YUNIRÜBO RHIMO 17 - AMÜSÜH HÜM CL Bible (BSI)

Tesalonika ching

¹ Küyimki arünü Amphipoli tüsho Apollonia hokhea, Jihudarü sinagog lapung Tesalonika ching arü.

² Paulnü api susu lakhi nangde yüzahbah amu-khip mahsam amüsühyu chingnü arü ki atsangachih,

³ Khrista ju thsünübah tüsho ashe chingnü arhang kamlopü lakheah de thanaka huhde mütsanmükhi jih, tüsho tha, “Inü nüsa ki zhiyukbuh Jisu ha Khrista ah.”

⁴ Khürü a mulong müthribah Paul le Sila büne lung arih; junangde Thrünpuh kingaünrü Greekrü boto tüsho adungto liberü ahihkhühnü jude rhimo.

⁵ Tüshe Jihudarünü mükthsüde kam tüsho kiudunglimrobo chingnü mihbukmuyukbo bemukhungbah kiuto alanajide kamshih tüsho ane ju mihtsürübo ki bede akhiukpü Jason yam zündo.

⁶ Tüsho küyimki arünü ane müngükheanü Jason le keoniorü khürü kiuto limberübo müngüh bebah tsahde zhi, “Alomi neamneamjihrü mihtsürü harü ha ching she arüa lah,

⁷ tüsho Jasonnü ane beyukdo; tüsho arü alalanü Jisu ju kiulongthsüpuh ah de thade Kaesar yakzan azhihchoh.”

⁸ Mihtsürübo tüsho kiuto limberübo ha sobah kipathsükde kam.

⁹ Tüsho arünü Jason le püpürübo ju arhokhitbe jihshihbah dükhea tsoshih.

Berea ching

¹⁰ Keoniorübonü niokheamde Paul le Sila büne azhing chingnü Berea lim thiyia tsoshih; tüsho küyimki ane akhiungkheanü Jihudarü sinagog ching yüzah.

¹¹ Harü Jihudarü a Tesalonika ching larü ruk yungde yakli atsü lakheah, tümüde arünü thiyusheak ju künsahde leangkhi tüsho ju atsütsü a shi de nimung aban amüsühyu yimakheah.

¹² Jumonü Greekrü athrürü tüsho aliberü adungtobo ahihkhühnü kin.

¹³ Tüshe küyimki Tesalonika ching lakhi Jihudarünü Berea ching she Paulnü thiyusheak zhiyukdo de asokhea, arünü ju ching she arübah boto azhihde thurumusu.

¹⁴ Keoniorübonü Paul ju niokheamde keto lim thiyia tsoshih; tüshe Sila le Timothi büne a Berea ching binlo.

¹⁵ Bea-dükherünü Paul ju Athen khiungde bedarü; tüsho Sila le Timothi büne nahde api lung arang dükhi Paul kilimnü thiyusheak lubah chamachih.

Athen ching

¹⁶ Kheakü Paulnü Athen ching ane aleangde alachoki kiuto ching sangthsübonü amikhi ngübah api khide lümthsünü.

¹⁷ Jumonü apinü sinagog ching Jihudarü le kingaünrübo tüsho nimung aban yinzüyindopung ching larü ki atsangachih.

¹⁸ Epikur tüsho Stoik lümlung-yimrü khürünü she api shoru. Tüsho khürünü tha, “Mudukmükerünü tümü thacho?” Püpürünü tha, “Apinü khiungkerü thrünpuhbo dünkheak thachoh khunuh.” Arünü ha tha tümütüsho Paulnü Jisu tüsho arhang kamlokhi dünkheak thsangyuthsangra.

¹⁹ Tüsho arünü tholobah kiuthsü-binkiu Areopaga miki bedarübah tha, “Nünü athsangyukhi aso ha tümüanü isanü mükheahnelah.

²⁰ Nünü hande arükhi khürü aso thsüde isanü sochoh; jumonü harü amütsan isanü mükheahnelah.”

²¹ Kheakü ju ching lakhi Athenrü tüsho khiungkerübonü tümüanü aso thakhi tüsho anikhi ching lang kim hoshih.

²² Jumonü Paulnü Areopaga bolung zhipbah tha: “Athen mihtsürübo, nüsa limro alala ching khide akin dükünglah de inü kheahkhitchoh.

²³ Tümüde I tsahhochoki nüsanü kingaünkhi kukrukbo inü kheahyuk, tüsho kingaün sadam kheak hade thrütkih-a ngü, ‘Mümükheahkhi thrünpuh kilim.’ Jumonü nüsanü tümü kingaünchonü mümükheahkhi ah de inü nüsa ki zhiyukchoh.

²⁴ Alomiküp tüsho ju ching lüpdükhi Thrünpuh ju alomi tüsho yinmi Atungpuh ah tüsho khahnü athsükhi arüngyam ching mülachoh.

²⁵ Tüsho apinü tümükhüh künkhi nangde mihtsürü khahnü mükipduhchoh, tümütüsho apinü lang mihtsürü alala kilim rhang le sheak tüsho lüpdükhi jihchoh.

²⁶ Apinü mihtsürü khülang kheaknü mihtsürü trükshih aban lomi alala ching lapü thsüde thrün; tüsho apinü arü kimbo tüsho lapungbo akhualojih,

²⁷ junangde arünü api khiungpü tüsho angüpü mulonglamde Thrünpuh yimbah. Tütüshe api a isa chido kheaknü limshude müla,

²⁸ tümüde ‘Api kheak isa lah, aphapchoh tüsho rhangdung lah’; tümüde nüsa yo thiyutsü thrütrü khürünü thaa lah, ‘Isa api tsührübo ah.’

²⁹ Jumonü Thrünpuh tsührübo a le, isanü aphü ju suna, shotoyinchi, lung, kikiukkhi tüsho mihtsürü lümkhi nangde ah de mülümbeah.

³⁰ Mümükheahkhi kimbo Thrünpuhnü amümürang thsüdo, tüshe kheaküa lüpdükhi ching mihtsürü alala ki mulong müthripü thiyukhüm jihdo,

³¹ tümütüsho apinü amokhitkhi mihtsürünü thiyuro-lungkinü alomiküp mahkhappü nimung khülang akhukhitdo, tüsho ha apinü ashe chingnü arhang kamloshihkhi hode mihtsürü alala kilim adüngakhi jihdo.”

³² Küyimki arünü asherü arhang kamlokhi dünkheak sokhea, khürünü münejih; tüshe püpürünü tha, “Ha dünkheak kheaküshe isanü nü ki anibah.”

³³ Jumonü Paulnü arü bolungnü wukhiuk.

³⁴ Mihtsürü khürünü api lung arih tüsho kin, arü bolung ju kiuthsü-binkiu kheyuk ching berü Dionysia la; kheaküshe aliberü amung Damari, tüsho arü lung püpürübo lakheah.