlo.

²⁸ Nüsa le Amüsüh Menü nüsa aheangrü kamshihkhi namfimihnu boto tüsho api tsührü thiyih hode nihbuh yo kamkhi Thrünpuh borü kümpü kurhangang.

²⁹ I chamachihshu namfimihnu boto maningshihpü rimre amütsü nüsa bolung arübah de inü mükheahlah;

³⁰ tüsho nüsa bolungnü she akeangyu thaa akinrübo arü dunglim yüshihpü mihtsürü akhiukbah.

³¹ Jumonü kurhangang tüsho chike bukde, animung tüsho are kam mahsam nüsa mihbüm aban thsangyukhi lümkhitang.

³² Kheakü inü nüsa zokihshihpü tüsho tsangkhita larü alala bolung yamrüplurüp lupü api amüthsüm kilim shuhmülanga jihchoh.

³³ Inü she yo shotoyinchi, suna yungsho khimmih mümürühde lado.

³⁴ I tüsho I lung larü yihnüpü lakhi thsungkheak I khahnü rhimodo de nüsanü mükheahlah.

³⁵ Inü arhimokhi alala ching, hanangde mürangde arhimokhinü reangmüzahrü isanü arungbeah de, ‘Aleangkhikhi kheaknü ajihkhi alü müngühmühi,’ de Jisunü athakhi lümkhitde nüsa ki huhdo.”

³⁶ Küyimki apinü ha thakheanü khukning tüsho arü alala lungnü tamkhüntamnü.

³⁷ Arü alalanü trip tüsho Paul kapde müthsüp.

³⁸ Arünü api miro müngülo de athakhi hode arü khide mulong thsümünim. Tüsho arünü api sangkung ching bedarü.