YUNIRÜBO RHIMO 19 - AMÜSÜH HÜM CL Bible (BSI)

Paul Efisia ching

¹ Küyimki Apollo Korint ching lakhea, Paulnü akulim lomi hode Efisia ching arü. Ju ching apinü jingyanrü khürü ngü.

² Tüsho apinü arü ki tha, “Nüsanü akinchoki Amüsüh Me leangkhidü shi?” Arünü alo, “Yung, Amüsüh Me lah de isanü küyimkishe muso.”

³ Tüsho apinü tha, “Dale tüsho nüsa tümü ching baptikhea?” Arünü alo, “Johannü baptikhi ching ah.”

⁴ Tüsho Paulnü tha, “Johannü api dunglim arükhi Jisu kheak kinpü mihtsürübo ki thade, mulong müthride baptijihkhi lakheah.”

⁵ Ha sobah arünü Atungpuh Jisu mung chingnü bapti.

⁶ Tüsho küyimki Paulnü arü kheak akhah nimkihkhea, Amüsüh Me arü kheak arü; arünü püpürü yuthabo chingnü thade müchit.

⁷ Arü mihtsürü 12 bande alakheah.

⁸ Apinü sinagog ching yüzah tüsho Thrünpuh kiulongthsü thsungkheak khinu mahsam mulong tode tüsho kukde atsangachih;

⁹ tüshe küyimki khürünü mulong müküpde tüsho mükinde amukhungrü miki amütsü limro asukkhea, apinü jingyanrü bea lubah akhin tüsho nimung aban Tyranna khiunglün-yam ching atsangachih.

¹⁰ Ha kam mahne mutuklode yü, junangde Asia ching larü alala, Jihudarü tüsho Greekrü chidonü Atungpuh yu so.

Seva Tsührübo

¹¹ Tüsho Thrünpuhnü Paul khah hode khinthiyinbebo kihode rhimo,

¹² junangde apinü ashuhkhi shokenanbe yungsho khimnunupübo lude tukthsürü kilim yü, tüsho arü kheaknü tukthsübo ngu tüsho amünean mebo wukhiuk.

¹³ Jihudarü khürü amünean mebo yankhitde atsahrünü Atungpuh Jisu mung tampü mürang. Arünü amünean mebo ki tha, “Paulnü thsangyuthsangrabuh Jisu mung chingnü inü nü ki thiyukhüm jihchoh.”

¹⁴ Jihudarü achangbe amükeamrü Seva tsührü thünenü ha rhimode alakheah.

¹⁵ Tüshe amünean menü arü ki alo, “Jisu tüsho Paul inü mükheahlah; tüshe nüsa sherü a?”

¹⁶ Amünean me yüzahkhi mihtsürünü müküpde arü yande müsham tüsho arü alala kukabah. Arübo api yam chingnü yuria bünkeang akhiuk.

¹⁷ Tüsho Efisia ching larü alala, Jihudarü tüsho Greekrü chidonü ha so; tüsho arü alala trede kam; tüsho Atungpuh Jisu mung wüntrede kam.

¹⁸ Akinrü ahihkhühnü arünü arhimokhi boto mikinü thakhitde arü.

¹⁹ Tüsho wurük-huhrübonü arü hümbo hanmukhungde arübah boto mikinü takabah; tüsho jurü adün khekhi ju shotoyinchi nak 50,000 akhiuk.

²⁰ Junangde Atungpuh yu ju wu lade akuk ngüde bude yü.

Efisia ching Alanaji

²¹ Harü dünjishu Paulnü Macedonia tüsho Akaia hode Jirusalem lim yüpü lümkihde tha, “I ju ching yüshu, inü Rom she rhuakheahbeah.”

²² Tüsho apinü anihbuh rungrü mahne Timothi le Erasta Macedonia lim yüshihbah api a anükhüh kheak Asia ching la.

²³ Ju kim ching Atungpuh limro dünkheaknü Efisia ching alanaji akhiuk.

²⁴ Shotoyinchi-kingrü Demetrianü Artema thsungkheak shotoyinchi arüngyam thsüde rhimorübo kilim alü ato hande arüjih.

²⁵ Apinü arü nangde arhimorübo alala rukhüh jihbahle tha, “Mihtsürübo, ha rhimo chingnü isa lakhit lah de nüsanü mükheahlah.

²⁶ Tüsho Efisia ching lang yungde Asia alala ching Paulnü, khahbonü athsükhi thrünpuhbo a thrünpuhbo yung de thade mihtsürü ahihkhüh münityukde atsokhi nüsanü ngülah tüsho sochoh.

²⁷ Junangde isanü arhimokhi mungchih ngüpü lah. Kheaküshe atrebe lakhi ju Asia tüsho alomiküp alala ching kingaünkhi Artema arüngyam akeangkeang kambah tüsho anihbe thukhi thsümünimbah.”

²⁸ Küyimki arünü ha sokheanü bukakhiuk tüsho zhi, “Efisia yo Artema ato ah!”

²⁹ Jumonü kiuto ju ayingyingnü mide kam; tüsho arünü khiunglün-yam ching nanachihde yüzahbah Paul lung tsahkhi Macedoniarü Gaia tüsho Aristarka arü lungnü yankhit.

³⁰ Paulnü boto ching yüzahpü mulong tüshe akinrübonü api yanlo.

³¹ Api müyamrü lomi torübo khürünü khiunglün-yam ching anihbuh muhuhpü mushude thiyusheak mühah.

³² Kheakü khürünü khülang tüsho püpürünü püpü zhi; tümüde amukhung ju ayingying ching lakheah, tüsho arü tümü thsüpü mukhungkheanü ahihbenü mümükheah.

³³ Boto ching khürünü Alexander kheak kihlah de tha, tümüde Jihudarübonü api mikhuh ching arüshih. Tüsho Alexandernü mihtsürübo zhipdode malanshihpü api khah niuk.

³⁴ Tüshe küyimki arünü api ju Jihudarü ah de amütsankhea, kimkhü 2 bande arü alala düsheak rukhühnü zhi, “Efisiarü yo Artema ato ah!”

³⁵ Küyimki kiuto mütsanmükühbuhnü boto danlokhea, apinü tha, “Efisia mihtsürübo, Efisia kiuto ching ato Artema lakhi tüsho thüning chingnü akikhi anihbe mejak lakhi shenü mümükheahkhi la?

³⁶ Jumonü harü ju müdanlokhukbe a le, nüsanü zhikde laang tüsho makhade daphean.

³⁷ Tümüde nüsanü harü mihtsürü isa arüngyambo yungsho isa thrünbe mükhemükim müthsürü bede arüa lah.

³⁸ Jumonü Demetria tüsho api lung rhimorü khürü azhihde atsangkhi lasho, mahkhappungbo khimshuh-a lah, tüsho atorübo lah; arünü ju ching atsangpü kuklah.

³⁹ Tüshe nüsanü tümükhüh alü yimpü lasho, ju boto mukhungde alakhi ching khikzhakbah.

⁴⁰ Tümüde khihni ha dünjiabahshu, alanajikhi dünkheak isa mudopü lah. Ha alanaji dünkheak atsokhipü müla, tümütüsho ju thsungkheak amütsan tümü müla.”

⁴¹ Ha thabah apinü amukhungrü müzütshih.